ជាតិ
សេដ្ឋកិច្ច
ប្រធានHR «AMK ជ្រើសរើសបុគ្គលិក ផ្ដោតលើអាកប្បកិរិយា សំខាន់ជាងជំនាញទៅទៀត»
×![]()
ដោយ: ថ្មីៗ
«ជំនាញ យើងអាចបណ្ដុះបាននៅពេលក្រោយ តែអាកប្បកិរិយា គឺសំខាន់ណាស់ ថាតើអ្នកនោះអាចធ្វើការជាក្រុមជាមួយយើងបានដែរឬទេ?» នេះជាការលើកឡើងរបស់អ្នកស្រី ពាំង ពិសាខ នាយិកាប្រតិបត្តិធនធានមនុស្សនៃគ្រឹះស្ថានមីក្រូហិរញ្ញវត្ថុ AMK នៅមុខអ្នកការសែតនាឱកាសពិព័រណ៍ការងារ និងផលិតភាពជាតិឆ្នាំ២០១៨ ។
អ្នកស្រី ពាំង ពិសាខ អះអាងថា AMK ជ្រើសរើសបុគ្គលិកឲ្យចូលធ្វើក្នុងស្ថាប័នខ្លួន ដោយផ្ដោតលើអត្តចរិតរបស់បេក្ខជន បេក្ខនារីម្នាក់ៗជាចម្បង ព្រោះថាឥរិយាបទគឺសំខាន់ណាស់ក្នុងការធ្វើការងារជាក្រុម រីឯជំនាញគឺអាចបណ្ដុះបណ្ដាល និងរៀនសូត្រពេលចូលបំពេញការងារបានតាមក្រោយ។
ប្រធានផ្នែកធនធានមនុស្ស (HR) រូបនេះ គូសបញ្ជាក់ថាAMK ជ្រើសរើសបុគ្គលិកថ្មី ជារួមគឺគិតទៅលើ អាកប្បកិរិយា ការតាំងចិត្តធ្វើការ និងភាពឧស្សាហ៍ព្យាយាម។
អ្នកស្រីទទួលស្គាល់ថា ការសង្កេតមើលអាកប្បកិរិយារបស់បេក្ខជនម្នាក់ៗដែលមកដាក់ CV ធ្វើការ គឺពិតជាពិបាក តែតាមរយៈបទពិសោធន៍នៃការជ្រើសរើស និងការតម្រូវឲ្យបម្រើការងារសាកល្បង នោះនឹងអាចមើលដឹង។ «វាពិតជាពិបាក តែដោយសារយើងមានបទពិសោធន៍ខាងផ្នែកធនធានមនុស្សស្រាប់ យើងនឹងអាចមើលដឹងពីបុគ្គលិកលក្ខណៈរបស់បុគ្គលនោះ។ ម្យ៉ាងទៀតមុន AMK មានគោលការណ៍តម្រូវឲ្យធ្វើការសាកល្បងរយៈពេល៣ខែសិន នេះហើយជាឱកាសឲ្យយើង ក៏ដូចជាបុគ្គលិក មើលគ្នាទៅវិញទៅមក»។ នេះជាប្រសាសន៍អ្នកស្រី ពាំង ពិសាខ ។
នាពេលថ្មីៗនេះ AMK ដែលមានធនធានមនុស្សជាង ២៧០០នាក់ បានប្រកាសជ្រើសរើសបុគ្គលិកចំនួន ៥០០នាក់បន្ថែម។ ក្នុងនោះការងារ ៣០០កន្លែងជាឱកាសសម្រាប់ចង់ធ្វើជាមន្ត្រីឥណទាន។
«ដោយសារចេះតែមានការរីកចម្រើនទៅមុខ ដូចនេះហើយ AMK តែងតែផ្ដល់ការងារថ្មីដល់សិស្សនិស្សិតជាងរៀងរាល់ឆ្នាំ»។ នេះជាការលើកឡើងរបស់អ្នកស្រី ពាំង ពិសាខ ។ អ្នកស្រីបញ្ជាក់ថា AMK ផ្ដល់ឱកាសដល់យុវជន មិនថាធ្លាក់បាក់ឌុប ឬជាប់បាក់ឌុប និស្សិត អ្នកមានបទពិសោធន៍ស្រាប់ ឬអ្នកចង់ចាប់ផ្ដើមការងារដំបូង ដើម្បីអាចចូលបម្រើការងារ និងទទួលការរីកចម្រើនជាមួយ AMK ៕
Tag:
AMK
បុគ្គលិក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
7 ថ្ងៃ
