សម្ដេច ទៀ បាញ់ ៖បញ្ហាភេរវកម្ម ជារឿងចម្បង ដែលត្រូវនាំគ្នាដោះស្រាយឫសគល់

ជាតិ

សម្ដេច ទៀ បាញ់ ៖បញ្ហាភេរវកម្ម ជារឿងចម្បង ដែលត្រូវនាំគ្នាដោះស្រាយឫសគល់

22, Oct 2018 , 10:39 pm

រូបភាព

លោក ទៀ បាញ់ រដ្ឋមន្រី្តក្រសួងការពារជាតិ (រូបភាពបានពីក្រសួងការពារជាតិ)

ដោយ: អ៊ូ សុខមាន (OU Sokmean)

ភ្នំពេញ៖ ទោះបីកម្ពុជា មិនត្រូវបានគំរាមកំហែងដោយក្រុមអង្គការចាត់តាំងភេរវករក្នុងស្រុក ឬអន្តរជាតិណាមួយ ដែលកំពុងប្រតិបត្តិការនៅក្នុងប្រទេសក៏ដោយ។ ប៉ុន្តែរាជរដ្ឋាភិបាលកម្ពុជានៅតែមានការប្រុងប្រយ័ត្នចំពោះការគំរាមកំហែងក្នុងតំបន់ ហើយបានចាត់ទុកបញ្ហាភេរវកម្មជាផ្នែកមួយនៃការព្រួយបារម្ភចម្បងផ្នែកសន្តិសុខឆ្លងដែន។ នេះជាការលើកឡើងរបស់សម្ដេច ទៀ បាញ់ ក្នុងកិច្ចប្រជុំរដ្ឋមន្ត្រីការពារជាតិអាស៊ានលើកទី១២ នៅប្រទេសសិង្ហបុរី កាលពីថ្ងៃទី១៩តុលា ឆ្នាំ២០១៨។

សម្ដេច ទៀ បាញ់ បាននិយាយថា ក្រុមភេរវករកំពុងទាញយកប្រយោជន៍ពីប្រព័ន្ធផ្សព្វផ្សាយសង្គម ការទំនាក់ទំនងដោយប្រើប្រាស់កូដសម្ងាត់ និងការប្រើប្រាស់គេហទំព័រសម្ងាត់ ដែលពុំអាចមើលបានជាសាធារណៈ ដើម្បីផ្សព្វផ្សាយព័ត៌មានឃោសនា ទាញយកសមាជិកថ្មីៗ និងការផ្ទេរជំនាញក្នុងសមរភូមិពួកគេ ទៅកាន់អ្នកផ្សេងទៀត ដូចជាការរៀបចំក្បួនវាយប្រហារជាដើម។

រដ្ឋមន្ត្រីការពារជាតិរូបនេះ បានបន្ថែមថា ភេរវកម្មទាំងនោះនឹងមិនអាចត្រូវបានបង្ក្រាប ដោយមធ្យោបាយយោធាតែមួយមុខនោះទេ។ «យើងគួរចាប់ផ្តើមគិតគូរពិចារណាអំពី វិធានការការពារ សម្រាប់ដំណោះស្រាយយូរអង្វែងជាអចិន្ត្រៃយ៍ និងត្រូវតែបំពេញបន្ថែមនូវកិច្ចខិតខំប្រឹងប្រែង ប្រឆាំងភេរវកម្មរបស់យើងនៅក្នុងវិស័យសន្តិសុខ ជាមួយនឹងកិច្ចខិតខំប្រឹងប្រែងរួមគ្នា ដើម្បីកំណត់ និងដោះស្រាយឫសគល់ នៃបញ្ហាតែម្តង»។នេះជាការលើករបស់សម្ដេច ទៀ បាញ់។

កិច្ចប្រជុំរដ្ឋមន្ត្រីការពារជាតិអាស៊ានលើកទី១២ ស្តីពីការគំរាមកំហែងផ្នែកភេរវកម្ម និងអាវុធប្រល័យលោក មានអាវុធគីមី ជីវសាស្ត្រ និងវិទ្យុសកម្ម ធ្វើឡើងដើម្បីពិភាក្សា និងផ្លាស់ប្តូរទស្សនៈ ដោយផ្តោតលើការប្រឆាំងមនោគមវិជ្ជាភេរវកម្ម និងរាល់ភាពប្រឈមទាំងឡាយ រួមទាំងរកដំណោះស្រោយរួមគ្នា តាមរយៈការបង្កើនកិច្ចសហប្រតិបត្តការ ការហ្វឹកហ្វឺនល្បាតរួមគ្នា និងការចែករំលែកព័ត៌មានគ្នាទៅវិញទៅមក។