អន្តរជាតិ
អាន់វ៉ា អ៊ីប្រាហ៊ីម៖ «ខ្ញុំមិនដែលបាត់បង់ក្តីសង្ឃឹមលើប្រជាធិបតេយ្យឡើយ ទោះជាប់ពន្ធនាគារកន្លងមក»
× ក្រោយដឹកនាំចលនា Reformasi ឬចលនាកែទម្រង់អស់រយៈពេល ២០ឆ្នាំដោយប្រឈមភាពលំបាកលំបិនច្រើនជំពូក មេបក្សប្រឆាំងម៉ាឡេស៊ីលោក អាន់វ៉ា អ៊ីប្រាហ៊ីម ចាប់ផ្តើមឈានឆ្ពោះទៅកាន់កាប់អំណាចដឹកនាំប្រទេសហើយ។ លោកបានអះអាងថា លោកមិនដែលបាត់បង់ជំនឿលើការប្រឹងប្រែងដើម្បីប្រទេសជាតិឡើយ ហើយលោកអំពាវនាវឲ្យប្រជាជនម៉ាឡេស៊ីប្រឹងបន្តដើម្បីផ្តល់ក្តីសង្ឃឹមដល់ប្រជាជនលើពិភពលោកដែលស្រេកឃ្លានប្រជាធិបតេយ្យផង។
«ពេលដែលលទ្ធិប្រជាធិបតេយ្យដើរថយក្រោយ ប្រជាជនម៉ាឡេស៊ីត្រូវផ្តល់ក្តីសង្ឃឹមទៅប្រជាជនទូទាំងពិភពលោក និងជំរុញពួកគេបន្តទាមទារសេរីភាពផង»។ នេះជាសម្តីរបស់លោក អាន់វ៉ា អ៊ីប្រាហ៊ីម ក្នុងបទសម្ភាសន៍ជាមួយ Fairfax Media នៅថ្ងៃមុនត្រូវគេដោះលែងជាផ្លូវការនៅថ្ងៃពុធទី ១៦ ខែឧសភា។
លោក អាន់វ៉ា អ៊ីប្រាហ៊ីម ក៏អះអាងផងដែរថា លោកមិនដែលបាត់បង់ក្តីសង្ឃឹមឡើយទោះបីជាលោកជាប់ពន្ធនាគារច្រើនឆ្នាំក៏ដោយ។ លោកជឿជាក់ខ្លាំងលើឧត្តមគតិរបស់មនុស្សរាល់គ្នា ហើយបើគ្រប់គ្នាប្រឹងប្រែង អ្វីៗក៏គេអាចសម្រេចបានដែរ។
លោក អាន់វ៉ា និយាយដូច្នេះ៖ «កន្លងមកខ្ញុំមិនដែនបាត់បង់ក្តីសង្ឃឹមសូម្បីបន្តិច។ នៅក្នុងគុកខ្ញុំអាចដឹងថាប្រជាជនមានកំហឹងបែបណាចំពោះរបបដឹកនាំពុករលួយរៀងរាល់ថ្ងៃ។ ខ្ញុំតែងតែមានជំនឿលើឧត្តមគតិរបស់មនុស្សរាល់គ្នា ហើយប្រសិនជាយើងប្រយុទ្ធតវ៉ាខ្លាំង បន្តិចៗម្តងយើងនឹងអាចសម្រេចជោគជ័យហើយ»។
«បើការបោះឆ្នោតនោះត្រឹមត្រូវយុត្តិធម៌ ខ្ញុំប្រហែលជាឈ្នះឆ្នោតតាំងពីដប់ឆ្នាំមុនម្ល៉េះ»។ លោកអាន់វ៉ា បន្ថែមដូច្នេះ។
តាមពិតទៅលោក អាន់វ៉ា ដឹកនាំចលនាទាមទារកែទម្រង់ Reformasi អស់រយៈពេល ២០ ឆ្នាំមកនេះដើម្បីដាក់សម្ពាធលើរដ្ឋាភិបាលដឹកនាំដោយបក្សកាន់អំណាច UMNO។ លោកប្រឈមការចាប់ចង និងដាក់ពន្ធនាគារពីរលើក ប៉ុន្តែលោកមិនបានបោះបង់ការតស៊ូដើម្បីទាមទារបង្កើតសង្គមដែលប្រជាធិបតេយ្យ ស្អាតស្អំ និងយុត្តិធម៌ឡើយ។
ក្រោយទទួលបានការលើកលែងទោសពីព្រះមហាក្សត្រ លោក អាន់វ៉ា មិនទាន់អាចជំនួសតំណែង លោក មហាធៀ មហាម៉ាត់ ជានាយករដ្ឋមន្ត្រីបានឡើយ។ បើតាមការបញ្ជាក់របស់លោក មហាធៀ លោក អាន់វ៉ា ត្រូវស្វែងរកតំណែងសមាជិកសភាសិន ប៉ុន្តែលោកក៏ប្រហែលជាអាចទទួលបានតំណែងក្នុងគណៈរដ្ឋមន្ត្រីថ្មីផង។
ក្នុងបទសម្ភាសដដែលលោក អាន់វ៉ា បានបង្ហាញទំនុកចិត្តខ្ពស់ថា លោកអាចធ្វើការងារជាមួយនាយករដ្ឋមន្ត្រីទី៧ ដែលមានវ័យ ៩២ ឆ្នាំដែលជាចៅហ្វាយ និងជាសត្រូវចាស់របស់លោកនោះ។ តាមបទពិសោធន៍ធ្វើការងារកន្លងមក លោក អាន់វ៉ា យល់ថា លោក មហាធៀ ជាមេដឹកនាំម្នាក់ដែលខ្វាយខ្វល់ពីប្រជាជនម៉ាឡេស៊ី និងប្រទេសម៉ាឡេស៊ីទាំងមូលខ្លាំងណាស់។
«ខ្ញុំយល់ច្បាស់ថាលោក មហាធៀ ខ្វាយខ្វល់ខ្លាំងពីប្រជាជនម៉ាឡេស៊ី និងប្រទេសម៉ាឡេស៊ី។ ដូច្នេះហើយភាពដៃគូរវាងខ្ញុំនិងគាត់មានសារសំខាន់ណាស់ក្នុងការដោះស្រាយបញ្ហាប្រទេសជាតិ ជាពិសេប្រព័ន្ធដឹកនាំដែលពុករលួយដែលប៉ះពាល់ជីវភាពប្រជាជនម៉ាឡេស៊ីគ្រប់ស្រទាប់វណ្ណៈ»។
តាមពិតទៅលោក អាន់វ៉ា ធ្លាប់បម្រើការងារជាឧបនាយករដ្ឋមន្ត្រីពីឆ្នាំ ១៩៩៣ ដល់ ១៩៩៨ ក្រោមអាណត្តិដឹកនាំរបស់លោក មហាធៀ។ ឆ្នាំ ១៩៩៨ លោកត្រូវគេដកតំណែង ហើយក្រោយមកត្រូវបានគេចាប់ដាក់ពន្ធនាគារដោយសារបទល្មើសរួមភេទជាមួយមនុស្សប្រុសដូចគ្នាថែមទៀត។ លោកត្រូវបានគេចាប់ដាក់ពន្ធនាគារម្តងទៀតកាលពីឆ្នាំ ២០១៥ ដោយលោករងការចោទប្រកាន់ជាថ្មីពាក់ព័ន្ធការរួមភេទជាមួយមនុស្សប្រុសដូចគ្នាទៀត ពេលលោក ណាជីប ធ្វើជានាយករដ្ឋមន្ត្រី។ លោក អាន់វ៉ា ហៅការចាប់ខ្លួនលោកថាជារឿងនយោបាយសុទ្ធសាធ៕
Tag:
អាន់វ៉ា អ៊ីប្រាហ៊ីម
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com