ពីនេះ ពីនោះ
«ដំឡូងមូល» សំដៅលើមនុស្ស«ឆោត និងល្ងង់»
× សង្គមនីមួយៗ មានមនុស្សច្រើនប្រភេទ ដែលរស់នៅក្នុងកាលៈទេសៈ ស្ថានភាព និងសមត្ថភាពខុសៗគ្នា។ ភាគច្រើនមនុស្សដែលមានទេពកោសល្យ នោះគេជា «មនុស្សពូកែ និងឆ្លាត» តែផ្ទុយទៅវិញ មនុស្សឆោតខ្លៅ អសមត្ថភាព ល្ងង់ គឺជាប្រភេទ «មនុស្សដំឡូងមូល»។ ជាក់ស្តែងមនុស្សដំឡូងមូល ជាមនុស្សដែលគេប្រើទៅណា ទៅហ្នឹង ឲ្យធ្វើអ្វី គឺធ្វើហ្នឹង។
តើមនុស្សដំឡូងមូល មានលក្ខណៈដូចម្តេច? តាមការបកស្រាយរបស់សម្តេចព្រះសង្ឃរាជ ជួន ណាត «មនុស្សដំឡូងមូល» សំដៅលើមនុស្សដែលល្ងង់សុទ្ធសាធ អត់មានចំណេះដឹងក្នុងខ្លួន អត់មានការត្រិះរិះល្អិតល្អន់។ ពាក្យនេះ ត្រូវបានគេនិយមយកមកប្រើតាំងពីទសវត្សរ៍៩០ រួចបន្តរហូតមកដល់បច្ចុប្បន្នផងដែរ។ ហេតុអ្វីបានជាគេប្រៀបធៀបមនុស្សទៅនឹងដំឡូងមូល? ព្រោះគេយល់ថា «ដំឡូងមូល» វាងាយស្រួលនឹងបង្វិល គ្រលែង គប់ រំកិល ទៅទីណាក៏បាន។ ដូច្នេះហើយគេប្រៀបធៀបមនុស្សនឹងដំឡូងមូល ដែលចាំតែគេប្រើ តាមតែចិត្ត។
មនុស្សដែលជាប្រភេទដំឡូងមូល តែងបង្ហាញពីសកម្មភាពមិនប្រក្រតី សំដីប្លែក សួរដដែលៗ ឆាប់ជឿងប់ងល់ ឆាប់សម្រេចចិត្ត និងអារកាត់លឿន ជាដើម។ មនុស្សប្រភេទនេះ ពុំសូវមានឥទ្ធិពលនៅក្នុងសង្គមឡើយ និងស្ថិតនៅក្រោមការគាបសង្កត់ និងស្ថិតនៅក្រោមការគ្រប់គ្រងពីអ្នកដទៃជាជាងការគ្រប់គ្រងជំហររបស់ខ្លួនឯង៕
© រក្សាសិទ្ធិដោយ thmeythmey.com