ជាតិ
ក្រសួងបី កំពុងរៀបចំសេចក្ដីប្រកាសរួម ដើម្បីទប់ស្កាត់ព័ត៌មានក្លែងក្លាយ
× ភ្នំពេញ៖ ក្រសួងចំនួន៣ បានកំពុងរៀបចំសេចក្ដីប្រកាសរួម ដើម្បីធ្វើយ៉ាងណាកាត់បន្ថយ និងលុបបំបាត់នូវព័ត៌មានក្លែងបន្លំ ដែលនាំឲ្យប៉ះពាល់ដល់សង្គម ។ ក្រសួងទាំង៣នោះ រួមមាន ក្រសួងព័ត៌មាន ក្រសួងប្រៃសណីយ៍ និងក្រសួងមហាផ្ទៃ។ នេះបើតាមការឲ្យដឹងពីលោក មាស សុភ័ណ្ណ អនុរដ្ឋលេខាធិការក្រសួងព័ត៌មាន នៅក្នុងកម្មវិធីសិក្ខាសាលាស្ដីពី«ការប្រឆាំងព័ត៌មានក្លែងបន្លំសម្រាប់អ្នកសារព័ត៌មានកម្ពុជា» ដែលរៀបចំដោយសារព័ត៌មានថ្មីៗ នៅថ្ងៃទី២៥ ខែតុលា ឆ្នាំ២០១៨។
FakeNews ឬព័ត៌មានក្លែងបន្លំ ត្រូវបានក្រសួងព័ត៌មានលើកឡើងថា ជាការព្រួយបារម្ភមិនត្រឹមតែប្រទេសកម្ពុជានោះទេ តែថែមទាំងជាការព្រួយបារម្ភរបស់ពិភពលោកផងដែរ។ នេះបើតាមការលើកឡើងរបស់លោក មាស សុភ័ណ្ណ អនុរដ្ឋលេខាធិការក្រសួងព័ត៌មាន។
ថ្លែងនៅក្នុងកម្មវិធីសិក្ខាសាលាស្ដីពី«ការប្រឆាំងព័ត៌មានក្លែងបន្លំសម្រាប់អ្នកសារព័ត៌មានកម្ពុជា» ដែលរៀបចំដោយសារព័ត៌មានថ្មីៗ លោកអនុរដ្ឋលេខាធិការ បានបញ្ជាក់ថា «បច្ចុប្បន្នក្រសួងព័ត៌មាន កំពុងតែសហការណ៍ជាមួយក្រសួងប្រៃសណីយ៍ និងក្រសួងមហាផ្ទៃ ដើម្បីបង្កើតសេចក្ដីប្រកាសរួមដើម្បីចាត់វិធានការលើសារព័ត៌មានក្លែងក្លាយ ដែលមាននៅកម្ពុជា»។
តំណាងក្រសួងព័ត៌មានខាងលើបានបញ្ជាក់ថា សិក្ខាសាលាដែលសារព័ត៌មានថ្មីៗបានធ្វើនេះ គឺមានសារៈសំខាន់ណាស់ ក្នុងការចែករំលែកបទពិសោធក្នុងការឈ្វេងយល់ពីផលប៉ះពាល់ និងឈ្វេងយល់ពីអ្វីដែលជាប្រភពនៃព័ត៌មានក្លែងបន្លំ។
បើតាមលោក ផាក់ ស៊ាងលី អនុប្រធានក្រុមអ្នកសារព័ត៌មានកាសែតភ្នំពេញប៉ុស្តិ៍ បានឲ្យដឹងថា បញ្ហា៨០ភាគរយដែលបានកើតឡើង គឺបណ្ដាលមកពីអ្នកចែករំលែក មិនមែនអ្នកផលិតព័ត៌មានក្លែងក្លាយនោះឡើយ។ លោកឡើងបែបនេះទៅតាមការសិក្សារបស់ក្រុមអ្នកជំនាញមកពីសហរដ្ឋអាមេរិក។
អនុប្រធានក្រុមអ្នកសារព័ត៌មានកាសែតភ្នំពេញប៉ុស្តិ៍ខាងលើ បានបន្ថែមថា អ្នកចែករំលែកព័ត៌មានក្លែងបន្លំភាគច្រើន គឺចំណេះដឹងនៅមានកម្រិត ហើយមិនបានចូលអានព័ត៌មានឲ្យបានច្បាស់ មើលមិនបានចប់ ឬមើលតែចំណងជើងជាដើម។ សម្រាប់អ្នកកាសែតជើងចាស់រូបនេះ បានណែនាំដល់ពលរដ្ឋថា មុនពេលចែករំលែកនូវព័ត៌មានណាមួយ ត្រូវពិចារណាសិន ដើម្បីដឹងថា គួរឬមិនគួរចែករំលែកព័ត៌មានណាមួយ។
ឆ្លើយតបនិងសំណួរដែលបានចោទថា ហេតុអ្វីបានជាសារព័ត៌មានអនឡាញ ឬបណ្ដាញសង្គម ហាក់មានការផ្សព្វផ្សាយព័ត៌មានក្លែងបន្លំច្រើនជាងគេ? លោក គុណ ចិន្តា ការីនិពន្ធព័ត៌មាន និងជាផលិតករកម្មវិធីទូរទស្សន៍ និងវិទ្យុVOD លើកឡើងថា មាន៣កត្តាសំខាន់ៗ។ កត្តាទី១ គឺដោយសារព័ត៌មានអនឡាញងាយស្រួលក្នុងការផ្សព្វផ្សាយ ដោយគ្រាន់តែមាន អ៊ីនធឺណិត និងទូរស័ព្ទ Smart phone។
កត្តាទី២ គឺដោយសារតែអ្នកសារព័ត៌មានខ្លះ ហេតុតែចង់បានរឿងទាក់ទាញអ្នកអាន មិនបានពិនិត្យពីប្រភពព័ត៌មានឲ្យបានច្បាស់ ក៏សម្រេចផ្សព្វផ្សាយព័ត៌មានទាំងនោះ។ កត្តាទី៣ គឺអ្នកព័ត៌មានដែលមិនបានទៅយកព័ត៌មានដោយផ្ទាល់ ដែលចាំតែដកស្រង់ព័ត៌មានពីគេហទំព័រដទៃ ដោយទាញយកមុំ ឬចំណងជើងផ្សេង ដែលអាចធ្វើឲ្យខុសខ្លឹមសារដើមនៃព័ត៌មាន។
ការីនិពន្ធព័ត៌មានរបស់VODរូបនេះ សង្កត់ធ្ងន់យ៉ាងដូច្នេះថា៖«ព័ត៌មានក្លែងក្លាយអាចបំផ្លាញដល់សង្គម និង ប្រជាធិបតេយ្យ» ។
ជាមួយគ្នានេះ នៅក្នុងសិក្ខាសាលាខាងលើ ក៏មានការលើកឡើងដែរថា ព័ត៌មានក្លែងក្លាយខ្លះ កើតចេញអ្នកព័ត៌មានប្រជាពលរដ្ឋ ដែលអ្នកទាំងនោះមិនបានសិក្សា ឈ្វេងយល់អំពីប្រភព និងការផ្សព្វផ្សាយព័ត៌មានឲ្យបានច្បាស់ឡើយ៕
© រក្សាសិទ្ធិដោយ thmeythmey.com