ប្រជាជនមីយ៉ាន់ម៉ារាប់ពាន់នាក់ ត្រូវជម្លៀសចេញពីលំនៅព្រោះតែគ្រោះទឹកជំនន់

អន្តរជាតិ

ប្រជាជនមីយ៉ាន់ម៉ារាប់ពាន់នាក់ ត្រូវជម្លៀសចេញពីលំនៅព្រោះតែគ្រោះទឹកជំនន់

28, Jul 2018 , 9:39 pm

រូបភាព

ដោយ:

មិនខុសពីប្រជាជននៃបណ្តាប្រទេសមួយចំនួននៅតំបន់អាស៊ានដូចជាកម្ពុជា ឡាវ និងវៀតណាមឡើយ ប្រជាជនមីយ៉ាន់ម៉ារាប់ពាន់ក៏កំពុងតែបន្តស្វែងរកទីជម្រកមានសុវត្ថិភាព បន្ទាប់ពីទីលំនៅរបស់ពួកគេ ត្រូវបានលិចលង់ដោយសារតែគ្រោះទឹកជំនន់។

អង្គភាពគ្រប់គ្រងគ្រោះមហន្តរាយមីយ៉ាន់ម៉ា បានចេញសេចក្តីថ្លែងការណ៍មួយដោយអះអាងថា មានប្រជាជនមីយ៉ាន់ម៉ាប្រមាណជាង១ម៉ឺននាក់ កំពុងតែភៀសខ្លួនចេញពីទីលំនៅរបស់ពួកគេនៅក្នុងរដ្ឋ Kayin ខណៈទឹកទន្លេក្នុងប្រទេសឡើងខ្ពស់ និងទឹកភ្លៀងនៅតែបន្តធ្លាក់ដែលបង្កឲ្យកើតជាទឹកជំនន់។ នេះបើយោងតាមការចុះផ្សាយរបស់សារព័ត៌មាន Myanmar Times។

តាមប្រភពព័ត៌មានដដែល ភូមិសាស្ត្រនេះ តែងតែរងការវាយប្រហារពីទឹកជំនន់ជារៀងរាល់ឆ្នាំ ក៏ប៉ុន្តែនៅក្នុងឆ្នាំនេះ ហាក់ដូចជាមានស្ថានភាពធ្ងន់ធ្ងរ និងអាក្រក់ជាង។ ជាមួយគ្នានេះតាមការបញ្ជាក់ពីអ្នកនាំពាក្យនៃអង្គភាពគ្រប់គ្រងមហន្តរាយ ទឹកជំនន់នេះនឹងមិនអូសបន្លាយពេលយូរនោះទេ ក៏ប៉ុន្តែរដ្ឋាភិបាល ក៏បានត្រៀមខ្លួនរួចជាស្រេចហើយសម្រាប់ការសង្គ្រោះ បើទឹកជំនន់មិនថមថយដូចការរំពឹងទុក។

គួរជម្រាបផងដែរថា ប៉ុន្មានថ្ងៃចុងក្រោយនេះ គ្រោះទឹកជំនន់ ក៏បានវាយប្រហារទៅលើប្រទេសអាស៊ាន ដូចជា ឡាវ ដែលបណ្តាលឲ្យបាក់ទំនប់វ៉ារីអគ្គិសនី និងធ្វើឲ្យលិចលង់ផ្ទះសម្បែងប្រជាជន ដោយថែមទាំងមានអ្នកបាត់ខ្លួន និងស្លាប់ទៀត។ ចំណែកគ្រួសារអាស៊ាន កម្ពុជាវិញ ក៏មានជួបគ្រោះទឹកជំនន់នៅតាមបណ្តាខេត្តមួយចំនួនផងដែរ។

ហេតុការណ៍នេះ ក៏អាចជាកត្តារួមផ្សំមួយ ដែលបង្ហាញថាប្រទេសតំបន់អាស៊ានក៏កំពុងតែទទួលរងនូវឥទ្ធិពលនៃការប្រែប្រួលអាកាសធាតុសកល ដែលជាបញ្ហាពិភពលោកកំពុងតែព្រួយបារម្ភ។ នៅប៉ុន្មានឆ្នាំមុននេះ ប្រទេសតំបន់អាស៊ានតាមបណ្តោយទន្លេមេគង្គ បានជួបនូវគ្រោះរាំងស្ងួតខ្លាំង ដែលបណ្តាលពីរលកធាតុអាកាសក្តៅនៃបាតុភូតសម្ពាធអាកាសធាតុក្តៅខ្លាំង៕