ការព្រមានរបស់លោកស្រី Julie Heckscher មន្ត្រីក្រសួងការបរទេសអូស្ត្រាលី ដែលចង់ឲ្យរដ្ឋាភិបាលរបស់លោកស្រី បិទទិដ្ឋាការមកឲ្យមន្ត្រីកម្ពុជា ព្រមទាំងមិនទទួលស្គាល់លទ្ធផលបោះឆ្នោត មិនមានទម្ងន់ ដែលធ្វើឲ្យរដ្ឋាភិបាលកម្ពុជា ព្រួយបារម្ភនោះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា យល់ឃើញថា ការលើកឡើងរបស់មន្ត្រីអូស្ត្រាលីពីការដាក់ទណ្ឌកម្មមកលើរដ្ឋាភិបាលកម្ពុជា គឺគ្រាន់តែជាសិទ្ធិបញ្ចេញមតិរបស់បុគ្គលប៉ុណ្ណោះ។ តាមរយៈសារ ដែលសរសេរក្នុងបណ្តាញទំនាក់ទំងតេឡេក្រាម លោក បានសង្កត់ធ្ងន់ថា ការបញ្ចេមតិនេះ មិនមានប្រសិទ្ធភាពមកលើឯករាជ្យនិងអធិបតេយ្យភាពរបស់កម្ពុជាឡើយ។
បន្ទាប់មក អ្នកនាំពាក្យគណបក្សកាន់អំណាច ក៏ចំអកឲ្យក្រុមប្រឆាំងថា រង់ចាំទទួលផលពីការដាក់ទណ្ឌកម្មរបស់អូស្ត្រាលីមកលើកម្ពុជា។
ចំណែកលោក ផៃ ស៊ីផាន អ្នកនាំពាក្យទីស្តីកាគណៈរដ្ឋមន្ត្រី បកស្រាយថា ការលើកឡើងរបស់មន្ត្រីអូស្ត្រាលី មិនមែនជាជំហរឬក៏ជាគោលការណ៍របស់រដ្ឋាភិបាលអូស្ត្រាលីនោះទេ។ ដូច្នេះ លោក ជឿថា ការព្រមាននេះ មិនអាចមានឥទ្ធិពលឬធ្វើឲ្យប៉ះពាល់ដល់ទំនាក់ទំនងរវាងរដ្ឋាភិបាលកម្ពុជានិងរដ្ឋាភិបាលអូស្ត្រាលីឡើយ។
លើសពីនេះ លោក ក៏បានឆ្លើយតបនឹងមន្ត្រីអូស្ត្រាលីថា អ្វីដែលកម្ពុជាធ្វើ គឺស្របទៅតាមច្បាប់របស់ខ្លួន។ មន្ត្រីជាន់ខ្ពស់របស់រដ្ឋាភិបាលរូបនេះ ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«យើងមិនធ្វើតាមបង្គាប់របស់បរទេសណាទេ ក្រៅតែពីច្បាប់និងស្ថាប័នជាតិរបស់យើង»។
លោកស្រី Julie Heckcher បានលើយកបញ្ហាកម្ពុជា ទៅនិយាយក្នុងព្រឹទ្ធសភាអូស្ត្រាលី កាលពីពេលថ្មីៗនេះ។ លោកស្រី ផ្តោតខ្លាំងលើការបោះឆ្នោតនៅកម្ពុជា ដែលគ្មានគណបក្សប្រឆាំង ។
ការបោះឆ្នោតនៅកម្ពុជាក្នុងអាណត្តិនេះ ហាក់ធ្វើឲ្យសហគមន៍អន្តរជាតិមួយចំនួន មិនសូវសាទរនោះទេ ដ្បិតតែមិនមានគណបក្សប្រឆាំង។ សហរដ្ឋអាមេរិក បានព្រមានមុនអូស្ត្រាលីទៅទៀតថា នឹងបង្កកទ្រព្យសម្បត្តិរបស់មន្ត្រីកម្ពុជា ដែលផ្ញើនៅសហរដ្ឋអាមេរិក និងហាមមិនឲ្យជាន់ទឹកដីអាមេរិក។
សហរដ្ឋអាមេរិក បានបញ្ឈប់ការគាំទ្រដល់ដំណើរការបោះឆ្នោត ដោយហៅការបោះឆ្នោតនៅកម្ពុជា ថាមានលក្ខណប្រជាធិបតេយ្យ។ ឯសហភាពអឺរ៉ុបវិញ ក៏ចូលរួមដាក់សម្ពាធមកលើរដ្ឋាភិបាលកម្ពុជាដែរ។
យ៉ាងណាដ៏ដោយ ដំណើរការបោះឆ្នោតនៅកម្ពុជា នៅតែទទួលបានគាំទ្រពីបណ្តាប្រទេសផ្សេងៗ ដូចជាជប៉ុន ចិន និងឥណ្ឌា ជាដើម៕