អន្តរជាតិ
លោកតា Matsumoto និងលោកយាយ Sonoda ជាប្តីប្រពន្ធដែលមានអាយុច្រើនជាងគេលើលោក
×![]()
ដោយ: ធីតា
ប្តីប្រពន្ធជនជាតិជប៉ុន ដែលបូកអាយុបញ្ចូលគ្នាឡើងដល់ទៅ២០៨ឆ្នាំ បានប្រារព្ធខួបអាពាហ៍ពិពាហ៍ទី៨០ឆ្នាំរបស់ខ្លួន កាលពីពេលថ្មីៗកន្លងមកនេះ។ ឈ្មោះរបស់ពួកគាត់ត្រូវបានចុះបញ្ជីក្នុងសៀវភៅកំណត់ត្រាពិភពលោក Guinness World Records ក្នុងនាមជា ប្តីប្រពន្ធដែលនៅរស់ ហើយមានអាយុចាស់ជាងគេលើពិភពលោក Oldest living married couple by aggregate age ។
លោកតា Masao Matsumoto វ័យ១០៨ឆ្នាំ និងលោកយាយ Miyaoko Sonoda អាយុ១០០ឆ្នាំ មានចំណងអាពាហ៍ពិពាហ៍ជាមួយគ្នាតាំងពីថ្ងៃទី២០ ខែកក្កដា ឆ្នាំ១៩៣៧មក ពោលគឺមានរយៈពេលជាង៨០ឆ្នាំទៅហើយ។ ពួកគាត់មានកូនស្រី៥នាក់ (Etsuko អាយុ៧៧ឆ្នាំ Chizuyo អាយុ៧៥ឆ្នាំ Emiko អាយុ៦៨ឆ្នាំ និង Hiromi អាយុ៦៦ឆ្នាំ) ចៅសរុប១៣នាក់ ហើយរំពឹងថា បានចៅទួតទី២៥នៅចុងខែសីហា នេះ។
គិតត្រឹមថ្ងៃទទួលបានកំណត់ត្រាពិភពលោក នាថ្ងៃទី២៥ ខែកក្កដា លោកតា Masao និងលោកយាយ Miyako មានអាយុសរុបបញ្ចូលគ្នាចំនួន២០៨ឆ្នាំ និង២៥៩ថ្ងៃ ដោយតិចជាងកំណត់ត្រារបស់ប្តីប្រពន្ធន័រវែស Karl Dolven និង Gurdren Dolven ដែលមានអាយុបូកបញ្ចូលគ្នាឡើងដល់២១០ឆ្នាំ ១ខែ និង៣៤ថ្ងៃ បន្ទាប់ពីលោកយាយ Gudrun បានទទួលមរណភាពនៅឆ្នាំ២០០៤។
កើតនៅតំបន់ Oita ប្រទេសជប៉ុនដូចគ្នា លោកតា Masao និងលោកយាយ Miyako បានស្គាល់គ្នា ក្រោមការណែនាំពីមិត្តភក្តិម្នាក់។ អាពាហ៍ពិពាហ៍នៅពេលនោះ ស្ទើរតែមិនអាចរៀបចំទៅបានដោយសារតែពេលថ្ងៃកម្មវិធីមកដល់ លោកតា Masao ស្ថិតនៅតំបន់ផ្សេងនៅឡើយ ដោយសារគាត់ជាប់ទៅបង់បំណុលឲ្យបងប្រុស។ ក្រោយការពន្យាពេលបន្តិច កម្មវិធីក៏ដំណើរការ។ ពួកគាត់ឆ្លងកាត់ការបែកបាក់គ្នាជាច្រើនលើក ជាពិសេសនៅពេលដែលលោកតា Masao ត្រូវបំពេញកាតាព្វកិច្ចយោធា៕
Tag:
Guinness World Records
© រក្សាសិទ្ធិដោយ thmeythmey.com
