កីឡាអន្តរជាតិ
អន្តរជាតិ
Inter ដណ្តើមលេខ៤ ពី Lazio សម្រាប់កៅអី Champions League រដូវកាលក្រោយ
× Inter Milan បានកក់កៅអីទៅលេងក្នុងក្របខណ្ឌ UEFA Champions League ជាលើកដំបូងចាប់តាំងពីឆ្នាំ ២០១២ បន្ទាប់ពីទទួលជ័យជម្នះយ៉ាងប្រផុតប្រផើយនៅលើទឹកដី Lazio ក្នុងលទ្ធផល ៣-២។
ក្នុងការប្រកួតចុងក្រោយនៃក្របខណ្ឌអ៊ីតាលី Serie A ក្រុមម្ចាស់ផ្ទះ Lazio ត្រូវការត្រឹមស្មើជាមួយក្រុមភ្ញៀវ Inter Milan ប៉ុណ្ណោះដើម្បីរក្សាតំណែងចំណាត់ថ្នាក់លេខ៤ ដើម្បីបានកៅអីទៅលេងពានកំពូលអឺរ៉ុបរដូវកាលក្រោយ។
Lazio បានរកគ្រាប់បាល់នាំមុខមុនដោយគ្រាប់បាល់ចូលទីខ្លួនឯងរបស់កីឡាករ Ivan Perisic នៅនាទីទី៩។ ២០នាទីក្រោយ ខ្សែការពារ Danilo d'Ambrosio ស៊ុតបញ្ចូលទីតាមស្មើឲ្យ Inter វិញ មុនពេលខ្សែបម្រើ Felipe Anderson ជួយឲ្យម្ចាស់ផ្ទះនាំមុខ ២-១ មុនចប់តង់ទី១។
ទោះបីជាយ៉ាងណាក៏ដោយ Mauro Icardi បានរកបាល់តាមស្មើវិញនៅនាទី៧៨ ដោយការស៊ុតបាល់ពិន័យ១១ម៉ែត្រ មុនពេលដែល Senad Lulic របស់ Lazio ត្រូវបានអាជ្ញាកណ្តាលឲ្យកាតក្រហម។ ខ្សែប្រយុទ្ធ Matias Vecino ជាអ្នករកគ្រាប់ជ័យជម្នះឲ្យ Inter យកឈ្នះ Lazio ៣-២។
៣ពិន្ទុនេះបាននាំ Inter រំកិលខ្លួនទៅឈរចំណាត់ថ្នាក់ទី៤វិញ បើទោះមាន ៧២ពិន្ទុស្មើគ្នាហើយចាញ់គ្រាប់បាល់ស៊ុតបញ្ចូលទីរបស់ Lazio ក៏ដោយ។
ក្នុងក្របខណ្ឌកំពូលអ៊ីតាលី ខុសពីលក្ខខណ្ឌនៅអង់គ្លេស។ នៅអង់គ្លេសគិតលើពិន្ទុបន្ទាប់មកមើលលើគ្រាប់បាល់នាំមុន ខណៈអ៊ីតាលីគិតលើពិន្ទុ បន្ទាប់មកគិតលើការប្រកួតថាក្រុមណាល្អជាង (Head-to-head)។ ដូច្នេះ Inter Milan បានកៅអី Champions League ហើយ Lazio ទៅប្រជែងក្នុងពានលំដាប់ទី២អឺរ៉ុប Europa League រដូវកាលក្រោយ៕
Tag:
បាល់ទាត់
EUFA Champions League
Inter Milan
Serie A
© រក្សាសិទ្ធិដោយ thmeythmey.com