ជាតិ
បោះឆ្នោត
សម្ដេច ស ខេង បង្គាប់ឲ្យអាជ្ញាធរដោះស្រាយបញ្ហាដីធ្លីពលរដ្ឋឲ្យទាន់ពេល ដើម្បីកុំឲ្យប៉ះពាល់ដល់ការបោះឆ្នោត
× ភ្នំពេញ៖ ក្រសួងមហាផ្ទៃ បង្គាប់ឲ្យអាជ្ញាធរជួយសម្រួល និងដោះស្រាយបញ្ហាដីធ្លី ជូនប្រជាពលរដ្ឋឲ្យមានប្រសិទ្ធភាព ដើម្បីកុំឲ្យមានផលប៉ះពាល់ដល់ដំណើរការបោះឆ្នោតជ្រើសរើសតំណាងរាស្ត្រនីតិកាលទី៦ ខាងមុខ។
ខណៈការបោះឆ្នោតខិតជិតមកដល់ ក្រសួងមហាផ្ទៃ បានប្រាប់ឲ្យអភិបាលរាជធានី-ខេត្ត និងអាជ្ញាធរទាំងអស់ ត្រូវប្រុងប្រយ័ត្ន និងបង្កើនការយកចិត្តទុកដាក់ លើបញ្ហាដីធ្លីរបស់ប្រជាពលរដ្ឋ។ បញ្ហាដីធ្លីដែលក្រសួងមហាផ្ទៃ កត់សម្គាល់នោះ គឺទំនាស់ដីរបស់ពលរដ្ឋកើតឡើងយូរឆ្នាំមកហើយ តែមិនមានការដោះស្រាយបញ្ហាបញ្ចប់ជាស្ថាពរ ដែលនាំឲ្យពួកគេឡើងមកតវ៉ា មកដល់នាយករដ្ឋមន្ត្រីកន្លងមក។ ក្រៅពីបញ្ហានេះ បញ្ហារំលោភទន្ទ្រានកាន់កាប់ដីសាធារណៈ និងព្រៃឈើខុសច្បាប់ពីសំណាក់ក្រុមឱកាសនិយម តែងតែកើតមាន នៅមុនពេលបោះឆ្នោត។
ដើម្បីទប់ស្កាត់ស្ថានការណ៍នេះ ក្រសួងមហាផ្ទៃ បានដាក់ចេញវិធានការ៩ចំណុច ក្នុងការសម្របសម្រួល និងដោះស្រាយឲ្យមានប្រសិទ្ធភាព លើបញ្ហាទំនាស់ដីធ្លីទាំងនេះ ដើម្បីកុំឲ្យប៉ះពាល់ដល់ដំណើរការបោះឆ្នោតខាងមុខ។
វិធានការដែលក្រសួងមហាផ្ទៃ ដាក់ឲ្យអាជ្ញាធរគ្រប់លំដាប់ថ្នាក់ ដោះស្រាយនោះដូចជា៖ ត្រូវប្រើប្រាស់យន្តការដោះស្រាយទំនាស់ដីធ្លី ដែលមានស្រាប់នៅថ្នាក់រាជធានី ខេត្ត ដោយធ្វើយ៉ាងណាឲ្យតម្លាភាព សុចរិតភាព និងយុត្តិធម៌ សម្រាប់ប្រជាពលរដ្ឋ។ អាជ្ញាធរ និងកងកម្លាំងមានសមត្ថកិច្ចឲ្យរក្សាភាពអត់ធ្មត់ នៅក្នុងការបំពេញការងារដោះស្រាយទំនាស់ដីធ្លីពលរដ្ឋ ដោយមិនត្រូវឲ្យមានអំពើហិង្សាកើតឡើងឡើយ។
លិខិតរបស់ក្រសួងមហាផ្ទៃ ដែលចុះហត្ថលេខាដោយសម្ដេច ស ខេង បានបង្គាប់ទៀតថា អាជ្ញាធរពាក់ព័ន្ធ ត្រូវបង្កើនការតាមដាន និងគ្រប់គ្រងសភាពការណ៍វិវត្តន៍ពាក់ព័ន្ធនឹងបញ្ហាទំនាស់ដីធ្លីនៅតាមខេត្តនីមួយៗឲ្យបានហ្មត់ចត់ ដើម្បីបង្ការ ទប់ស្កាត់កុំឲ្យមាននិន្នាការឡើងមកភ្នំពេញ។ ប៉ុន្តែបើនៅតែមានពលរដ្ឋឡើងមកតវ៉ានៅភ្នំពេញទៀតនោះ អាជ្ញាធរក្ដាប់សភាពការណ៍បញ្ហាពលរដ្ឋតវ៉ា ព្រមទាំងចាត់ចែងកងកម្លាំងមានសមត្ថកិច្ចឲ្យជួយការពារសន្តិសុខ និងសុវត្ថិភាពពួកគេ។ ជាពិសេសរដ្ឋបាលរាជធានី-ខេត្ត ត្រូចចាត់ក្រុមការងារមួយជាបន្ទាន់ ឲ្យមកជួបប្រជាពលរដ្ឋ ដើម្បីសម្របសម្រួលឲ្យពួកគេទៅដោះស្រាយបញ្ហាទំនាស់ដីធ្លីនៅថ្នាក់មូលដ្ឋានវិញ។
ចំណែកបញ្ហាទន្ទ្រានដីធ្លីសាធារណៈកាន់កាប់វិញ អាជ្ញាធរតាមមូលដ្ឋាត្រូវចុះអប់រំ និងណែនាំប្រជាពលរដ្ឋឲ្យចូលរួមថែរក្សាបរិស្ថាន ការពារដីធ្លីសាធារណៈ ដើម្បីបញ្ចៀសបញ្ហាទំនាស់ដីនៅពេលក្រោយ។ នេះជាការបញ្ជាក់របស់ក្រសួងមហាផ្ទៃ ដែលបង្គាប់ឲ្យកងកម្លាំងគ្រប់ប្រភេទ ពង្រឹងរក្សាសន្តិសុខសណ្ដាប់ធ្នាប់ និងស្ថិរភាពនយោបាយ ដើម្បីឲ្យមានភាពល្អប្រសើរ នៅក្នុងអំឡុងពេលនៃដំណើរការបោះឆ្នោតខាងមុខនេះ។
ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដោយមានគណបក្ស២០ ចូលរួមប្រកួតប្រជែង ។ ប្រជាពលរដ្ឋ ដែលមានឈ្មោះនៅក្នុងបញ្ជីបោះឆ្នោតមានជាង៨លាន៣សែននាក់។ ចំណែកកងកម្លាំងជាង៨ម៉ឺននាក់ នឹងត្រូវដាក់ពង្រាយនៅគ្រប់ការិយាល័យបោះឆ្នោត។ នេះបើតាមគណៈកម្មាធិការជាតិរៀបចំការបោះឆ្នោត (គ.ជ.ប)៕
Tag:
ស ខេង
ដីធ្លី
បោះឆ្នោត
© រក្សាសិទ្ធិដោយ thmeythmey.com