ជាតិ
រដ្ឋមន្ត្រីអប់រំ កំណត់កម្មវិធីអប់រំនៅកម្ពុជា ឲ្យដូចប្រទេសសិង្ហបុរី
× ភ្នំពេញ៖ រយៈពេល៥ឆ្នាំហើយ ដែលការអប់រំនៅកម្ពុជា មានភាពប្រសើរឡើង ក្រោមការដឹកនាំរបស់រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ។ រដ្ឋមន្ត្រីរូបនេះ បានកែប្រែគុណភាពអប់រំ តាមរយៈការដាក់ចេញគោលនយោបាយរឹតបន្តឹងការប្រឡង ក្រោមពាក្យស្លោកថា«អ្នកចេះ គឺជាប់»។ ដ្បិតរឹតបន្តឹងការប្រឡងមែន ប៉ុន្តែការដាក់ចេញកម្មវិធីសិក្សា ឲ្យមានគុណភាពខ្ពស់នោះ ក៏ជារឿងចាំបាច់ផងដែរ។ ក្រសួងអប់រំ សម្រេចយកស្តង់ដារអប់រំនៅប្រទេសសិង្ហបុរី មកពង្រឹងការអប់រំនៅកម្ពុជា។
«ខ្ញុំមិននឹកស្មានថា ការកំណែទម្រង់ការអប់រំនេះ បានទទួលជោគជ័យដល់កម្រិតនេះទេ ហើយវាអាចឲ្យមានការផ្លាស់ប្ដូរឥរិយាបទ ផ្លាស់ប្តូរឲ្យបង្កើតមានចលនាគាំទ្រ សូម្បីតែគ្រូក៏មានកិត្តិយសជាងមុនដែរ»។ នេះជាមោទកភាពរបស់រដ្ឋមន្ត្រីក្រសួងអប់រំ ដែលឆ្លើយនឹងសំនួររបស់អ្នកសារព័ត៌មានជុំវិញបញ្ហាវិស័យអប់រំនៅកម្ពុជា។
ស្ថិតនៅក្នុងមណ្ឌលប្រឡងនៃវិទ្យាល័យព្រះស៊ីសុវត្ថិលោក ហង់ ជួនណារ៉ុន ដែលចោមរោមដោយក្រុមអ្នកសារព័ត៌មាននោះ បានវាយតម្លៃថា ការរឹតបន្តឹងការប្រឡង៥ឆ្នាំនេះ នឹងជួយឲ្យសិស្សដែលប្រឡងជាប់ទាំងនោះ មានចំណេះដឹងពិតប្រាកដ ហើយអាចប្រកួតប្រជែងសមត្ថភាពការងារជាមួយប្រទេសក្នុងតំបន់ និងលើសាកលលោកផង។ ដ្បិតការរឹតបន្តឹងការប្រឡង ទទួលបានការគាំទ្រមែន ប៉ុន្តែវានៅតែមានការខ្វះខាតខ្លះ ដែលក្រសួងអប់រំ មើលឃើញ ហើយត្រូវបំពេញបន្ថែម។
«ខ្ញុំនៅរង់ចាំការបង្កើតរាជរដ្ឋាភិបាលថ្មី ដែលសម្ដេច ហ៊ុន សែន នឹងប្រកាសនៅថ្ងៃទី៦ កញ្ញាខាងមុខនេះ ហើយនិងការប្រជុំគណៈរដ្ឋមន្ត្រីនៃនីតិកាលទី៦ ដែលសម្ដេច នឹងដាក់ចេញវិធានការបន្ថែមទៀត នៃការកំណែទម្រង់។ ហើយក្រសួងអប់រំ យុវជន និងកីឡា នឹងពិចារណាលើវិធានការបន្តទៀតថាតើក្រោយនីតិកាលទី៥ទៅ នៅមានអ្វីទៀត ដូច្នេះយើងមិនទាន់បើកវាំងនននៅឡើយទេ វាំងនននឹងបើកក្រោយថ្ងៃទី៧ កញ្ញា…»។ នេះជាការបញ្ជាក់របស់លោក ហង់ ជួន ណារ៉ុន។
មតិជាច្រើនបានរិះគន់ថា ក្រសួងអប់រំ រឹតបន្ដឹងតែការប្រឡងបាក់ឌុបទេ ប៉ុន្តែគុណភាពអប់រំចាប់តាំងពីថ្នាក់ទី១ ដល់ថ្នាក់ទី១២នេះ មិនទាន់រៀបចំបានល្អនោះទេ? ឆ្លើយនឹងសំនួរនេះលោក ហង់ ជួន ណារ៉ុន បាននិយាយថា ក្រសួងបានរៀបចំកំណែទម្រង់កម្មវិធីអប់រំ ចាប់តាំងពីថ្នាក់មត្តេយ្យ ដល់ថ្នាក់ទី១២នេះ ប៉ុន្តែដោយសារពួកគេទាំងនោះ មិនឃើញទិដ្ឋភាពជាក់ស្ដែង ទើបជាមានការរិះគន់បែបនេះ។
បើតាមរដ្ឋមន្ត្រីរូបនេះ ក្រសួងបានដាក់ចេញគោលនយោបាយកំណែទម្រង់ ដូចជាការកែលម្អវិធីសាស្ត្របង្រៀនថ្នាក់មត្តេយ្យ ដល់ថ្នាក់ទី១-៣ ,ពង្រឹងការគ្រប់គ្រងនៅតាមសាលារៀន និងមត្តេយ្យសិក្សា, វិធីសាស្ត្របង្រៀនអាននៅថ្នាក់រៀន និងបណ្ណាល័យ, ការបង្រៀនវិទ្យាសាស្ត្រ និងគណិតវិទ្យានៅថ្នាក់ដំបូង ,ការពិនិត្យកម្មវិធីសិក្សាគ្រប់កម្រិតពីថ្នាក់ទី១ ដល់ថ្នាក់ទី១២ ,ពិនិត្យឡើងវិញនូវសៀវភៅគោលសិក្សា និងវិធីសាស្ត្របង្រៀន រួមទាំងការបណ្ដុះគ្រូគរុកោស្យជាដើម។
ចំពោះគោលដៅរបស់លោក ហង់ ជួន ណារ៉ុន បានកំណត់យកកម្មវិធីអប់រំប្រទេសសិង្ហបុរី ជាអាទិភាពសម្រាប់ការអប់រំនៅកម្ពុជា។ ថ្លែងចំពោះមុខអ្នកសារព័ត៌មាន នៅថ្ងៃទី២០ សីហា នៃការប្រឡងសញ្ញាបត្រទុតិយសភូមិ (បាក់ឌុប) រដ្ឋមន្ត្រីអប់រំ បានបញ្ជាក់ដូច្នេះថា៖«ការអនុវត្តបែបអធិការកិច្ចនៅតាមសាលារៀន ដែលផ្ដោតលើសមាសភាព៤សំខាន់ គឺការគ្រប់គ្រងនិងការដឹកនាំរបស់នាយកសាលា, ការរៀននិងការបង្រៀន, ការកែលម្អលទ្ធផលសិក្សារបស់សិស្ស និងការចូលរួមរបស់មាតាបិតា និងសហគមន៍នៅតាមសាលារៀន។ ហើយចំណុចទី៣ធំនៃកំណែទម្រង់ គឺការពិនិត្យនិងវាយតម្លៃលើការសិក្សារបស់សិស្ស ដែលផ្ដោតលើចំណេះដឹងសិស្សខាងផ្នែកអក្សរសាស្ត្រខ្មែរ និងផ្នែកគណិតវិទ្យា ក៏ដូចវិទ្យាសាស្ត្រ…។ ហើយក្រសួងបានសម្រេចយកកម្មវិធីសិក្សាឲ្យដូចប្រទេសសិង្ហបុរី គឺយើងបង្រៀនសិស្សមិនឲ្យចេះតែទន្ទេញចាំទេ គឺឲ្យសិស្សចេះត្រិះរិះពិចារណា ចេះដោះស្រាយបញ្ហា ចេះធ្វើការងារជាក្រុម»។
បើតាមលោក ជួន ណារ៉ុន ក្រសួងនឹងបន្តកំណែទម្រង់គុណភាពអប់រំ នៅថ្នាក់ឧត្តមសិក្សាផងដែរ។
នេះជាឆ្នាំទី៥ហើយ នៃការរឹតបន្តឹងការប្រឡងក្រោមការដឹកនាំរបស់រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន ។ រដ្ឋមន្ត្រីរូបនេះ បានកែប្រែគុណភាពអប់រំ តាមរយៈការដាក់ចេញគោលនយោបាយរឹតបន្តឹងការប្រឡង ក្រោមពាក្យស្លោកថា«អ្នកចេះ គឺជាប់»៕
Tag:
ហង់ ជួនណារ៉ុន
អប់រំ
© រក្សាសិទ្ធិដោយ thmeythmey.com