ជាតិ
សុខភាព
ក្រសួងសុខាភិបាល ប្រកាសចាត់វិធានការតឹងរ៉ឹង លើគណនីហ្វេសប៊ុក៥ ដែលលក់ផលិតផលជំនួយផ្លូវភេទ
× ភ្នំពេញ៖ គណនី Facebook ចំនួន៥ដែលកំពុងប្រតិបត្តិការលក់ផលិតផលជំនួយផ្លូវភេទដោយគ្មានច្បាប់អនុញ្ញាត ត្រូវបានក្រសួងសុខាភិបាលចេញសេចក្ដីប្រកាសចាត់វិធានការរឹងរឹងតាមផ្លូវច្បាប់។ នេះបើតាមសេចក្ដីប្រកាសចុះថ្ងៃទី ២២ ខែតុលា ឆ្នាំ២០១៨។
ម្ចាស់គណនី Facebook ដែលបានលក់ផលិតផលជំនួយផ្លូវភេទ ដែលក្រសួងសុខាភិបាលរកឃើញថា គ្មានការអនុញ្ញាតពីក្រសួង ហើយដែលអាចធ្វើឲ្យប៉ះពាល់អាយុជីវិតអ្នកប្រើប្រាស់ ត្រូវបានក្រសួងសុខាភិបាលប្រកាសចាត់វិធានការតឹងរឹងតាមផ្លូវច្បាប់។ គណនី Facebook នោះមានដូចជា 4U, ជំនួយផ្លូវភេទបុរស, ជំនួយការបុរស, Krachaklum extra plus168 និងមហាខ្លាំង33Three។
គណនីទាំង៥នេះ បានផ្សព្វផ្សាយ និងចែកចាយឱសថឈ្មោះ Krachaidum Extract Plus ជាផលិតនាំមកពីប្រទេសថៃ ដែលបានផ្សព្វផ្សាយថា ជាប្រភេទឱសថបំប៉នផ្លូវភេទបុរស ការពារការដាច់សរសៃឈាម ជំងឺលើសឈាម និងជំងឺគាំងបេះដូង ឬអាចដុតបំផ្លាញជាតិខ្លាញ់ក្នុងសរសៃឈាមជាដើម។
តាមសេចក្ដីប្រកាសចុះថ្ងៃទី២២ ខែតុលា របស់ក្រសួងសុខាភិបាលបានឲ្យដឹងថា ផលិតផលនេះ គ្មានក្រុមហ៊ុននាំចូលត្រឹមត្រូវ និងការចុះបញ្ជីកា និងការអនុញ្ញាតផ្សព្វផ្សាយ ពីក្រសួងសុខាភិបាលឡើយ។
ដូច្នេះដើម្បីបង្ការគ្រោះថ្នាក់របស់អ្នកប្រើប្រាស់ ដែលអាចនាំឲ្យបាត់បង់ជីវិត ក្រសួងសុខាភិបាលបានប្រកាសឲ្យអ្នកដែលបានទិញឱសថ Krachaidum Extract Plus ទាំងអស់ត្រូវបញ្ឈប់ការប្រើប្រាស់ជាបន្ទាន់៕
Tag:
សុខាភិបាល
ផលិតផលជំនួយផ្លូវភេទ
© រក្សាសិទ្ធិដោយ thmeythmey.com