ឥណ្ឌូណេស៊ី ម៉ាឡេស៊ី និងហ្វីលីពីន គ្រោងធ្វើសមយុទ្ធរួមគ្នាដើម្បីទប់ទល់ក្រុមសកម្មប្រយុទ្ធក្នុងតំបន់

អន្តរជាតិ

ឥណ្ឌូណេស៊ី ម៉ាឡេស៊ី និងហ្វីលីពីន គ្រោងធ្វើសមយុទ្ធរួមគ្នាដើម្បីទប់ទល់ក្រុមសកម្មប្រយុទ្ធក្នុងតំបន់

04, Jun 2018 , 9:39 pm

រូបភាព

ដោយ:

សមាជិកអាស៊ានបីប្រទេស រួមមានឥណ្ឌូណេស៊ី ម៉ាឡេស៊ី និងហ្វីលីពីន នឹងធ្វើសមយុទ្ធយោធាល្បាតដែនគោករួមគ្នាមួយ ដើម្បីពង្រឹងកិច្ចសហប្រតិបត្តិការ និងសមត្ថភាពយោធាប្រទេសទាំងបីក្នុងគោលដៅទប់ស្កាត់ការងើបឡើងរបស់ក្រុមសកម្មប្រយុទ្ធ ដែលភាគីទាំងបីព្រួយបារម្ភព្រោះសមត្ថភាពពួកគេកាន់តែខ្ពស់ឡើង។

«យើងនឹងរៀបចំលំហាត់យោធារួមគ្នាមួយ ដែលផ្តោតសំខាន់លើការតបតជាមួយនឹងទ័ពព្រៃ និងរបៀបវាយបកជាមួយនឹងក្រុមសកម្មប្រយុទ្ធ»។ នេះគឺជាសេចក្តីថ្លែងការណ៍របស់រដ្ឋមន្ត្រីការពារជាតិឥណ្ឌូណេស៊ីលោក Ryamizard Ryacudu នៅថ្ងៃទី២ ខែមិថុនា បន្ទាប់ពីលោកជួបជាមួយសមភាគីម៉ាឡេស៊ី Mohamad Sabu។

តាមការចុះផ្សាយរបស់សារព័ត៌មាន The Jakarta Post លោករដ្ឋមន្ត្រី Ryamizard ក៏បានលើកឡើងផងដែរថា ក្រុមឧទ្ទាមដែលមានមូលដ្ឋាននៅភាគខាងត្បូងហ្វីលីពីន ពូកែខាងបាញ់ណាស់ ហើយបញ្ហានេះតម្រូវឲ្យប្រទេសទាំងបីរួមមានឥណ្ឌូណេស៊ី ម៉ាឡេស៊ី និងហ្វីលីពីន ពង្រឹងសមត្ថភាពខ្លួនឲ្យកាន់តែខ្លាំងក្លាដើម្បីទប់ទល់ជាមួយនឹងក្រុមទាំងនេះបាន។

ប្រមុខការពារជាតិឥណ្ឌូណេស៊ីដដែលនោះ ក៏បានអះអាងផងដែរថា កន្លងមកដើម្បីទប់ស្កាត់នឹងរីកលូតលាស់របស់ក្រុមឧទ្ទាម ឥណ្ឌូណេស៊ី ក៏បានផ្តួចផ្តើមយន្តការបីភាគីដើម្បីធ្វើសកម្មភាពល្បាតទាំងតាមដែនសមុទ្រ និងទាំងដែនអាកាស ដែលលោក បញ្ជាក់ថាមានប្រសិទ្ធភាពខ្ពស់ក្នុងការកាត់បន្ថយការគំរាមកំហែងលើសន្តិសុខ។

គួរជម្រាបផងដែរ ក្រោយពីក្រុមភេរវជនរដ្ឋឥស្លាមនៅប្រទេសស៊ីរី និងអ៊ីរ៉ាក់ បានថមថយឥទ្ធិពល និងបែកខ្ញែកហើយនោះ តំបន់អាស៊ីអាគ្នេយ៍ ត្រូវបានក្រុមសកម្មប្រយុទ្ធទាំងនោះកំណត់យកជាទីតាំងថ្មីសម្រាប់ពួកគេក្នុងការបោះមូលដ្ឋាន។ យ៉ាងណាមិញតំបន់អាស៊ាននេះមានក្រុមឧទ្ទាមជាច្រើនក្រុម ដែលបានបង្កបញ្ហាសន្តិសុខក្នុងតំបន់រួចជាស្រេចហើយនោះ៕