អន្តរជាតិ
នយោបាយអន្តរជាតិ
មហាធៀ កាត់ប្រាក់ខែសមាជិកគណៈរដ្ឋមន្ត្រី ១០ភាគរយ ដើម្បីរួមចំណែកដោះស្រាយបញ្ហាហិរញ្ញវត្ថុសាធារណៈ
សមាជិកគណៈរដ្ឋមន្ត្រីថ្មីម៉ាឡេស៊ី (រូបភាព៖ twitter ផ្លូវការរបស់នាយករដ្ឋមន្ត្រី មហាធៀ)
×![]()
នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ បានថ្លែងក្រោយកិច្ចប្រជុំគណៈរដ្ឋមន្ត្រីលើកដំបូងថ្ងៃពុធទី ២៣ ខែឧសភាថា ប្រាក់បៀវត្សរ៍សមាជិករដ្ឋាភិបាលគឺត្រូវបន្ថយ ១០ ភាគរយ។ នេះជាផ្នែកមួយនៃគោលនយោបាយរឹតត្បិតការចាយវាយរបស់រដ្ឋាភិបាលថ្មីដើម្បីដោះស្រាយបញ្ហាហិរញ្ញវត្ថុសាធារណៈ។
ប្រាក់បៀវត្សរ៍របស់រដ្ឋមន្ត្រីជាសមាជិកគណៈរដ្ឋមន្ត្រីម៉ាឡេស៊ីទាំងអស់នឹងត្រូវកាត់បន្ថយ ១០ភាគរយ។ នេះជាការប្រកាសរបស់នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ ក្នុងសន្និសីទសារព័ត៌មានក្រោយជួបប្រជុំជាមួយសមាជិកគណៈរដ្ឋមន្ត្រីថ្មីលើកដំបូង។
បើតាមការចុះផ្សាយរបស់សារព័ត៌មានម៉ាឡេស៊ី Malaysiakini លោក មហាធៀ បានថ្លែងថា ការបន្ថយប្រាក់ខែរដ្ឋមន្ត្រីជាផ្នែកមួយនៃចំណាត់ការចាយវាយត្បិតត្បៀតរបស់រដ្ឋាភិបាលលោក ដោយសារលោកបារម្ភពីបញ្ហាហិរញ្ញវត្ថុសាធារណៈ និងការចាយវាយខុសគោលដៅ។
លោកបានថ្លែងដូច្នេ៖« វាបង្ហាញឲ្យឃើញថា យើងបារម្ភពីបញ្ហាហិរញ្ហាហរិញវត្ថុរបស់រដ្ឋាភិបាល។ បច្ចុប្បន្ននេះវាមានមន្ត្រីរដ្ឋាភិបាលខ្លះទទួលបានប្រាក់បៀវត្សរ៍ច្រើនជាងសមាជិកគណៈរដ្ឋមន្ត្រីទៀត»។
ការប្រកាសបន្ថយប្រាក់ខែសមាជិកគណរដ្ឋមន្ត្រីនេះធ្វើឡើងត្រឹមពីរថ្ងៃប៉ុណ្ណោះក្រោយពេលដែល លោ មហាធៀ រិះគន់រដ្ឋាភិបាលលោក ណាជីប រ៉ាហ្សាក់ ដែលធ្វើឲ្យបំណុលរដ្ឋកើនឡើងដល់កម្រិតប្រកាសអាសន្ន។ បច្ចុប្បន្ន បំណុលសាធារណៈរបស់ម៉ាឡេស៊ីកើនដល់ មួយទ្រីលានរីងហ្គីត ពោលគឺប្រហាក់ប្រហែលនឹង ២៥១ ពាន់លានដុល្លារអាមេរិកឯណោះ។
ត្រឡប់មកវិញ បើតាមរបាយការណ៍របស់ Malaysia Insiders ឆ្នាំ ២០១៥ សមាជិកគណៈរដ្ឋមន្ត្រីបានទទួលប្រាក់ខែដូចតទៅ៖ នាយករដ្ឋមន្ត្រីបានទទួលប្រាក់ខែសរុបប្រហែល ៣៩០០០ រីងហ្គីត (៩៨០០ ដុល្លារអាមេរិក) ក្នុងនោះមានប្រាក់ខែជាប្រមុខរដ្ឋាភិបាល ២៣០០០ រីងហ្គីត បូកប្រាក់ខែសមាជិកសភាចំនួន ១៦០០០ រីងហ្គីត។
ឧបនាយករដ្ឋមន្ត្រីបានទទួលប្រាក់ខែសរុបចំនួនប្រហែល ៣៤០០០ រីងហ្គីត (៨៦០០ ដុល្លារអាមេរិក) ក្នុងនោះមានប្រាក់ខែជាឧបនាយករដ្ឋមន្ត្រី ១៨០០០រីងហ្គីត បូកប្រាក់ខែជាតំណាងរាស្ត្រ ១៦០០០ រីងហ្គីត។
ចំណែករដ្ឋមន្ត្រីវិញនោះបានទទួលប្រាក់ខែសរុបប្រហែល ៣១០០០ រីងហ្គីត (៧៨០០ដុល្លារអាមេរិក) ក្នុងនោះប្រាក់ខែជារដ្ឋមន្ត្រីចំនួន ១៥០០០ រីងហ្គីត និង ប្រាក់ខែជាដំណាងរាស្ត្រចំនួន ១៦០០០ រីងហ្គីត៕
Tag:
មហាធៀ មហាម៉ាត់
ហិរញ្ញវត្ថុសាធារណៈ
ម៉ាឡេស៊ី
© រក្សាសិទ្ធិដោយ thmeythmey.com
