អាល្លឺម៉ង់ប្រជែងឈ្នះតួកគីលើសិទ្ធិធ្វើម្ចាស់ផ្ទះ Euro ឆ្នាំ ២០២៤

កីឡាអន្តរជាតិ

អន្តរជាតិ

អាល្លឺម៉ង់ប្រជែងឈ្នះតួកគីលើសិទ្ធិធ្វើម្ចាស់ផ្ទះ Euro ឆ្នាំ ២០២៤

28, Sep 2018 , 10:46 am

រូបភាព

ដោយ: ទេព ពិទូរ្យ

អាល្លឺម៉ង់ប្រជែងឈ្នះតួកគីដើម្បីទទួលបានសិទ្ធិរៀបចំធ្វើជាម្ចាស់ផ្ទះពានរង្វាន់ Euro 2024 បន្ទាប់ពីនាំមុខការបោះឆ្នោតដែលធ្វើឡើងដោយគណៈកម្មាធិការប្រតិបត្តិរបស់របស់សហព័ន្ធកីឡាបាល់ទាត់ទ្វីបអឺរ៉ុប (UEFA) នៅថ្ងៃទី២៧ ខែកញ្ញា ឆ្នាំ២០១៨។

ប្រទេសទាំងពីរបានធ្វើបទបង្ហាញដេញថ្លៃចុងក្រោយមុនពេលការបោះឆ្នោតបានធ្វើឡើងនៅទីស្នាក់ការរបស់ UEFA ក្នុងក្រុង Nyon ប្រទេសស្វីស។

នយោបាយសាមគ្គីភាពជាតិ និងការគោរពសិទិ្ធមនុស្សនៅក្នុងប្រទេសតួកគីបានលេចឡើងជាប្រធានបទសំខាន់ និងជាថ្នូរដើម្បីយកទៅប្រជែងធ្វើជាម្ចាស់ផ្ទះព្រឹត្តិការណ៍កីឡាបាល់ទាត់ប្រចាំតំបន់អឺរ៉ុបនេះ។

នៅទីបំផុតលទ្ធផលមិនបានដូចបំណងនោះទេ។ អាល្លឺម៉ង់ដែលបានទទួលការពេញចិត្តនោះបានឈ្នះសំឡេងឆ្នោតក្នុងចំណោមសមាជិកគណៈកម្មាធិការប្រតិបត្តិរបស់ UEFA ក្នុងលទ្ធផល ១២ ទល់នឹង ៤ និងពហិការម្នាក់។

ការសម្រេចចិត្តនេះមានន័យថាប្រទេសអាល្លឺម៉ង់អាចរៀបចំការប្រកួតជើងឯកអ៊ឺរ៉ុបជាលើកដំបូងរបស់ខ្លួនក្នុងនាមជាប្រទេសបង្រួបបង្រួម បន្ទាបពី អាល្លឺម៉ង់ខាងលិច ធ្វើព្រឹត្តិការណ៍នេះម្តងនៅឆ្នាំ១៩៨៨។

ចំណែកតួកគី ពួកគេមិនធ្លាប់បានរៀបចំការប្រកួតកីឡាបាល់ទាត់លំដាប់អន្តរជាតិសំខាន់ៗនៅឡើយទេ។

ប្រទេសនេះបានបង្ហាញការប៉ុនប៉ងជាច្រើនលើកដើម្បីធ្វើជាម្ចាស់ផ្ទះ Euro ឆ្នាំ២០០៨, ២០១២ និង ២០១៦ ក៏ដូចជាការប្រកួតកីឡាអូឡាំពិកនៅរដូវក្តៅឆ្នាំ ២០២០ តែត្រូវបរាជ័យទាំងអស់៕