ជាតិ
សម្ដេច ហ៊ុន សែន ស្នើតែងតាំងលោកហ៊ុន ម៉ាណែត កាន់តំណែងលោក មាស សុភា,លោក វង្ស ពិសេន ជំនួសលោក ប៉ុល សារឿន
× ភ្នំពេញ៖ សម្តេច ហ៊ុន សែន នាយករដ្ឋមន្ត្រី បានស្នើសុំព្រះមហាក្សត្រ តែងតាំង និងតម្លើងឋានន្ដរស័ក្ដិ នាយទាហានជាន់ខ្ពស់៣រូប ជាថ្នាក់ដឹកនាំកំពូលនៃកងយោធពលខេមរភូមិន្ទ។
យោងតាមលិខិតស្នើរបស់សម្ដេច ហ៊ុន សែន ចុះថ្ងៃទី៦ ខែកញ្ញានេះ សម្តេច បានស្នើតែងតាំង លោក ហ៊ុន ម៉ាណែត ជាមេបញ្ជាការកងទ័ពជើងគោក បន្ថែមលើមុខងារបច្ចុប្បន្ន។ លោក ហ៊ុន ម៉ាណែត បច្ចុប្បន្នជានាយសេនាធិការចម្រុះស្តីទី នៃកងយោធពលខេមរភូមិន្ទ និងត្រូវជំនួសតំណែងលោក មាស សុភា ដែលក្លាយជាទេសរដ្ឋមន្ត្រីទទួលបន្ទុកបេសសកម្មពិសេស។
ចំណែកលោក វង្ស ពិសេន ត្រូវបានស្នើតែងតាំងជាអគ្គមេបញ្ជាការនៃកងយោធពលខេមរភូមិន្ទ និងដំឡើងថ្នាក់នាយឧត្តមសេនីយ៍ ជំនួសលោក ប៉ុល សារឿន ជាទេសរដ្ឋមន្ត្រីទទួលបន្ទុកបេសសកម្មពិសេស។ លោក វង្ស ពិសេន បច្ចុប្បន្នមានតួនាទីជាមេបញ្ជាការរង និងជានាយសេនាធិការ កងរាជអាវុធហត្ថលើផ្ទៃប្រទេស។
លោក ឥត សារ៉ាត់ ត្រូវស្នើជានាយសេនាធិការចម្រុះ នៃកងយោធពលខេមរភូមិន្ទ បន្ថែមលើមុខងារបច្ចុប្បន្ន ជំនួសលោក គន់ គីម ដែលក្លាយជាទេសរដ្ឋមន្ត្រីទទួលបន្ទុកបេសសកម្មពិសេស។ បច្ចុប្បន្ន លោក ឥត សារ៉ាត់ គឺអគ្គមេបញ្ជាការរងនៃកងយោធពលខេមរភូមិន្ទ និងប្រធានគណៈកម្មការបាញ់គ្រាប់ពិត៕
© រក្សាសិទ្ធិដោយ thmeythmey.com