កីឡាជាតិ៖ មហាផ្ទៃឈរចំណាត់ថ្នាក់លេខ១ នាការប្រកួតគុនល្បុក្កតោថ្ងៃដំបូង

កីឡាជាតិ

ជាតិ

កីឡាជាតិ៖ មហាផ្ទៃឈរចំណាត់ថ្នាក់លេខ១ នាការប្រកួតគុនល្បុក្កតោថ្ងៃដំបូង

03, Jun 2018 , 7:59 pm

រូបភាព

ដោយ: ថ្មីៗ

កីឡាគុនល្បុក្កតោបានចាប់ផ្តើមការប្រកួតថ្ងៃដំបូងរបស់ខ្លួនក្នុងព្រឹត្តិការណ៍កីឡាជាតិលើកទី២កាលពីថ្ងៃទី១ មិថុនា ឆ្នាំ២០១៨ ដោយក្រុមអត្តពលិកក្រសួងមហាផ្ទៃដណ្តើមបានមេដាយមាសច្រើនជាងគេ ដើម្បីឈរចំណាត់ថ្នាក់លេខ១បណ្តោះអាសន្នក្នុងតារាងមេដាយ។ ចំណែកអត្តពលិករាជធានីភ្នំពេញ និងខេត្តកណ្តាលឈរពីក្រោយជាបន្តបន្ទាប់។

ក្រសួងមហាផ្ទៃបានឈរចំណាត់ថ្នាក់លេខ១ នាការប្រកួតកីឡាគុនល្បុក្កតោថ្ងៃដំបូងក្នុងព្រឹត្តិការណ៍កីឡាជាតិលើកទី២ ក្រោយអត្តពលិករបស់ខ្លួនដណ្តើមបានមេដាយមាស២ និងប្រាក់២។ នាការប្រកួតនៅថ្ងៃទី១ ខែមិថុនា នៅអគារដំបូលក្នុងពហុកីឡដ្ឋានជាតិមរតកតេជោ កីឡាករ អៃ សំអុន រកបានមេដាយមាស១សម្រាប់ក្រសួងមហាផ្ទៃលើវិញ្ញាសាទ្វារមេគុនដៃ មុនកីឡាការិនី ស៊ិន សៀវសៀន រកបានមេដាយមាស១បន្ថែមលើវិញ្ញាសាទ្វារមេគុនអាវុធឥតមុខ។

កីឡាករកីឡាការិនីទាំងពីររូបនេះ ក៏ជាអ្នករកមេដាយប្រាក់សម្រាប់ក្រសួងមហាផ្ទៃផងដែរ ក្នុងនោះ កីឡាការិនី ស៊ិន សៀវសៀនរកបានលើវិញ្ញាសាទ្វារមេគុនដៃឯកត្តជន កីឡាករ អៃ សំអុន រកបានលើវិញ្ញាសាទ្វារមេគុនអាវុធឥតមុខ។

រាជធានីភ្នំពេញបានឈរចំណាត់ថ្នាក់លេខ២ ក្រោយអត្តពលិករកបានមេដាយមាស១ និងសំរឹទ្ធ២។ ក្នុងនោះមេដាយមាសរកបានដោយកីឡាការិនី មឿន សុម៉ាលី លើវិញ្ញាសាទ្វារមេគុនដៃឯកត្តជន ខណៈមេដាយសំរឹទ្ធរកបានលើវិញ្ញាសាទ្វារមេគុនអាវុធឥតមុខដោយកីឡាករ នឹម រចនា និងវិញ្ញាសាទ្វារមេគុនអាវុធឥតមុខដោយកីឡាការិនី មឿន សុម៉ាលី។

ខេត្តកណ្តាលបានឈរចំណាត់ថ្នាក់លេខ៣ ក្រោយកីឡាករ ពក ផល្លី រកបានមេដាយមាស១លើវិញ្ញាសាទ្វារមេគុនអាវុធឥតមុខ។ សម្រាប់ការប្រកួតនៅថ្ងៃនោះដែរ អត្តពលិកខេត្តសៀមរាបដណ្តើមបានមេដាយប្រាក់១ និងសំរឹទ្ធ១ រីឯខេត្តព្រៃវែងទទួលបានមេដាយប្រាក់១ ខណខេត្តកំពតទទួលបានមេដាយសំរឹទ្ធ១៕