លោក អាន់វ៉ា ថាការជ្រោមជ្រែងលោក មហាធៀ ដោះស្រាយបញ្ហាជាតិសំខាន់ជាងរឿងផ្ទេរអំណាច

អន្តរជាតិ

លោក អាន់វ៉ា ថាការជ្រោមជ្រែងលោក មហាធៀ ដោះស្រាយបញ្ហាជាតិសំខាន់ជាងរឿងផ្ទេរអំណាច

16, Oct 2018 , 8:19 pm

រូបភាព

ដោយ: សៅ ផលនិស្ស័យ (Sao Phal Niseiy)

លោក អាន់វ៉ា អ៊ីប្រាហ៊ីម បានត្រឡប់ចូលឆាកនយោបាយជាថ្មី បន្ទាប់ពីស្បថចូលកាន់តំណែងជាសមាជិកសភានៅថ្ងៃចន្ទទី ១៥ ខែតុលានេះ។ បានតំណែងតំណាងរាស្ត្រជាការបំពេញលក្ខខណ្ឌ ដើម្បីឈានទៅចាប់កៅអីនាយករដ្ឋមន្ត្រីជំនួសលោក មហាធៀ មហាម៉ាត់។ ប៉ុន្តែអ្នកនយោបាយរូបនេះបានសង្កត់ធ្ងន់ថា ការបន្តជ្រោមជ្រែងលោក មហាធៀ ដោះស្រាយបញ្ហាជាតិជារឿងសំខាន់បំផុត ហើយការផ្ទេរតំណែងឲ្យលោកពេលណានោះ មិនមែនជារឿងអាទិភាពឡើយក្នុងពេលនេះ។

បន្ទាប់ពីឈ្នះការបោះឆ្នោតបង្គ្រប់អាសនៈនៅក្រុង Port Dickson កាលពីថ្ងៃសៅរ៍ដោយសំឡេងភាគច្រើន ២៣៥៦០ មេបក្សប្រឆាំងម៉ាឡេស៊ីដ៏មានឥទ្ធិពល និងជាអតីតឧបនាយករដ្ឋមន្ត្រីលោក អាន់វ៉ា អ៊ីប្រាហ៊ីម ត្រឡប់ចូលស្បថចូលកាន់តំណែងជាតំណាងរាស្ត្រថ្មី។

វាជាការត្រឡប់ចូលនយោបាយជាថ្មីរបស់អ្នកនយោបាយរូបនេះក្រោយបាត់វត្តមានក្នុងរយៈពេលបីឆ្នាំមកនេះព្រោះត្រូវជាប់ពន្ធនាគារព្រោះជាប់ចោទបទមានសម្ព័ន្ធភាពផ្លូវភេទជាមួយមនុស្សប្រុសដូចគ្នា។ លោក ទើបតែត្រូវបានមហាក្សត្រលើកលែងទោសឲ្យក្រោយសម្ព័ន្ធបក្សប្រឆាំង Pakatan Harapan ដែលដឹកនាំដោយលោក មហាធៀ ឈ្នះឆ្នោតភ្លូកទឹកភ្លូកដីក្នុងខែឧសភាប៉ុណ្ណោះ។

បើតាមការទីភ្នាក់ងារព័ត៌មានម៉ាឡេស៊ី Bernama ពេលស្បថចូលកាន់តំណែងរបស់លោក អាន់វ៉ា នៅសភាម៉ាឡេស៊ីព្រឹកថ្ងៃចន្ទ គេឃើញមានវត្តមានរបស់នាយករដ្ឋមន្ត្រី មហាធៀ មហាម៉ាត់ និងឧបនាយករដ្ឋមន្ត្រី Wan Azizah Wan Ismail ដែលជាភរិយារបស់លោក អាន់វ៉ា ផងដែរ។

អ្វីដែលគួរឲ្យកត់សម្គាល់ លោក អាន់វ៉ា បានបញ្ជាក់ក្នុងពេលស្បថចូលកាន់តំណែងជាតំណាងរាស្ត្រនេះដែរថា លោកគ្មានគោលដៅកាន់តំណែងផ្សេងទៀតក្នុងគណៈរដ្ឋមន្ត្រីឡើយ ហើយលោកចង់ផ្តោតសំខាន់លើកិច្ចការងារសភាជាពិសេសរៀបចំកែទម្រង់ស្ថាប័ននេះផង។

តាមពិតទៅលោក អាន់វ៉ា ធ្លាប់ជាសមាជិកបក្សកាន់អំណាច UMNO និងកាន់តំណែងរដ្ឋមន្ត្រីហិរញ្ញវត្ថុផង ប៉ុន្តែលោកត្រូវបានបណ្តេញចេញពីតំណែងនៅក្នុងឆ្នាំ ១៩៩៨ ដោយសារមានជម្លោះជាមួយលោក មហាធៀ ជុំវិញបញ្ហាសេដ្ឋកិច្ចជាតិ។ ក្រោយត្រូវបណ្តេញចេញពីតំណែង លោក អាន់វ៉ា បានដឹកនាំចលនាបាតុកម្មដែលទាមទារកំណែទម្រង់រដ្ឋដែលគេស្គាល់ថា «Reformasi Movement» ក្នុងពេលដែលម៉ាឡេស៊ីក៏ដូចជាតំបន់ទាំងមូលប្រឈមនឹងវិបត្តិសេដ្ឋកិច្ច។ ប៉ុន្មានខែក្រោយមក លោក អាន់វ៉ា ត្រូវបានចាប់ខ្លួន និងរងការកាត់ទោសឲ្យជាប់ពន្ធនាគារពីបទរួមភេទជាមួយមនុស្សប្រុសដូចគ្នានិងពុករលួយ ដោយរដ្ឋាភិបាលរបស់លោក មហាធៀ ដែរ។

ដល់ឆ្នាំ ២០០៤ ពេលដែលម៉ាឡេស៊ីមាននាយករដ្ឋមន្ត្រីថ្មីគឺលោក Abdullah Ahmad Badawi លោក អាន់វ៉ា ត្រូវបានគេដោះលែងឲ្យមានសេរីភាពវិញ។ ប៉ុន្តែក្នុងឆ្នាំ ២០១៥ លោកត្រូវបានគេកាត់ទោសម្តងទៀតក្រោមបទចោទដដែលក្រោមការដឹកនាំរបស់អតីតនាយករដ្ឋមន្ត្រី ណាជីប រ៉ាហ្សាក់ម្តង។ វាយុទ្ធសាស្ត្របិទផ្លូវសត្រូវនយោបាយរបស់ខ្លួន ដោយសារលោក អាន់វ៉ា មានប្រជាប្រិយភាពខ្ពស់ក្នុងពេលនោះ។

យ៉ាងណាមិញ ពេលស្ថិតក្នុងពន្ធនាគារ លោក អាន់វ៉ា បានចាប់ដៃជាមួយលោក មហាធៀ ដែលជាសត្រូវចាស់ដោយទុកអតីតកាលជូរចត់មួយឡែកដើម្បីបង្កើតសម្ព័ន្ធនយោបាយរួមគ្នា ដើម្បីធ្វើយ៉ាងណាយកឈ្នះការបោះឆ្នោតសភាកាលពីខែឧសភាកន្លងទៅ។ ក្រោយឈ្នះការបោះឆ្នោតនេះ លោក មហាធៀ បានស្នើសុំឲ្យព្រះមហាក្សត្រលើកលែងទោសឲ្យលោក អាន់វ៉ា ហើយការលើកលែងទោសនេះបើកផ្លូវឲ្យលោកត្រឡប់ចូលនយោបាយជាថ្មីដែរ។ ម្យ៉ាងទៀតក្រោមកិច្ចព្រមព្រៀងនយោបាយរួមគ្នានេះ លោក មហាធៀ ត្រូវធានាឲ្យមានការផ្ទេរអំណាចនាយករដ្ឋមន្ត្រីទៅលោក អាន់វ៉ា ជានាយករដ្ឋមន្ត្រីទីប្រាំបីផង។

អាន់វ៉ា៖ រឿងផ្ទេរតំណែងខ្ញុំមិនសំខាន់ទេ ហើយកុំរំខានការដឹកនាំប្រទេសរបស់លោក មហាធៀដូចបានបញ្ជាក់ខាងដើមស្រាប់ ក្រោមកិច្ចព្រមព្រៀងនយោបាយរួមគ្នាដែលមានក្នុងសម្ព័ន្ធបក្សប្រឆាំង Pakatan Harapan ដឹកនាំដោយលោក មហាធៀ ការផ្ទេរអំណាចត្រូវធ្វើឡើងក្នុងរយៈពេលពីរឆ្នាំក្នុងអាណត្តិដឹកនាំរបស់រដ្ឋាភិបាលថ្មីនេះ។ ប៉ុន្តែការអនុវត្តជាក់ស្តែងអាចនឹងប្រែប្រួល ហើយវាអាស្រ័យតាមការចរចាគ្នាដែរ។ សម្រាប់លោកផ្ទាល់ បច្ចុប្បន្នវាមិនមែនជាពេលវេលាសមស្របសម្រាប់លោកឡើយ។

លោក អាន់វ៉ា ដែលនឹងត្រូវក្លាយជានាយករដ្ឋមន្ត្រីទីប្រាំ បានឆ្លើយតបសំណួរអ្នកកាសែតថ្ងៃចន្ទទី ១៥ ខែតុលាថា វាគ្មានពេលវេលាកំណត់ច្បាស់ថា ពេលណាលោកនឹងត្រូវទទួលតំណែងនាយករដ្ឋមន្ត្រីឡើយ ហើយលោកជឿជាក់ថា វាមិនមែនជារឿងអាទិភាពដែរ។ លោកសង្កត់ធ្ងន់ថា ស្ថានភាពបច្ចុប្បន្ន ការដោះស្រាយបញ្ហាជាតិសំខាន់ជាង ហើយរឿងចាំបាច់គឺ ទាំងអស់គ្នាត្រូវជួយគាំទ្រនិងជ្រោមជ្រែងឲ្យការដឹកនាំរបស់នាយករដ្ឋមន្ត្រី មហាធៀ បន្តទៅមុខដោយគ្មានការរំខាន។

«ខ្ញុំមិនគិតថា ការផ្ទេរអំណាចជាបញ្ហាឡើយ។ ត្រូវទុកឱកាសឲ្យលោក មហាធៀ បន្តដឹកនាំដោយគ្មានការរំខាន់ដោយសារការកំណត់ពេលវេលា ឬការដាក់សម្ពាធនេះទៀត។ វាជារឿងសំខាន់»។ លោក អាន់វ៉ា អះអាងដូច្នេះ។

ផ្អែកលើស្ថានភាពជាក់ស្តែងកន្លងមកនេះ លោក មហាធៀ ក៏ហាក់ត្រៀមខ្លួនដែរដើម្បីផ្ទេរភារកិច្ច និងអំណាចឲ្យអ្នកថ្មីនោះ។ កាលពីដើមខែកញ្ញា លោក មហាធៀ បានប្រកាសច្បាស់ៗថា លោកមិនស្ទាក់ស្ទើរនឹងផ្ទេរអំណាចឲ្យនាយករដ្ឋមន្ត្រីទីប្រាំបីឡើយ ថ្វីបើលោកធ្លាប់បញ្ជាក់ថា លោកអាចកាន់តំណែងលើសពីរឆ្នាំដើម្បីដោះស្រាយបញ្ហាប្រឈមធំៗរបស់រដ្ឋឲ្យអស់សិនក្តី។ មេដឹកនាំវ័យ ៩៣ឆ្នាំរូបនេះ ក៏បានត្អូញត្អែរផងដែរពីភាពលំបាកក្នុងការដឹកនាំពេលដែលលោកកាន់តែចាស់ជរា ហើយអ្វីដែលសំខាន់នោះគឺរដ្ឋាភិបាលនេះកាន់តែពិបាកដឹកនាំដោយសារបញ្ហាពុករលួយកើនឡើងខ្លាំងពេក។

ប៉ុន្តែលោក អាន់វ៉ា ទំនងជាយល់ថា ក្នុងកាលៈទេសៈបច្ចុប្បន្ន ម៉ាឡេស៊ីត្រូវការលោក មហាធៀ ដឹកនាំដើម្បីដោះស្រាយបញ្ហាធំៗក្នុងប្រទេស។ អាចថា នេះគឺដោយសារលោក មហាធៀ ធ្លាប់ដឹកនាំប្រទេស រហូតដល់ ២២ឆ្នាំរួចទៅហើយពីឆ្នាំ ១៩៨១ ដល់ ២០០៣ ដោយលោកមានបទពិសោធន៍ខ្ពស់ និងដឹងច្បាស់កិច្ចការរាក់ជ្រៅ ក្នុងស្រុក និងក្រៅស្រុកផង។ ម្យ៉ាងទៀត លោក អាន់វ៉ា យល់ឃើញថា លោក មហាធៀ មានលទ្ធភាពនិងសមត្ថភាព បន្ត រ៉ាប់រងសំណុំរឿងពុករលួយកិបកេងលុយរដ្ឋពាក់ព័ន្ធអតីតនាយករដ្ឋមន្ត្រី ណាជីប រ៉ាហ្សាក់ មិនទាន់ដោះស្រាយចប់សព្វគ្រប់នោះ។

ក្រោយមហាក្សត្រលើកលែងទោសភ្លាមៗនោះ លោក អាន់ មហាធៀ បានទទួល់ស្គាល់ថា លោកជាអ្នកនយោបាយគិតច្រើន អាណិតគេច្រើន ហើយមិនហ៊ានសម្រេចចិត្តដាច់ណាត់ឡើយ។ ឯលោក មហាធៀវិញ គឺជាមនុស្សដែលស័ក្តិសមបំផុតក្នុងការកាន់តំណែងកំពូលពេលនេះ ដ្បិតថា លោកអាចប្រើកណ្តាប់ដៃដែកដើម្បីកម្ទេចឬបោសសម្អាតកម្អែលកខ្វក់នៃប្រព័ន្ធដឹកនាំពុករលួយបន្សល់ទុកពីរដ្ឋាភិបាលរបស់លោក ណាជីប បាន។