កីឡាអន្តរជាតិ
អន្តរជាតិ
សហព័ន្ធកីឡាបាល់ទាត់អាល្លឺម៉ង់ ថាមិនបានរើសអើងពូជសាសន៍ដូច Ozil ចោទឡើយ
× សហព័ន្ធកីឡាបាល់ទាត់អាល្លឺម៉ង់ (DFB) បានបដិសេធចំពោះការចោទប្រកាន់ពីការរើសអើងជាតិសាសន៍ទៅលើ Mesut Ozil ដោយអះអាងខ្លួនបានធ្វើអ្វីៗជាច្រើនដើម្បីការពារខ្សែបម្រើរបស់ Arsenal រូបនេះ ពីការរំលោភបំពានទៅវិញទេ។ នេះបើតាមការផ្សាយរបស់ Independent។
Ozil បានប្រកាសឈប់លេងឲ្យក្រុមជម្រើសជាតិអាល្លឺម៉ង់តទៅទៀត ព្រោះទ្រាំមិនបាននឹង ការរើសអើងជាតិសាសន៍ និងការមិនគោរពមកលើខ្លួន ពីសំណាក់ប្រធានសហព័ន្ធកីឡាបាល់ទាត់អាល្លឺម៉ង់។
ខ្សែបម្រើ វ័យ២៩ឆ្នាំរូបនេះបានអះអាងទៀតថា រូបគេត្រូវបានអ្នកគាំទ្ររបស់ក្រុមឥន្ទ្រីដែកគំរាមកំហែង និងស្តីបន្ទោសពីទម្រង់លេង បន្ទាប់ពីមិនអាចជួយក្រុមឆ្លងផុតវគ្គចែកពូលក្នុងការប្រកួតពានរង្វាន់ FIFA World Cup នៅរុស្ស៊ីទៀតផង។ ក្រោយការរិះគន់នេះ Ozil បានសរសេរបែបឌឺដងវិញថា៖ «ខ្ញុំជាជនជាតិអាល្លឺម៉ង់ នៅពេលដែលយើងឈ្នះ ហើយជាជនអន្តោប្រវេសន៍ នៅពេលយើងចាញ់»។
ជុំវិញការលើកឡើងរបស់ខ្សែបម្រើក្រុមរហស្សនាមកាំភ្លើងធំអំពីការរើសអើងជាតិសាសន៍ DFB បានឆ្លើយតបវិញថា៖«ស្ថាប័នយើងពិតជាសោកស្តាយចំពោះការចាកចេញរបស់ Mesut Ozil ពីក្រុមជម្រើសជាតិ។ យើងបដិសេដោយចំហចំពោះការចោទប្រកាន់ DFB ដែលពាក់ព័ន្ធនឹងការប្រកាន់ពូជសាសន៍។ DFB បានចូលរួមយ៉ាងសកម្មនៅក្នុងការប្រឆាំងទៅនឹងសកម្មភាពរើសអើងច្រើនលើកច្រើនសារក្នុងប្រទេសអាល្លឺម៉ង់អស់រយៈពេលជាច្រើនឆ្នាំមកហើយ»។
អតីតសមាជិក Real Madrid រូបនេះ ទទួលការរិះគន់ខ្លាំងៗពី សំណាក់លោក Reinhard Grindel ប្រធាន DFB បន្ទាប់រូបគេបានជួបជាមួយលោក Recep Tayyip Erdogan ក្នុងទីក្រុងឡុងដ៏ កាលពីថ្ងៃទី១៣ ខែឧសភា និងបានថតរូបជាមួយគ្នាផង ស្របពេលប្រធានាធិបតីតួកគីរូបនេះកំពុងធ្វើយុទ្ធនាឃោសនាការបោះឆ្នោត។
Ozil មានសាច់ឈាមតួកគី តែកើតលើទឹកដីអាល្លឺម៉ង់។ បើតាមការចុះផ្សាយរបស់សារព័ត៌មានជាច្រើន Özil ក៏ធ្លាប់បានជួបប្រធានាធិបតីតួកគីលោក Erdoğan ម្តងដែរនៅឆ្នាំ២០១១ កាលនៅជាសមាជិកក្រុមស្តេចស។
សមាគមកីឡាបាល់ទាត់អាល្លឺម៉ង់បន្ថែមថា ពួកគេទទួលស្គាល់ថាមិនបានដោះស្រាយបញ្ហាឲ្យបានល្អប្រសើរពិតមែនជុំវិញការរិះគន់របស់អ្នកគាំទ្រ ប៉ុន្តែស្ថាប័នមួយនេះ «ពិតជាសោកស្តាយដែល Mesut Ozil មានអារម្មណ៍ថាគាត់មិនត្រូវបានការការពារគ្រប់គ្រាន់ ហើយព្រមទាំងប្រើពាក្យប្រកាន់ជាតិសាសន៍ថែមទៀត»៕
Tag:
បាល់ទាត់
Mesut Ozil
Arsenal
Recep Tayyip Erdogan
© រក្សាសិទ្ធិដោយ thmeythmey.com