ចូកូវី៖ភាពចាស់ទុំនៃប្រជាធិបតេយ្យឥណ្ឌូណេស៊ី នឹងធ្វើឲ្យការបោះឆ្នោតឆ្នាំក្រោយប្រព្រឹត្តដោយរលូន

អន្តរជាតិ

ចូកូវី៖ភាពចាស់ទុំនៃប្រជាធិបតេយ្យឥណ្ឌូណេស៊ី នឹងធ្វើឲ្យការបោះឆ្នោតឆ្នាំក្រោយប្រព្រឹត្តដោយរលូន

18, Aug 2018 , 6:59 pm

រូបភាព

ដោយ:

ប្រមុខរដ្ឋឥណ្ឌូណេស៊ី លោក ចូកូ វីដូដូ បានសម្តែងពីសុទិដ្ឋិនិយមរបស់លោកចំពោះដំណើរការបោះឆ្នោតសភា និងបោះឆ្នោតប្រធានាធិបតីនៅឆ្នាំក្រោយ។ ដោយជឿជាក់ពីភាពចាស់ទុំនៃលទ្ធិប្រជាធិបតេយ្យនៅក្នុងប្រទេស ប្រមុខរូបរដ្ឋរូបនេះ អះអាងថា ការបោះឆ្នោតនឹងប្រព្រឹត្តដោយរលូន និងសន្តិវិធី។

តាមរយៈការថ្លែងសុន្ទរកថាជាតិលើកទីបួនក្នុងនាមជាប្រមុខរដ្ឋ លោកប្រធានាធិបតី ចូកូ វីដូដូ នៅថ្ងៃ១៦ សីហា បានលើកឡើងថា ឥណ្ឌូណេស៊ី បានចាកចេញពីភាពភ័យខ្លាច នៃអស្ថិរភាពនយោបាយ និងហិង្សាផ្សេងៗ ទាំងកម្រិតថ្នាក់ជាតិ និងថ្នាក់តំបន់ ហើយបន្តជំហរជាអ្នកចាស់ទុំប្រជាធិបតេយ្យ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី Jakarta Globe។

តាមរយៈវេទិកាជាតិដដែលនោះ លោក ចូកូវី ដែលឈរជាបេក្ខភាពប្រធានាធិបតីសម្រាប់អាណត្តិទីពីររបស់ខ្លួនផងដែរនោះ បានបង្ហាញពីទំនុកចិត្ត និងភាពជឿជាក់នៃដំណើរទៅមុខរបស់ប្រជាធិបតេយ្យឥណ្ឌូណេស៊ីយ៉ាងដូច្នេះថា៖« តាមរយៈការឆ្លងកាត់បទពិសោធនៃលទ្ធិប្រយោជន៍ជាយូរមកហើយនោះ ខ្ញុំ ធានាថា ការបោះឆ្នោតសភានិងប្រធានាធិបតីពេលតែមួយក្នុងឆ្នាំ២០១៩ នឹងប្រព្រឹត្តដោយសុវត្ថិភាព សន្តិវិធី និងប្រកបដោយប្រជាធិបតេយ្យពិតប្រាកដ»។

ជាមួយគ្នានោះផងដែរ លោកប្រធានាធិបតី ក៏បានសន្យាបន្តខិតខំដោះស្រាយបញ្ហាប្រឈមក្រោមការដឹកនាំរបស់រដ្ឋបាលលោក ដែលសល់ពេលប្រហែលមួយឆ្នាំទៅមុខនេះ រួមមានការរំលោភសិទ្ធិមនុស្ស ការកាត់បន្ថយអំពើពុករលួយ និងការប្រយុទ្ធប្រឆាំងអំពើភេរវកម្ម ដែលជាការគំរាមកំហែងខ្លាំងមួយមកលើរដ្ឋដែលមានប្រជាជនឥស្លាមច្រើនបំផុតរបស់ពិភពលោកមួយនេះ។

សូមជម្រាបផងដែរថា ប៉ុន្មានទសវត្សរ៍ចុងក្រោយនេះ ឥណ្ឌូណេស៊ី មិនសូវមានបញ្ហាក្នុងការផ្លាស់ប្តូរមេដឹកនាំប្រទេស ដូចបណ្តាប្រទេសតំបន់អាស៊ានមួយចំនួនឡើយ ពោលគឺទាំងមេដឹកនាំនយោបាយ និងអ្នកគាំទ្រនយោបាយឥណ្ឌូណេស៊ី គោរពតាមអាណត្តិដឹកនាំរៀងៗខ្លួន។ រហូតដល់មានអ្នកវិភាគ និងអ្នកស្រាវជ្រាវមួយចំនួន ហៅឥណ្ឌូណេស៊ី ថាជាប្រទេសដែលមានភាពចាស់ទុំជាងគេផ្នែកលទ្ធិប្រជាធិបតេយ្យនៅតំបន់ផង៕