ជាតិ
សម្ដេច ហ៊ុន សែន ប្រកាសដាក់បញ្ចូលអតីតអភិបាលខេត្តទាំងអស់ ធ្វើការនៅរដ្ឋសភា
× ភ្នំពេញ៖ បើគ្មានអ្វីប្រែប្រួលទេ អតីតអភិបាលខេត្ត ដែលកំពុងឈរជើងនៅតាមក្រសួងនានា នឹងទៅបម្រើការងារនៅក្នុងរដ្ឋសភា ។ ព័ត៌មាននេះ បានបង្ហើបដោយសម្ដេចនាយករដ្ឋមន្ត្រី ហ៊ុន សែន។
ថ្លែងនៅក្នុងពិធីជួបសំណេះសំណាលជាមួយកម្មកររោងចក្រ ខេត្តកំពង់ស្ពឺ សម្ដេច ហ៊ុន សែន បាននិយាយចំឈ្មោះលោក អ៊ូ សំអ៊ួន ដែលជាអតីតអភិបាលខេត្តកំពង់ស្ពឺ ហើយបច្ចុប្បន្នជារដ្ឋលេខាធិការអភិវឌ្ឍន៍ជនបទ ដែលនឹងត្រូវបម្រើការងារនៅក្នុងរដ្ឋសភា សម្រាប់នីតិកាលទី៦នេះ។ តាមរយៈវេទិការសាធារណៈនេះ ប្រមុខរដ្ឋាភិបាល បានប្រកាសថា គណបក្សនឹងប្រមូលអតីតអភិបាលខេត្តទាំងអស់ បញ្ចូនទៅបំពេញភារកិច្ចក្នុងរដ្ឋសភា ។
បើសិនជាគណបក្សឈ្នះឆ្នោតភ្លូកទឹកភ្លូកដីមួយនេះ ដាក់បញ្ចូលសមាសភាពអតីតអភិបាលខេត្ត ក្នុងរដ្ឋសភាមែននោះ ទំនងជាមានវត្តមានលោក ផៃ ប៊ុនឈឿន អតីតអភិបាលខេត្តកណ្ដាល ដែលបច្ចុប្បន្នជារដ្ឋលេខាធិការក្រសួងបរិស្ថាន។ អតីតអភិបាលខេត្តបន្ទាយមានជ័យ លោក គោ ស៊ុំសារឿត បច្ចុប្បន្នជារដ្ឋលេខាធិការក្រសួងធនធានទឹក និងឧតុនិយម និងអតីតអភិបាលខេត្តកំពត លោក ខូយ ឃុនហ៊ួរ បច្ចុប្បន្នជារដ្ឋលេខាធិការទីស្ដីការគណៈរដ្ឋមន្ត្រីជាដើម។
គណៈកម្មាធិការជាតិរៀបចំការបោះឆ្នោត (គ.ជ.ប) នឹងប្រកាសលទ្ធផលបោះឆ្នោតផ្លូវការ នៅថ្ងៃទី១៥ សីហា ។ បើលទ្ធផលនេះ ដូចនឹងការគណនារបស់មជ្ឈដ្ឋានទូទៅ ដែលថា គណបក្សប្រជាជន នឹងឈ្នះកៅអីរដ្ឋសភាទាំងអស់មែននោះ ដូច្នេះសមាជិកតំណាងរាស្ត្រពីគណបក្សកាន់អំណាច មាន១២៥អាសនៈ។
ដ្បិតមិនទាន់ចេញលទ្ធផលក្តី ប៉ុន្តែប្រមុខគណបក្សប្រជាជន ដែលនឹងបន្តដឹកនាំរដ្ឋាភិបាលអាណត្តិថ្មីនេះ បានប្រកាសរួចហើយ ពីកាលបរិច្ឆេទប្រជុំរដ្ឋសភា និងការស្បថចូលកាន់តំណែង ដែលកំណត់យកថ្ងៃទី៥កញ្ញា និងការបង្កើតគណៈរដ្ឋមន្ត្រី រួមទាំងការស្បថចូលកាន់តំណែង នៅថ្ងៃទី៦ កញ្ញា។ គណរដ្ឋមន្ត្រី នឹងបើកសម័យប្រជុំលើកដំបូងនៅថ្ងៃទី៧ កញ្ញា៕
Tag:
ហ៊ុន សែន
អភិបាលខេត្ត
រដ្ឋសភា
នីតិកាលទី៦
© រក្សាសិទ្ធិដោយ thmeythmey.com