ពីនេះ ពីនោះ
«ក្រពេញរាជ្យ», «កំពេញរាជ្យ» និង«បំពេញរាជ្យ» ជាពាក្យដែលមិនងាយសរសេរត្រូវ
× នៅក្នុងការប្រើប្រាស់ពាក្យទាំងនេះកន្លងមក សាធារណជននៅមានភាពស្រពេចស្រពិលក្នុងការនិយាយ និងសរសេរ ដោយអ្នកខ្លះប្រើជា «ក្រពេញរាជ្យ» ខ្លះ «កំពេញរាជ្យ» និងខ្លះទៀត «បំពេញរាជ្យ»។ តែមិនប្រាកថថាពាក្យណាមួយត្រឹមត្រូវនៅឡើយទេ។
សម្តេចព្រះសង្ឃរាជ ជួន ណាត បានបញ្ជាក់ក្នុងវចនានុក្រមខ្មែរថា ពាក្យដែលគួរតែពលរដ្ឋប្រើប្រាស់នោះ គឺ «បំពេញរាជ្យ» មិនមែន «ក្រពេញរាជ្យ» ឬ «កំពេញរាជ្យ» នោះទេ។ «បំពេញរាជ្យ» ជាផ្លែឈើដែលមានរសជាតិជូរ មានគ្រាប់ផ្អែម ឬជូរ។
ខ្មែរពីដើម ហៅឈ្មោះ «ផ្លែបំពេញរាជ្យ» ម្យ៉ាងទៀតថា «ផ្លៃលោះ» ដែលមានប្រភេទស្លឹកធំៗស្រដៀងនឹងស្លឹកពង្រ, ផ្លែមូលសំបកក្រាស់, សាច់ជ្រាកមានសរសៃស្វិតជាប់នឹងគ្រាប់, ខ្លះមានរសជូរ ខ្លះជូរអែម, សំបកផ្លៃប្រើជាបន្លែស្លម្ជូរ។ រហូតមកដល់សម័យ ព្រះបាទសម្តេច ព្រះឧទ័យរាជ (ក្សត្រិយ៍កម្ពុជរដ្ឋ) ទ្រង់សព្វព្រះរាជហឫទ័យ ទ្រង់ប្រោសព្រះរាជទាន ឈ្មោះឲ្យហៅថា «បំពេញរាជ្យ» វិញ ទើបជាប់ឈ្មោះ រហូតមកដល់សព្វថ្ងៃនេះ។
គួររម្លឹកថា ពាក្យដែលពលរដ្ឋមិនងាយប្រើត្រូវទៅតាមវចនានុក្រមខ្មែរ នោះមានដូចជា «ប៉ិកួៈ» មិនមែន ប៉ិកកួក ឬប៉ិគួក, «សាវម៉ាវ» មិនមែន សៅម៉ាវ ឬសៅម៉ៅ នេះទេ,«ដំឡើង» មិនមែន តម្លើង ឬតំឡើង, «តម្រាប់» មិនមែន ឬតំរាប់ ដំរាប់ ឬដម្រាប់ នោះឡើយ, «ហឹរ» មិនមែន ហិល ឬហិរ ទេ, «អ៊ីចឹង» មិនមែន អញ្ចឹង ឬឥចឹង ឬឥញ្ចឹង នោះដែរ។ល៕
© រក្សាសិទ្ធិដោយ thmeythmey.com