អន្តរជាតិ
ការទូតដុល្លារធ្វើឲ្យតៃវ៉ាន់នៅសល់កល្យាណមិត្តតែមួយប៉ុណ្ណោះប្រចាំតំបន់អាហ្វ្រិក
× រដ្ឋាភិបាលនៃប្រទេសតំបន់អាហ្វ្រិក ប៊ូគីណា ហ្វាសូ នៅថ្ងៃ២៤ ឧសភា បានអះអាងថា បានផ្តាច់ទំនាក់ទំនងជាមួយនឹងរដ្ឋាភិបាលតៃវ៉ាន់ជាផ្លូវការហើយ។ ការចាកចេញនេះ ធ្វើឡើង ក្រោមហេតុផលថា ដើម្បីផ្លាស់ប្តូរជំហរប្រទេសឲ្យស្របតាមនិន្នាការពិភពលោក ក៏ដូចជាដើម្បីដោះស្រាយបញ្ហាប្រឈមរបស់ប្រទេសផងដែរ។
រយៈពេលមិនដល់មួយខែផងនោះ រដ្ឋាភិបាលតៃវ៉ាន់ បានបាត់បង់សម្ព័ន្ធភាពការទូតរហូតដល់ពីរប្រទេស ខណៈកល្យាណមិត្ត ដែលនៅទទួលស្គាល់តៃវ៉ាន់ ថាជាប្រទេស កាន់តែតិចទៅៗស្រាប់នោះ ។ ប្រទេស ដែលទើបតែផ្តាច់ការទូតជាមួយនឹងតៃវ៉ាន់រួមមាន ប៊ូគីណា ហ្វាសូ ដែលទើបតែប្រកាសនៅថ្ងៃ ២៤ ឧសភា និង សាធារណរដ្ឋដូមីនិក នៅថ្ងៃ០១ ឧសភា ឆ្នាំ២០១៨នេះ។
ការសម្រេចចាកចេញរបស់រដ្ឋក្រីក្រតំបន់អាហ្វ្រិក ប៊ូគីណា ហ្វាសូ ធ្វើឲ្យតៃវ៉ាន់ នៅសល់សម្ព័ន្ធភាពការទូតជាមួយនឹងបណ្តាប្រទេស និងរដ្ឋ ១៨ ទៀតប៉ុណ្ណោះ ដែលចំនួននេះ ពិតជាធ្វើឲ្យការទូតតៃវ៉ា់ន់ កាន់តែផុយស្រួយខ្លាំង។
ក្នុងចំណោមរដ្ឋទាំង១៨នោះរួមមាន នៅតំបន់អាស៊ីខាងកើត និងប៉ាស៊ីហ្វិក ដូចជា គីរីបាទី, កោះសាធារណរដ្ឋម៉ាហ្សាល់ ,ណូរូ , សាធារណរដ្ឋប៉ាឡោ, កោះសូឡូមុន និង ទូវ៉ាលូ ។ នៅអាហ្វ្រិកវិញ នៅសល់តែមួយប្រទេសប៉ុណ្ណោះ ដែលនោះគឺ ប្រទេសស្វាស៊ីឡង់ ដែលទើបប្តូរឈ្មោះទៅជា «រាជាណាចក្រ អ៊ីស្វាទីនី ខណៈអឺរ៉ុបមានតែមានរដ្ឋទទួលស្គាល់តៃវ៉ាន់ គឺ Holy See ។
ដោយឡែកសម្រាប់តំបន់ អាមេរិកឡាទីន និងខារ៉ាប៊ីន ជាតំបន់ ដែលនៅមានប្រទេសទទួលស្គាល់តៃវ៉ាន់ច្រើនគេ រួមមាន បេលី , អែលសាល់វ៉ាឌ័រ , ក្វាតេម៉ាឡា , ហៃទី , សាធារណរដ្ឋហុងឌូរ៉ា , នីការ៉ាហ្កា ប៉ារ៉ាហ្កាយ , Kitts and Nevis, សាំងលូសី និង St. Vincent & the Grenadines ។
ជុំវិញនៃការចាកចេញរបស់បណ្តាសម្ព័ន្ធមិត្តជាបន្តបន្ទាប់នេះ ពិតប្រាកដណាស់ ថា បានវាយប្រហារយ៉ាងខ្លាំងមកលើទំនាក់ទំនងការទូតតៃវ៉ាន់ទៅលើឆាកអន្តរជាតិ ខណៈមុខសញ្ញាសំខាន់នៃវិបត្តិការទូតតៃវ៉ាន់ ត្រូវបានមើលឃើញថា ជាការទទួលខុសត្រូវរបស់ចិន។ តែយ៉ាងណាក៏ដោយ មេដឹកនាំតៃវ៉ាន់ ក៏បានសន្យាមិនតបតចំពោះចិនវិញឡើយ។
« ចិន បានព្យាយាមគ្រប់គ្រងសង្គមតៃវ៉ាន់ ក៏ប៉ុន្តែ យើងមិនតបតអ្វីវិញឡើយ ពោលគឺ យើង នឹងកាន់តែប្តេជ្ញាចិត្តបន្ថែមដើម្បីផ្សារភ្ជាប់ខ្លួនជាមួយនឹងពិភពលោក។ តៃវ៉ាន់ ក៏មិនប្រើប្រាស់ ការទូតដុល្លារ ដើម្បីប្រកួតប្រជែងជាមួយនឹងចិន ក្នុងការសាបព្រោះទំនាក់ទំនងជាមួយនឹងសម្ព័ន្ធមិត្តផងដែរ » ។ នេះគឺសេចក្តីថ្លែងការណ៍របស់ប្រធានាធិបតីតៃវ៉ាន់ ក្រោយពីការប្រកាសកាត់ផ្តាច់ទំនាក់ទំនងរបស់ប៊ូគីណា ហ្វាសូ ៕
Tag:
តៃវ៉ាន់
ចិន
ការទូត
© រក្សាសិទ្ធិដោយ thmeythmey.com