King Track Circuit បានរៀបចំការប្រណាំងម៉ូតូ ដើម្បីឈ្នះពានរង្វាន់ SK ZIC Championsលើកដំបូងនៅកម្ពុជា
30, May 2018 , 10:53 am
រូបភាព
×
ដោយ:
King Track Circuit បានរៀបចំការប្រណាំងម៉ូតូ លើកដំបូង នៅកម្ពុជា ដើម្បីឈ្នះពានរង្វាន់ SK ZIC Champions និងដើម្បីជួយជំរុញដល់យុវវ័យដែលស្រឡាញ់ម៉ូតូធំ ឲ្យចូលរួមលើកស្ទួយវិស័យកីឡានៅកម្ពុជាផងដែរ។
ព្រឹត្តិការណ៍នេះ ប្រព្រឹត្តទៅកាលពីថ្ងៃទី២៦ និងទី២៧ ខែឧសភា កន្លងទៅ ដោយមានការអញ្ជើញចូលរួមពី លោក មៀច សុផាណា ប្រធានសហព័ន្ធយានយន្តកម្ពុជា ដោយលោក បានចែកពានរង្វាន់ដល់កីឡាករ Class A និង Class B ផងដែរ ។ នៅក្នុងឱកាសនោះ លោក មៀច សុផាណា ប្រធានសហព័ន្ធយានយន្តកម្ពុជា បានគូសបញ្ជាក់ថា៖« យើងគ្រប់គ្នាតែងតែលើទឹកចិត្ត និងគាំទ្រដល់កីឡាករប្រណាំងម៉ូតូទាំងអស់ចូលរួមប្រកួត និងលើកស្ទួយវិស័យម៉ូតូធំ ថែមជួយពង្រឹងសមត្ថភាពកីឡាករទាំងអស់ ដើម្បីចូលរួមប្រកួតយកពានរង្វាន់នៅក្រៅប្រទេស»។
កីឡាករ សុខសួន អរុណ នៅក្នុង ក្រុម Class A ដែលមានក្រុមឈ្មោះថា ២ wheel racing team open បានរៀបរាប់ ខ្លួនទទួលបានបទពិសោធន៍ថ្មីៗជាច្រើនពីការប្រកួតលើកនេះ។ បើតាម កីឡាករ ដដែល ក្រុមរបស់គេ បានចេញទៅប្រកួតនៅប្រទេសវៀតណាមចំនួន ២ដងមកហើយ ដោយទទួលបានចំណាត់ថ្នាក់លេខ៤ ទៅលេខ៩។ ចំពោះការប្រកួតលើកនេះ ក្រុមរបស់គាត់មានសមាជិកក្រុមចំនួន៣ ដែលប្រណាំងឈ្នះពានរង្វាន់ លេខ ១, ២ និងលេខ ៣ ។
សូមជម្រាបថា គោលការណ៍ក្នុងការចូលរួមប្រកួតក្នុងព្រឹត្តិការណ៍នេះមានដូចជា៖
១. Class A (ម៉ូតូកែច្នៃ/Open Class/១៥0cc) គឺជាប្រភេទម៉ូតូកែច្នៃ អាចបំពាក់គ្រឿងបន្លាស់បាន និងមិនត្រូវបានហាមប្រាម ក្នុងការកែច្នៃផ្សេងឡើយ។
២. Class B (អំប្រ៊ីតយ៉ា/Manual Clutch/១៥0cc) សាមី ពីស្តុង អាចប្តូរបានតែត្រូវការរក្សាទំហំ ៥៧mm។ ចំណែកសូប៉ាប់ ខ្នើយវ៉ាឡង់ យ៉េន និងឡាកាម នៅរក្សាទំហំដដែល។ ក្រៅពីចំណុចហាមប្រាមខាងលើ គឺអាចផ្លាស់ប្តូរបាន។
៣. Class C (អំប្រ៊ីយ៉ា/Manual Clutch/១២៥cc) មិនអនុញ្ញាតឲ្យកែគ្រឿងម៉ាស៊ីនវ៉ាឡង់ភ្លើង សូប៉ាប់ ខ្នើយ ECU និងយ៉េន។ ចំពោះរង្វង់កង់ គឺត្រូវតែរក្សារង្វង់ ១៤ ដូចគ្នាទាំងអស់។ ក្រៅពីចំណុចហាមប្រាមខាងលើគឺអាចផ្លាស់ប្តូរបាន។
៤. Class D(លេខអូតូ/Auto/១១០-១២៥cc) មិនអនុញ្ញាតឲ្យកែច្នៃគ្រឿងម៉ាស៊ីន និងគ្រឿងភ្លើងទាំងអស់។
៥. Class D (ចង្កឹះលេខ/Manual/១១០-១២៥cc) មិនអនុញ្ញាតឲ្យកែច្នៃគ្រឿងម៉ាស៊ីន និងគ្រឿង ភ្លើងទាំងអស់៕