អត្ថបទពាណិជ្ជកម្ម
អង្គការម៉ារីស្តូប ប្រារព្ធព្រឹត្តិការណ៍សាធារណៈជាលើកដំបូងស្តីពី «សិទ្ធិក្នុងការជ្រើសរើស»
×![]()
ថ្ងៃទី ២៨ ខែកញ្ញា កន្លងទៅនេះ អង្គការម៉ារីស្តូបបានរៀបចំព្រឹត្តិការណ៍មួយស្ដីពី «សិទ្ធិក្នុងការជ្រើសរើស» នាសាលអង្គរ - គីហ្សូណា នៃមជ្ឈមណ្ឌលសហប្រតិបត្តិការកម្ពុជា - ជប៉ុន (CJCC)។ កម្មវិធីនេះបង្កើតឡើងក្នុងគោលបំណងលើកកម្ពស់ការយល់ដឹងអំពីសិទ្ធិស្ត្រីក្នុងការទទួលបានព័ត៌មានទាក់ទងទៅនឹងជម្រើស និងសេវាសុខភាពបន្តពូជដែលមានសុវត្ថិភាព ប្រសិនបើពួកគេសម្រេចចិត្តចង់បញ្ចប់ការមានផ្ទៃពោះ។
កម្មវីធីដ៏មានសារៈប្រយោជន៍នេះមានការចូលរួមពីស្ត្រី និងបុរសកម្ពុជា ក្នុងព្រឹត្តិការណ៍ដែលមានលក្ខណៈវិជ្ជមាន ផុសផុល និងពោរពេញដោយព័ត៌មានសំខាន់ៗ ដើម្បីជាកិច្ចចាប់ផ្តើមនៃព្រឹត្តិការណ៍ផ្សព្វផ្សាយ «សិទ្ធិក្នុងការជ្រើសរើស»។
ពិតណាស់នៅក្នុងប្រទេសកម្ពុជា ការរំលូតកូន មានភាពស្របច្បាប់តាំងពីឆ្នាំ ១៩៩៧ មកម្លេះ ទោះជាយ៉ាងណា ក៏មានស្ត្រីជាច្រើនដែលនៅតែយល់ច្រឡំថា ការរំលូតកូន គឺជារឿងមិនស្របច្បាប់។ ទាំងនេះ គឺដោយសារតែពួកគេទទួលបានព័ត៌មានមិនគ្រប់គ្រាន់ ព្រមទាំងមានការរើសអើងពីសង្គមផងដែរ ដែលជាលទ្ធផលជម្រុញឲ្យស្ត្រីសម្រេចចិត្តស្វែងរកសេវាដែលគ្មានសុវត្ថិភាព។បើតាមប្រសាសន៍របស់ លោកស្រី Amy Williamson នាយិកាអង្គការម៉ារីស្តូបអន្តរជាតិប្រចាំនៅកម្ពុជា បានមានប្រសាសន៍ថា ៖ «ស្ត្រីកម្ពុជាជាច្រើននាក់មានអារម្មណ៍ភ័យខ្លាច និងឯកា នៅពេលដែលពួកគេដឹងថាខ្លួនមានផ្ទៃពោះដោយឥតព្រាងទុក។ បទពិសោធន៍ដ៏ឈឺចាប់នេះអាចបង្កជាគ្រោះថ្នាក់ដ៏ធ្ងន់ធ្ងរ។ កង្វះការយល់ដឹងអំពីសិទ្ធិស្របច្បាប់នៃការទទួលសេវារំលូតកូន អាចនាំឲ្យស្ត្រីយឺតយ៉ាវក្នុងការស្វែងរកសេវាថែទាំសុខភាព នឹងអាចឈានទៅដល់ការទទួលសេវារំលូតកូនដែលគ្មានសុវត្ថិភាព»។
លោកស្រីបន្ថែមទៀតថា៖ «ព្រឹត្តិការណ៍ «សិទ្ធិក្នុងការជ្រើសរើស» នេះនឹងផ្ដល់នូវព័ត៌មានសំខាន់ៗសម្រាប់ជាដំណោះស្រាយឆ្លើយតបទៅនឹងបញ្ហារបស់ស្ត្រី ដូច្នេះតទៅថ្ងៃមុខនឹងមានតែស្ត្រីតិចតួចប៉ុណ្ណោះ ដែលត្រូវប្រឈមនឹងភាពភ័យខ្លាចនេះតែម្នាក់ឯង។ យើងចង់ឲ្យស្ត្រីទាំងអស់នៅក្នុងប្រទេសកម្ពុជា រស់នៅក្នុងជីវិតដ៏ស្រស់បំព្រងទៅតាមអ្វីដែលពួកគេជ្រើសរើស ហើយឲ្យពួកគេដឹងថា ពួកគេអាចទាក់ទងមកកាន់អង្គការម៉ារីស្តូបបាន ប្រសិនបើពួកគេត្រូវការជំនួយ ព័ត៌មាន ឬការគាំទ្រផ្សេងៗ»។
លើសពីនេះសាធារណជនដែលចូលរួមក្នុងព្រឹត្តិការណ៍នេះនឹងមានឱកាសរួមចំណែក ក្នុងការផ្ដល់ឲ្យស្ត្រីកម្ពុជាគ្រប់រូបទទួលបាននូវព័ត៌មាន និងសេវាដែលមានសុវត្ថិភាព ក្នុងគោលបំណងជួយឲ្យពួកគេរស់នៅក្នុងជីវិតដ៏ស្រស់បំព្រងទៅតាមអ្វីដែលពួកគេជ្រើសរើស។ ស្តង់ថតរូប (photo booths) ត្រូវបានរៀបចំ សម្រាប់ឲ្យអ្នកចូលរួមអាចថតរូប និងចែកចាយទៅកាន់មិត្តភក្តិរបស់ពួកគេ តាមរយៈបណ្ដាញសង្គមផ្សេងៗ។ អ្វីដែលពិសេសទៅទៀត អ្នកចូលរួមទាំងអស់ទទួលបានអំណោយអនុស្សាវរីយ៍ដ៏ពិសេសមួយដែលឆ្លុះបញ្ចាំងពីប្រធានបទសិទ្ធិក្នុងការជ្រើសរើសនេះផងដែរ។
គួរបញ្ជាក់ថា សម្រាប់ស្ត្រីទាំងឡាយដែលមានបំណងចង់ទទួលបានដំបូន្មានល្អៗអំពីមធ្យោបាយពន្យារកំណើត ឬជម្រើសផ្សេងៗទាក់ទងនឹងការមានផ្ទៃពោះដោយចៃដន្យ ឬឥតព្រាងទុក អាចទំនាក់ទំនងទៅកាន់អង្គការម៉ារីស្តូបបាន។ ពួកគេអាចទូរស័ព្ទទៅកាន់អង្គការម៉ារីស្តូប តាមរយៈទូរស័ព្ទលេខ ០១២ ៩៩៩ ០០២ ឬ ០៩៨ ៩៩៩ ១០២ ឬតាមរយៈបណ្ដាញហ្វេសប៊ុក www.facebook.com/MarieStopesKH។ ស្ត្រីទាំងអស់ក៏អាចអញ្ជើញមកកាន់គ្លីនិកម៉ារីស្តូបដោយផ្ទាល់ដែលមានទីតាំងនៅក្នុងប្រទេសកម្ពុជា ឬនៅតាមសេវាសុខភាពសាធារណៈ ដើម្បីសាកសួរព័ត៌មានផ្សេងៗ។ សូមចូលទៅកាន់គេហទំព័ររបស់អង្គការម៉ារីស្តូប ដែលមានអាស័យដ្ឋាន ៖ www.mariestopes.org.kh៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
