លោក ភា សុភក្ត្រា គ្រូបង្វឹកទ័ព ព្រមទទួលយកការពិន័យ៤ប្រកួត ទាំងមិនអស់ចិត្ត

កីឡាជាតិ

ជាតិ

លោក ភា សុភក្ត្រា គ្រូបង្វឹកទ័ព ព្រមទទួលយកការពិន័យ៤ប្រកួត ទាំងមិនអស់ចិត្ត

26, May 2018 , 4:04 pm

រូបភាព

ដោយ:

លោក ភា សុភក្ត្រា គ្រូបង្វឹកក្រុមក្រសួងការពារជាតិ(ទ័ព) ហាក់មិនពេញចិត្តចំពោះការសម្រេចរបស់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា ដែលពិន័យមិនឲ្យលោកដឹកនាំក្រុម៤ប្រកួតក្នុងក្របខណ្ឌកំពូលកម្ពុជា។ មិនត្រឹមតែប៉ុណ្ណោះ គ្រូបង្វឹករូបនេះ បានចាត់ទុកការពិន័យនេះថា បានបំផ្លើសការពិត ព្រោះលោកមិនបានប្រព្រឹត្តបែបនេះឡើយ។

គ្រូបង្វឹកក្រុមក្រសួងការពារជាតិ លោក ភា សុភក្ត្រា ព្រមទទួលយកការសម្រេចរបស់គណៈកម្មការវិន័យនៃសហព័ន្ធសហព័ន្ធកីឡាបាល់ទាត់កម្ពុជាទាំងមិនសប្បាយចិត្ត ពាក់ព័ន្ធការពិន័យមិនឲ្យដឹកនាំក្រុម៤ប្រកួតក្នុងពានរង្វាន់លីគកំពូលកម្ពុជា។ លោក សុភក្ត្រា ត្រូវបានគណៈកម្មការវិន័យចោទប្រកាន់ពីបទមិនទទួលស្គាល់ការសម្រេច និងជេរប្រមាថមន្ត្រីការប្រកួតតាមមាត្រា៤៧ និង៤៩នៃក្រមសីលធម៌ និងវិន័យ។

ទោះបីគ្រូបង្វឹករូបនេះ សម្រេចមិនប្តឹងឧទ្ធរណ៍ទៅកាន់គណៈកម្មការឧទ្ធរណ៍នៃសហព័ន្ធបាល់ទាត់ក៏ពិតមែន។ ប៉ុន្តែលោកហាក់មិនពេញចិត្តចំពោះការសម្រេចរបស់គណៈកម្មការវិន័យ និងបានចាត់ទុកការចោទប្រកាន់នេះថា បានបំផ្លើសការពិត។ លោកបានអះអាងថា លោកមិនបានប្រព្រឹត្តដូចទៅនឹងអ្វី ដែលបានចោទប្រកាន់នោះឡើយ។

ក្នុងបទសម្ភាសតាមទូរស័ព្ទជាមួយសារព័ត៌មាន Thmey Thmey លោកបានរៀបរាប់យ៉ាងដូច្នេះថា៖«ការចោទប្រកាន់របស់គណៈកម្មការវិន័យ វាជាការបំផ្លើសទាំងស្រុង ព្រោះខ្ញុំមិនបានប្រើប្រាស់ពាក្យពេចន៍ជេរប្រមាថលើមន្ត្រីការប្រកួតនោះទេ ខ្ញុំហ៊ានស្បត់ក៏បាន»។

ការពិន័យខាងលើកើតឡើងក្នុងអំឡុងពេលជំនួបរវាងក្រុមក្រសួងការពារជាតិជាមួយក្រុមវិសាខា នាការប្រកួតក្របខណ្ឌកំពូលកម្ពុជាកាលពីថ្ងៃទី១៩ ឧសភា នៅកីឡដ្ឋានវេស្ទើនភ្នំពេញ។ ដោយកាលនោះក្រុមវិសាខាបានយកឈ្នះក្រសួងការពារជាតិក្នុងលទ្ធផល ២-០។

តាមរយៈការពិន័យនេះ លោក ភា សុភក្ត្រា មិនអាចដឹកនាំក្រសួងការពារជាតិប្រជែងតទល់ជាមួយណាហ្គាវើល សម្រាប់ជំនួបសប្តាហ៍ទី៧នៃលីគកំពូលកម្ពុជាបាននោះឡើយនៅកីឡដ្ឋានស្តាតចាស់នាវេលាម៉ោង៦ល្ងាចថ្ងៃទី២៦ ឧសភានេះ។ ក្រៅពីជំនួបដ៏ជក់ចិត្តនេះ ក៏មានការប្រកួតពីរទៀតផងដែរ ក្នុងនោះសូលទីឡូអង្គរប្រើកីឡដ្ឋានស្តាតចាស់ស្វាគមន៍ព្រះខ័នរាជស្វាយរៀងនៅម៉ោង៣រសៀល ខណៈអគ្គិសនីបើកទ្វារកីឡដ្ឋានអគ្គិសនីស្វាគមន៍ភ្ញៀវបឹងកេត៕