អន្តរជាតិ
លោក ម៉ាឌុយរ៉ូ ចង់ពហិការកិច្ចប្រជុំ UN នៅអាមេរិក ដោយខ្លាចគេលួចធ្វើឃាត
× ប្រធានាធិបតីវ៉េណេស៊ុយអេឡា លោក នីកូឡាស់ ម៉ាឌុយរ៉ូ បាននិយាយនៅថ្ងៃទី១៨ កញ្ញាថា លោកប្រហែលជាត្រូវលុបចោលទស្សនកិច្ចទៅកាន់អង្គការសហប្រជាជាតិ នៅទីក្រុងញូវយ៉កក្នុងសប្ដាហ៍នេះ។ មេដឹកនាំរូបនេះ បានបង្ហាញក្តីកង្វល់ថា គូប្រជែងរបស់លោក នឹងព្យាយាមធ្វើឃាតលោក ប្រសិនបើលោក ធ្វើដំណើរទៅកាន់បរទេស។
«អ្នកដឹងទេថា ពួកគេត្រៀមសម្លាប់ខ្ញុំជានិច្ច ប្រសិនបើមានឱកាសនោះ... ខ្ញុំចង់ទៅកាន់ទីក្រុងញូវយ៉ក តែខ្ញុំក៏ព្រួយបារម្ភពីសុវត្ថិភាពរបស់ខ្ញុំផងដែរ»។ លោក នីកូឡាស់ ម៉ាឌុយរ៉ូ បាននិយាយនៅឯសន្និសីទព័ត៌មានមួយនៅថ្ងៃទី១៨ ខែកញ្ញា ដែលផ្សាយដោយទីភ្នាក់ងារព័ត៌មាន Reuters។ ទន្ទឹមនឹងនេះ ប្រធានាធិបតីរូបនេះ បាននិយាយទៀតថា អតីតមន្ត្រីយោធាវ៉េណេស៊ុយអេឡា បានព្យាយាមផ្ដួលរំលំរដ្ឋាភិបាលរបស់លោក ដោយមានសហរដ្ឋអាមេរិកនៅពីក្រោយ។
បើពិតទៅ លោកម៉ាឌុយរ៉ូ ខកខានមិនបានចូលរួមក្នុងមហាសន្និបាតអង្គការសហប្រជាជាតិ តាំងពីឆ្នាំ២០១៥មកម្ល៉េះ។ ក្នុងឆ្នាំនេះ មហាសន្និបាតលើកទី៧៣ បានចាប់ផ្ដើម កាលពីថ្ងៃទី ១៨ កញ្ញា។
កាលពីខែសីហាកន្លងទៅ យន្តហោះដ្រូន២គ្រឿង បានផ្ទុះនៅទីប្រជុំជនមួយកន្លែងនារដ្ឋធានីការ៉ាកាស់ ទីដែលលោកម៉ាឌុយរ៉ូ បានថ្លែងសន្ទរកថា។ ក្នុងហេតុការណ៍នេះ ទាហាន៧រូប បានរងរបួស និងជនសង្ស័យជាច្រើននាក់ ត្រូវបានគេចាប់ខ្លួន ក្នុងនោះក៏មានមន្ត្រីយោធាមួយចំនួនផងដែរ។ លោក ម៉ាឌុយរ៉ូ បានអះអាងថា ហេតុការណ៍នេះ ជាអំពើប៉ុនប៉ងធ្វើឃាតលោកតែម្ដង។
កាសែត New York Times បានចុះផ្សាយកាលពីថ្ងៃទី០៨ កញ្ញាថា មន្ត្រីអាមេរិក ធ្លាប់បានទៅជួបជាមួយនឹងក្រុមបះបោរយោធាវ៉េណេស៊ុយអេឡា។ ការណ៍នេះហើយដែលនាំឲ្យលោកម៉ាឌុយរ៉ូ ហ៊ានចោទប្រកាន់រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ ពាក់ព័ន្ធនឹងការធ្វើអន្តរាគមន៍ និងគាំទ្រការធ្វើរដ្ឋប្រហារ ក្នុងប្រទេសវ៉េណេស៊ុយអេឡា។
ទាក់ទិននឹងរឿងនេះ ក្រុមប្រឹក្សាសន្តិសុខជាតិអាមេរិក បានឆ្លើយតបវិញថា គោលនយោបាយរបស់អាមេរិកនៅពេលនេះ គឺចង់ឃើញវ៉េណេស៊ុយអេឡាមានសន្តិភាព និងត្រឡប់ទៅកាន់របបប្រជាធិបតេយ្យដែលមានសណ្ដាប់ធ្នាប់ដូចមុនវិញ។
បច្ចុប្បន្ននេះសេដ្ឋកិច្ចវ៉េណេស៊ុយអេឡា បានដាំក្បាលចុះយ៉ាងខ្លាំង ក្រោមការដឹកនាំរបស់លោក ម៉ាឌុយរ៉ូ ជាមួយនឹងអតិផរណាប្រមាណ ២០ម៉ឺនភាគរយ។ ការធ្លាក់ដុនដាបយ៉ាងធ្ងន់ធ្ងរនេះ បណ្ដាលឲ្យប្រជាជនវ៉េណេស៊ុយអេឡាពិបាកក្នុងការទិញសម្ភារៈ ថ្នាំសង្កូវ និងអាហារជាដើម៕
Tag:
វ៉េណេស៊ុយអេឡា
លោក នីកូឡាស់ ម៉ាឌុយរ៉ូ
មហាសន្និបាតអង្គការសហប្រជាជាតិ
© រក្សាសិទ្ធិដោយ thmeythmey.com