ជាតិ
សិល្បះ
យុវជន ធឿន សុជាតិ គូរគំនូរច្នៃម៉ូដឈុតតំណាងខេត្តក្រុង២៥ ដើម្បីលើកប្រជាប្រិយភាពតំបន់
×![]()
ដោយ: ប៉ូ សាគុន
យុវជន ធឿន សុជាតិ បានចំណាយពេល២ខែ សិក្សាពីរចនាប័ទ្មខ្មែរ មកច្នៃម៉ូតឈុតតំណាងខេត្ត-ក្រុងទាំង២៥ ដើម្បីលើកប្រជាប្រិយតំបន់ទាំងនោះ។ ឈុតតំណាងខេត្ត-ក្រុងទាំង២៥ ត្រូវបានអ្នកច្នៃម៉ូតរូបនេះ ស្រាវជ្រាវលើឯកសារតាមបណ្ដាល័យ ,ជញ្ជាំងប្រាសាទ និងពីឯកសារបារាំងដែលសល់ពីសម័យមុន ដែលទាក់ទងរចនាប័ទ្មជាខ្មែរ។
លោក ធឿន សុជាតិ ជានិស្សិតស្ថាបត្យកម្មឆ្នាំទី៣ បានឲ្យដឹងថា គោលបំណងសំខាន់ដែលលោកគូររូបច្នៃម៉ូដតំណាងខេត្តក្រុង-ទាំង២៥នេះឡើង ព្រោះលោកចង់លើកសម្រស់ខេត្តក្រុងទាំងនោះ ឲ្យមានប្រជាប្រិយឡើងមួយកម្រិតទៀត។ ដំបូងឡើយលោក ធឿន សុជាតិ បានគូររូបច្នៃម៉ូដតំណាងខេត្ត៤ប៉ុណ្ណោះ យកទៅផ្សព្វផ្សាយលើបណ្ដាញសង្គម ស្រាប់តែមានអ្នកគាំទ្រច្រើន ទើបលោកក៏បន្តគូរម៉ូដ រហូតបាន២៥ខេត្តក្រុង។ អត្តសញ្ញាណដែលស្ដែងឡើងក្នុងគំនូរទាំងនេះ ត្រូវបានលោក សុជាតិ អះអាងថា ជារូបតំណាងនៃខេត្ត-ក្រុងទាំង២៥ តាមរយៈការសិក្សាស្រាវជ្រាវយ៉ាងល្អិតល្អន់ ពីឯកសារពាក់ព័ន្ធអស់រយៈពេល២ខែ។
អ្នកខេត្តកណ្ដាលក្នុងស្រុកលើកដែករូបនេះ បានបញ្ជាក់ដូច្នេះថា៖«ម៉ូដតំណាងខេត្តក្រុងទាំង២៥នេះ ខ្ញុំច្នៃតាមរយៈការសិក្សាពីពណ៌របស់ខ្មែរ ហើយមើលថាខេត្តទាំងនោះមានសត្វ រុក្ខជាតិ ឬផ្លែឈើអ្វីតំណាងខេត្តរបស់គេខ្ញុំយកមកច្នៃបញ្ចូល។ ខ្ញុំជឿថាគ្រប់ខេត្តទាំងអស់នឹងកាន់តែអភិវឌ្ឍន៍ ដូច្នេះបើគេមានសម្លៀកបំពាក់សម្រាប់តំណាងខេត្តមួយទៀតរឹតតែល្អ»។
កូនប្រុសច្បងក្នុងគ្រួសាររូបនេះបន្តថា ក្រោយពីលោកផ្សព្វផ្សាយរូបតំណាងខេត្តក្រុងទាំង២៥នេះ មានអ្នកគាំទ្រច្រើន ហើយក៏មានអ្នកចង់ជួយឧបត្ថមឲ្យលោកកាត់ជាសម្លៀកបំពាក់ពិតផងដែរ។ លោកថា ប្រសិនបើមានអ្នកគាំទ្រកាន់តែច្រើននៅថ្ងៃអនាគត លោកនឹងយកម៉ូដតំណាងខេត្តក្រុងទាំងនេះ ទៅកាត់ម៉ូដដោយជ្រើសរើសក្រណាត់ល្អៗ និងពណ៌ឲ្យសាកសមនឹងអត្តសញ្ញាណជាតិ។ លោក ធឿន សុជាតិ បញ្ជាក់បន្ថែម៖« បើមានអ្នកគាំទ្រឲ្យខ្ញុំកាត់ជាសម្លៀកបំពាក់ អាចទាក់ទងមកខ្ញុំបាន ខ្ញុំនឹងរៀបចំជាកញ្ចប់ថវិកាក្នុងការចំណាយទៅលើសម្លៀកបំពាក់នេះ។ ហើយសម្លៀកបំពាក់នេះខ្ញុំមិនយកទៅណាទេ ខ្ញុំទុកសម្រាប់ខេត្តទាំងនោះវិញ ដើម្បីឱ្យគេយកទៅប្រើតាមតម្រូវការ។ ខ្ញុំនឹងរើសក្រណាត់ល្អៗ ឲ្យសាកសមនឹងខេត្តនីមួយៗ ព្រមទាំងរើសពណ៌ឲ្យសមផង ខ្មែរយើងច្រើនប្រើពណ៌សុភាព និងស្រគត់ស្រគំ»៕ រូប៣, ដល់២៥
Tag:
សិល្បៈ
គំនូរ
© រក្សាសិទ្ធិដោយ thmeythmey.com
