ជាតិ
នយោបាយជាតិ
CPP ថាខ្លួនមានមិត្តច្រើនលើពិភពលោក ក្រោយក្លាយជាអនុប្រធាននៃអង្គការអ្នកប្រជាធិបតេយ្យអន្តរជាតិ
ពីឆ្វេងទៅស្តាំ៖ លោក សួស យ៉ារ៉ា (រូបទី២) និងលោក សុខ ឥសាន (រូបទី៣)
×![]()
ដោយ: សារព័ត៌មានថ្មីៗ
ប្រទេសកម្ពុជា ក៏ដូចជាគណបក្សប្រជាជនកម្ពុជា (CPP ) មិនឯកោឡើយ។ នេះគឺជាការលើកឡើងរបស់លោក សួស យ៉ារ៉ា អ្នកនាំពាក្យម្នាក់របស់គណបក្សប្រជាជនកម្ពុជា។
ការថ្លែងរបស់លោក សួស យ៉ារ៉ា ធ្វើឡើងក្នុងសន្និសីទកាសែតស្តីពីតួនាទីរបស់គណបក្សប្រជាជនកម្ពុជាលើឆាកអន្តរជាតិ ដែលរៀបចំនៅទីស្នាក់ការកណ្តាលរបស់ខ្លួន នារសៀលថ្ងៃទី៦ ខែកក្កដា ឆ្នាំ២០១៨នេះ។ សន្និសីទកាសែតនេះ រៀបចំឡើង បន្ទាប់ពីគណបក្សប្រជាជនកម្ពុជា ទទួលបានតំណែងជាអនុប្រធាននៃអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) ដែលមានអាណត្តិរយៈពេល៣ឆ្នាំ។
កាលពីថ្ងៃទី២៩ ខែមិថុនា ឆ្នាំ២០១៨ កន្លងទៅ អង្គការអ្នកប្រជាធិបតេយ្យនិយមកណ្តាលអន្តរជាតិ បានរៀបចំកិច្ចប្រជុំ នៅទីក្រុងប្រ៊ុយស៊ែល ប្រទេសប៊ែលហ្សិក ហើយក៏បានបោះឆ្នោតឲ្យគណបក្សប្រជាជនកម្ពុជា ធ្វើជាអនុប្រធាន។ អង្គការអន្តរជាតិមួយនេះ ត្រូវបានបង្កើតឡើងតាំងពីឆ្នាំ១៩៦១ មកម្ល៉េះ ដោយមានគណបក្ស អង្គការ និងសមាគមនយោបាយជាង៩០ ដែលមកពីបណ្តាប្រទេសនានាលើពិភពលោក ជាសមាជិក។
ក្នុងសន្និសីទកាសែត លោក សួស យ៉ារ៉ា បាននិយាយទាំងមានមោទនភាព យ៉ាងដូច្នេះថា ៖«គណបក្សប្រជាជនកម្ពុជា មានមិត្តនៅលើពិភពលោក និងមានមិត្តនៅក្នុងតំបន់អាស៊ីទាំងមូល ហើយបានដើរតួនាទីយ៉ាងសំខាន់ នៅក្នុងការតភ្ជាប់នូវបណ្តាទស្សនៈនយោបាយ និងមនោគមវិទ្យានយោបាយផ្សេងៗ។ យើងមានមិត្តមកពីគ្រប់ទិសទី ដើម្បីគាំទ្រនយោបាយ និងសន្តិភាពរបស់យើង»។
អ្នកនាំពាក្យគណបក្សកាន់អំណាចរូបនេះ បន្តថា ដោយសារតែប្រកាន់យកតួនាទីកណ្តាលនិយម ប្រទេសកម្ពុជា អាចប្រឆាំងទប់ទល់ជាមួយទស្សនៈជ្រុលនិយម។ លោកបន្ថែមថា ការប្រកាន់យកទស្សនៈកណ្តាលនិយមនេះ បានធ្វើឲ្យកម្ពុជា ក្លាយជាប្រទេសមួយ ដែលមានតួនាទី ក្នុងការសម្របសម្រួលគណបក្សនយោបាយតាមបណ្តាប្រទេសនានា ដែលមាននិន្នាការខុសៗគ្នា គឺទាំងនិន្នាការខាងសេរីនិយម និងសង្គមនិយម។
លោក សួស យ៉ារ៉ា បញ្ជាក់ចុងក្រោយបែបនេះថា ៖«យើងជាចំណុចកណ្តាលមួយ ដែលអាចឲ្យយើងថ្លឹងថ្លែងបានថា ចំណុចណាដែលមានភាពល្អប្រសើរបម្រើឲ្យជាតិ និងប្រជាជនយើងទាំងមូល ហើយជាពិសេសពង្រឹងឯករាជ្យភាពរបស់កម្ពុជា»៕
Tag:
CPP
សួស យ៉ារ៉ា
© រក្សាសិទ្ធិដោយ thmeythmey.com
