ជាតិ
រដ្ឋាភិបាល កំពុងពិភាក្សាលើសេចក្តីព្រាងច្បាប់ថវិកាជាតិ២០១៩ រូបប្រជុំគណៈរដ្ឋមន្រ្តីនៅថ្ងៃទី ២៦ តុលា ពីហ្វេសប៊ុកសម្តេច ស ខេង
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន កំពុងដឹកនាំកិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សាលើរបៀបវារៈចំនួន៣ ទាក់ទងនឹងថវិកាជាតិ និងកិច្ចព្រមព្រៀងមួយចំនួន។ នេះបើតាមហ្វេសប៊ុកលោក ផៃ ស៊ីផាន អ្នកនាំពាក្យរដ្ឋាភិបាល។
របៀបវារៈទាំង៣ ដែលគណៈរដ្ឋមន្ត្រីលើកមកពិភាក្សាគ្នានេះ រួមមាន ទី១ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩។ ទី២ សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៧ ។
ចំណែករបៀវារៈទី៣ បញ្ហាផ្សេងៗទាក់ទងសំណើសុំការយល់ព្រមពីគណៈរដ្ឋមន្ត្រី ដើម្បីសុំសច្ចាប័នពីស្ថាប័ននីតិប្បញ្ញត្តិលើកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល រវាងកម្ពុជា-វៀតណាម និងកម្ពុជា-ឥណ្ឌូនេស៊ី និងសន្ធិសញ្ញារវាងព្រះរាជាណាចក្រកម្ពុជា និងសហព័ន្ធរុស្ស៊ី ស្តីពីបត្យាប័ន។
គួរបញ្ជាក់ថា ថវិកាជាតិកាលពីឆ្នាំ២០១៨ មានទំហំ ២៤ ៣៧៥ ១០២ លានរៀល (ប្រហែល ៦០៣៣ លានដុល្លារ កើនឡើង ១៥,២ភាគរយ ធៀបនឹងថវិកាក្នុងច្បាប់ឆ្នាំ២០១៧។ ថវិកាចំណាយនេះ គឺស្មើ ២៤,៥៩ភាគរយនៃផលិតផលជាតិសរុប (GDP) ៕
Tag:
ហ៊ុន សែន
ថវិកាជាតិ
រដ្ឋាភិបាល
© រក្សាសិទ្ធិដោយ thmeythmey.com