ជាតិ
ប៉ូលិសម្នាក់ត្រូវបានបញ្ឈរជើង ក្រោយទះកំផ្លៀងអ្នកគ្រូពេទ្យដែលមិនគោរពច្បាប់ចរាចរណ៍
× ភ្នំពេញ៖ នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ បានចេញលិខិតបង្គាប់ឲ្យបញ្ឈរជើងបណ្ដោះអាសន្នចំពោះ មន្ត្រីប៉ុស្តិ៍នគរបាលចរាចរ លោក កៅ សំអុល ដែលបានទះកំផ្លៀងស្ត្រីម្នាក់ជាគ្រូពេទ្យ ដែលជិះម៉ូតូមិនពាក់មួកសុវត្ថិភាព។
លោក ជួន សុវណ្ណ បញ្ជាក់ក្នុងលិខិតថា ការសម្រេចផ្អាកការងារបណ្ដោះអាសន្ននេះ ដោយសារតែលោក អនុសេនីយ៍ទោ កៅ សំអុល ឋានៈជាមន្ត្រីប៉ុស្តិ៍នគរបាលរដ្ឋបាលទួលស្វាយព្រទី១ ចំណុះអធិការដ្ឋាននគរបាលខណ្ឌចំការមន បញ្ចេញអកប្បកិរិយា និងពាក្យសម្ដីគ្មានសីលធម៌ អមនុស្សធម៌ ខ្វះសុជីវធម៌ ដែលជាហេតុធ្វើឲ្យបាត់បង់កិត្តិយសសេចក្ដីថ្លៃថ្នូរនៃនគរបាលជាតិ។
តាមរយៈលិខិត ស្នងការរាជធានីភ្នំពេញ បានដាក់បញ្ជាយ៉ាងដូច្នេះថា៖«សាមីខ្លួន ត្រូវមកបង្ហាញវត្តមាន នៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុស ហើយនិងរង់ចាំការសម្រេចជាថ្មី។ អ្នកពាក់ព័ន្ធ ក៏ដូចជាលោក កៅ សំអុល ត្រូវអនុវត្តតាមលិខិតបង្គាប់នេះ»។
សូមរម្លឹកថា ស្ត្រីឈ្មោះឌី លីណា ជាគ្រូពេទ្យ បានជិះម៉ូខុសច្បាប់ចរាចរណ៍ ដោយមិនពាក់មួកសុវត្ថិភាព ហើយត្រូវប៉ូលិសប៉ុស្តិ៍រដ្ឋបាលទួលស្វាយព្រៃទី១ ឃាត់ឲ្យឈប់ ដើម្បីផាកពិន័យ នៅកាច់ជ្រុងផ្សារអូឡាំពិក កាលពីថ្ងៃទី២១ ខែឧសភា ឆ្នាំ២០១៨។
បើតាមវីដេអូ ដែលថតដោយប្រជាពលរដ្ឋ ហើយត្រូវបានបង្ហោះលើបណ្តាញសង្គមហ្វេសប៊ុក លោក កៅ សំអុល បានទះកំផ្លៀងស្ត្រីខាងលើ ហើយសមត្ថកិច្ចផ្សេងទៀត បានព្យាយាមយកម៉ូតូរបស់នាង ទៅចតកន្លែងចាំផាកពិន័យ។ មុនពេលយកម៉ូតូទៅទុកកន្លែងចាំផាកពិន័យ មានការប្រកែកតវ៉ាគ្នា រវាងអ្នកគ្រូពេទ្យ ឌី លីណា និងសមត្ថកិច្ច។
បើតាមវីដេអូមួយផ្សេងទៀត លោក កៅ សំអុល បាននិយាយ៖«មើលគាត់ជិះម៉ូតូមិនពាក់មួកសុវត្ថិភាព។ គាត់ ជាជើងខ្លាំងអូឡាំពិក មានមួកហើយមិនពាក់»។ លោក ក៏អះអាងទៀតថា អ្នកគ្រូពេទ្យនោះ ជិះម៉ូតបុកសមត្ថកិច្ច ដែលកំពុងឈរចាំចាប់អ្នកខុសច្បាប់ចរាចរណ៍៕
Tag:
ជួន សុវណ្ណ
កៅ សំអុល
ឌី លីណា
© រក្សាសិទ្ធិដោយ thmeythmey.com