ដល់ឆ្នាំ២០៣០ ពលរដ្ឋកម្ពុជាត្រូវការលំនៅដ្ឋានចំនួនជាង១លានបន្ថែមទៀត

ជាតិ

សេដ្ឋកិច្ច

ដល់ឆ្នាំ២០៣០ ពលរដ្ឋកម្ពុជាត្រូវការលំនៅដ្ឋានចំនួនជាង១លានបន្ថែមទៀត

26, May 2018 , 11:30 am

រូបភាព

ដោយ: ថ្មីៗ

សភាពាណិជ្ជកម្មអឺរ៉ុបនៅកម្ពុជា (EuroCham) បានរៀបចំវេទិកាពិភាក្សាអាហារពេលព្រឹកមួយនាថ្ងៃទី២៤ខែឧសភានៅអគារធនាគារ BRED ទាក់ទងនឹងប្រធានបទ គេហដ្ឋានតម្លៃសមរម្យនៅកម្ពុជា (Affordable housing in Cambodia)។ សហស្ថាបនិកនៃក្រុមហ៊ុន Arakawa និងតំណាងក្រុមហ៊ុនគ្រប់គ្រងតំបន់សេដ្ឋកិច្ចពិសេសភ្នំពេញ រួមទាំងតំណាងអង្គការ UNDP ត្រូវបានអញ្ជើញឲ្យធ្វើជាវាគ្មិនដើម្បីចែករំលែកព័ត៌មានទាក់ទងនឹងគម្រោងសាងសង់ផ្ទះតម្លៃសមរម្យ និងមានចីរភាព។

ពីពេលនេះដល់ឆ្នាំ២០៣០ ពលរដ្ឋកម្ពុជាត្រូវការគេហដ្ឋាន១លានទៀត ជាពិសេសគេហដ្ឋានដែលមានតម្លៃសមរម្យ។ នេះបើតាមយោងតាមការសិក្សារបស់រដ្ឋាភិបាលស្តីពីគោលនយោបាយជាតិស្តីពីលំនៅដ្ឋានឆ្នាំ២០១៤។ នៅឆ្នាំ២០១៤នោះ កម្ពុជាបានអនុម័តគោលនយោបាយលំនៅដ្ឋាន ហើយក៏បានបង្កើតអគ្គនាយកដ្ឋានលំនៅដ្ឋានដែលចំណុះឲ្យក្រសួងដែនដី នគរូបនីយកម្ម និងសំណង់។ នៅក្នុងឆ្នាំ២០១៧ កម្មវិធីថ្នាក់ជាតិសម្រាប់ការអភិវឌ្ឍលំនៅដ្ឋានសមរម្យត្រូវបានអនុវត្ត ដោយក្រុមហ៊ុន Worldbridge បានសម្ពោធគម្រោងតម្លៃ១០០លានដុល្លារដើម្បីសង់លំនៅដ្ឋានតម្លៃសមរម្យសម្រាប់មន្ត្រីរាជការនៅទីក្រុងតាខ្មៅ និងក្រុមហ៊ុន Arakawa បានសម្ពោធគម្រោងតម្លៃ៧០លានដុល្លារដើម្បីសាងសង់គេហដ្ឋានសម្រាប់អ្នកចំណូលទាបនៅក្នុងខណ្ឌសែនសុខ។

បើយោងតាមការទស្សន៍ទាយអំពីតម្រូវការលំនៅដ្ឋានក្នុងពេលអនាគត វិស័យសំណង់ និងអចលនទ្រព្យនៅតែរស់រវើកនៅកម្ពុជា។ កាលពីថ្ងៃទី២៤ខែឧសភា EuroCham បានរៀបចំការពិភាក្សាអាហារពេលព្រឹកមួយ ដើម្បីបើកឱកាសឲ្យអ្នកជំនួញវិស័យសំណង់ចែករំលែកព័ត៌មានក្នុងគម្រោងគេហដ្ឋានតម្លៃសមរម្យនេះ។ នៅក្នុងសាលប្រជុំនៃអគារធនាគារ BRED អ្នកជំនួញក្នុងវិស័យសំណង់ជាង១០០នាក់ បានជួបជុំគ្នាដើម្បីស្តាប់ពិសោធន៍នៃគម្រោងសាង់សង់ផ្ទះតម្លៃសមរម្យរបស់ក្រុមហ៊ុន Arakawa និងក្រុមហ៊ុនតំបន់សេដ្ឋកិច្ចពិសេសភ្នំពេញ និងគោលនយោបាយអភិវឌ្ឍន៍លំនៅដ្ឋានសមរម្យដែលឆ្លើយតបនិងគោលនយោបាយចីរភាពរបស់អង្គការសហប្រជាជាតិ។

សភាពាណិជ្ជកម្មអឺរ៉ុបប្រចាំកម្ពុជា EuroCham Cambodia តែងរៀបចំកិច្ចពិភាក្សាលើប្រធានបទជាច្រើនទាក់ទងនឹងការអភិវឌ្ឍន៍ និងបញ្ហាដែលកើតមាននៅក្នុងវិស័យនានានៅក្នុងប្រទេសកម្ពុជាដោយមានការចែករំលែកពិសោធន៍ និងចំណេះដឹងពីក្រុមអ្នកជំនាញនៅក្នុងប្រទេស និងក្នុងតំបន់៕