កីឡាអន្តរជាតិ
អន្តរជាតិ
បេក្ខភាពគ្រូបង្វឹក និងកីឡាករល្អបំផុតប្រចាំឆ្នាំ តែគ្មាន Neymar និង Mourinho
× សហព័ន្ធកីឡាបាល់ទាត់អន្តរជាតិ (FIFA) នៅថ្ងៃទី២៤ ខែកក្កដា ឆ្នាំ២០១៨ បានបញ្ចេញឈ្មោះសមាសភាពកីឡាករ១០រូប រួមទាំងគ្រូបង្វឹក១១រូប ដើម្បីប្រជែងពានកីឡាករ និងគ្រូល្អផ្តាច់គេប្រចាំឆ្នាំ២០១៨ FIFA's The Best award។
បញ្ជីឈ្មោះកីឡាករទាំង១០រូបរបស់ FIFA មិនមានវត្តមានខ្សែប្រយុទ្ធថ្លៃជាងគេលើលោក Neymar ទេ ដែលក្នុងនោះរួមមាន Cristiano Ronaldo (Juventus), Kevin de Bruyne (Man City), Antoine Griezmann (At-Madrid), Eden Hazard (Chelsea), Harry Kane (Spurs), Kylian Mbappe (PSG), Lionel Messi (Barcelona), Luka Modric (Real Madrid), Mohamed Salah (Liverpool) និង Raphael Varane (Real Madrid)។
ក្នុងចំណោមកីឡាករទាំង១០រូប Lionel Messi, Kylian Mbappe, Cristiano Ronaldo និង Mohamed Salah ស្ថិតក្នុងចំណោមបេក្ខភាពដែលមានភាគរយដើម្បីឈ្នះពានរង្វាន់កីឡាករឆ្នើមបំផុតលើលោកប្រចាំឆ្នាំ ២០១៨ របស់ FIFA នេះច្រើនជាងគេ។
Ronaldo ដែលធ្លាប់ឈ្នះពានរង្វាន់នេះក្នុងឆ្នាំ ២០១៧ បានជួយក្លិបចាស់ Real Madrid លើកពាន Champions League ជាលើកទី៣ជាប់ៗគ្នា ខណៈដែល Messi បានស៊ុតបញ្ចូលទី ៣៤ គ្រាប់ក្នុងលីកដើម្បីនាំ Barcelona លើកពាន La Liga និងឈ្នះស្បែកមាសសម្រាប់រដូវកាល ២០១៧-២០១៨ ។
សមាជិកដែលជួយបារាំងគ្រងជើងឯក FIFA World Cup នៅរុស្ស៊ី Kylian Mbappe បានបង្ហាញទម្រង់លេងយ៉ាងអស្ចារ្យនៅក្នុងព្រឹត្តិការណ៍នោះក្នុងនាមជាកីឡាករវ័យក្មេងជាមួយនឹងការបង្កើតឱកាស និងល្បឿនដ៏លឿនរបស់គេ។ ខ្សែប្រយុទ្ធវ័យ ១៩ឆ្នាំរូបនេះ ក៏បានជួយក្លិប PSG លើកពាន Ligue 1 នៅរដូវកាលមុនផងដែរ។
Salah បានធ្វើឲ្យមានការភ្ញាក់ផ្អើលយ៉ាងខ្លាំងនៅរដូវកាលដំបូង បន្ទាប់ពីផ្លាស់មកចួលរួមជាមួយ Liverpool ពី Roma ដោយជួយក្រុមនៅអង់គ្លេសមួយនេះឡើងទៅកាន់វគ្គផ្តាច់ព្រ័ត្រ UEFA Champions League ជាលើកដំបូងក្នុងរយៈពេល១០ឆ្នាំចុងក្រោយ។ ខ្សែប្រយុទ្ធវ័យ ២៦ឆ្នាំ ក៏បានជួយក្រុមជម្រើសជាតិអេហ្ស៊ីបបានកៅអីទៅកាន់ World Cup ឆ្នាំ២០១៨ នៅរុស្ស៊ីផងដែរ បើទោះមិនអាចឆ្លងផុតវគ្គចែកពូលក៏ដោយ។
ដោយឡែកគ្រូបង្វឹកទាំង១១រូប ដែលជាប់ក្នុងបញ្ជីដើម្បីប្រជែងពានប្រចាំឆ្នាំនេះមានដូចជា លោក Gareth Southgate (អង់គ្លេស), លោក Massimiliano Allegri (Juventus), លោក Stanislav Cherchesov (រុស្ស៊ី), លោក Zlatko Dalic (ក្រូអាស៊ី), លោក Didier Deschamps គ្រូ(បារាំង), លោក Pep Guardiola (Manchester City), លោក Roberto Martinez (បែលហ្សិក), លោក Jurgen Klopp (Liverpool), លោក Diego Simeone (Atletico Madrid), លោក Ernesto Valverde (Barcelona) និង លោក Zinedine Zidane អតីតអ្នកចាត់ការ Real Madrid។ អ្វីដែលសំខាន់នោះក្នុងចំណោមគ្រូបង្វឹកទាំង១១រូបខាងលើ មិនមានវត្តមានអ្នកចាត់ការបិសាចក្រហម Manchester United លោក Jose Mourinho ដែលតែតែមានឈ្មោះក្នុងបញ្ជីពីឆ្នាំមុខៗនោះឡើយ។
បេក្ខភាពទាំងគ្រូបង្វឹក និងកីឡាករខាងលើ ដែលត្រូវបានជ្រើសរើសមកគឺពឹងផ្អែកលើសមទ្ធផលជារួមគិតចាប់ពីថ្ងៃទី៣ ខែកក្កដា ឆ្នាំ២០១៧មក។
FIFA នឹងប្រកាសជ័យលាភីខាងលើនៅថ្ងៃទី២៤ ខែកញ្ញា ឆ្នាំ២០១៨ ក្នុងទីក្រុងឡុងដ៏ ដោយមានការចូលរួមពីជនល្បីៗក្នុងវិស័យកីឡាបាល់ទាត់ដូចជាវិរបុរសប្រេស៊ីល Ronaldo និងអតីតគ្រូជម្រើសជាតិអង់គ្លេស Fabio Capello ជាដើម៕
Tag:
បាល់ទាត់
FIFA
FIFA\'s The Best award
© រក្សាសិទ្ធិដោយ thmeythmey.com