លោក Pep Guardiola បានចុះហត្ថលេខាលើកិច្ចសន្យាថ្មីមួយដែលរក្សាវត្តមានរបស់លោកនៅជាមួយ Manchester City រហូតដល់ឆ្នាំ២០២១ ។
គ្រូបង្វឹកអេស្ប៉ាញវ័យ៤៧ឆ្នាំរូបនេះ បាននាំឲ្យ Manchester City លើកពាន Premier League ជាមួយនឹងការទទួលបាន១០០ពិន្ទុជាកំណត់ត្រា។ ការពន្យារកិច្ចសន្យា គឺជាការតាំងចិត្តដ៏មុតមាំមួយរបស់អតីតគ្រូបង្វឹក Barcelona និង Bayern Munich បើគិតចាប់តាំងពីលោកប្រឡូកក្នុងអាជីពដឹកនាំនៅឆ្នាំ២០០៨មក។
នៅឆ្នាំ២០១៨ នេះ លោក Guardiola បាននាំ Man City ឈ្នះពាន League Cup ក្រោយឈ្នះ Arsenal ៣-០ នៅវគ្គផ្តាច់ព្រ័ត្រ ហើយបានបន្តដណ្តើមបានពាន Premier League ដោយមាន១៩ពិន្ទុលើស Manchester United ដែលជាគូប្រជែង។
លោក Guardiola គឺជាគ្រូបង្វឹកដ៏ឆ្នើមម្នាក់នៅលើពិភពលោក ដោយធ្លាប់នាំ Barcelona ឈ្នះពាន La Liga ៣លើក ពាន UEFA Champions League ២លើក និងពានជាច្រើនទៀត។ មុននឹងទៅដឹកនាំ Manchester City នៅឆ្នាំ២០១៦ លោកបានដឹកនាំ Bayern Munich ដោយជួយឲ្យក្លិបអាល្លឺម៉ង់ឈ្នះ Bundesliga ៣លើក និងពានជាច្រើនទៀតផងដែរ។
លោកទទួលបានរង្វាន់ឯកត្តជនច្រើន ក្នុងនោះ FIFA World Coach of the Year នៅឆ្នាំ២០១១ ហើយក្រោយការនាំឲ្យ Man City ឈ្នះពាន Premier League លោកទទួលបានពាន Premier League Manager of the Season និងពាន LMA Manager of the Year ផងដែរ៕