អន្តរជាតិ
មហាធៀ បារម្ភថា រដ្ឋអ្នកមាននៅអាស៊ានអាចនឹងប្រើនយោបាយគាំពារនិយមប្រឆាំងប្រទេសក្រីក្រ
× នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់បានផ្តល់យោបល់ថា ការអនុវត្តគោលនយោបាយគាំពារនិយមជារឿងគ្រោះថ្នាក់សម្រាប់ពិភពលោក ហើយលោកបានទទូចឲ្យបណ្តារដ្ឋអាស៊ានបន្តគាំទ្រគោលការណ៍ពហុភាគីនិយម និងជំរុញពាណិជ្ជកម្មក្នុងតំបន់ឲ្យកាន់តែសកម្ម។
ក្នុងវេទិកាធុរកិច្ចអាស៊ាន និងវិនិយោគនៅដាច់ដោយឡែកពីកិច្ចប្រជុំអាស៊ានទី ៣៣នៅសិង្ហបុរីថ្ងៃអង្គារទី ១៣ វិច្ឆិកា នាយករដ្ឋមន្ត្រីម៉ាឡេស៊ី លោក មហាធៀ បានអំពាវនាវឲ្យអាស៊ានចៀសវាងឲ្យផុតពីការជ្រើសរើសយកគោលនយោបាយគាំពារនិយមដើម្បីដោះស្រាយបញ្ហាសេដ្ឋកិច្ចដែលខ្លួនប្រឈមបច្ចុប្បន្ន។
ទូរទស្សន៍សិង្ហបុរី Channel News Asia ផ្សាយថា មេដឹកនាំវ័យ ៩៣ឆ្នាំរូបនេះបាន ជម្លោះពាណិជ្ជកម្មក្តៅគគុករវាងមហាអំណាចសេដ្ឋកិច្ចអាមេរិកនិងចិននឹងបង្កើតឥទ្ធិពលអាក្រក់ ហើយនិងបណ្តាលឲ្យមានការដាក់ចេញវិធានការឆ្លើយតបវិញទៀតផងនៅពេលខាងមុខ។ ខ្លះអាចនឹងជ្រើសរើសយកគោលនយោបាយគាំពារនិយមដើម្បីដោះស្រាយបញ្ហាជាពិសេសប្រទេសអ្នកមានតែម្តង។
«ការកើនឡើងនៃការអនុវត្តគោលនយោបាយគាំពារនិយម ចលនាជាតិនិយម និងគោលនយោបាយឯកតោភាគីនិយមអាចនឹងកើតមានឡើងក្នុងតំបន់អាស៊ាន។ ប៉ុន្តែវាមិនមែនជាពេលដែលយើងត្រូវបិទទ្វារដោយការចាប់ផ្តើមយកវិធានការគាំពារនិយមឡើយ។ ផ្ទុយទៅវិញ យើងគួរបង្កើនសកម្មភាពកាន់តែសកម្មជាងមុនដើម្បីស្វែងរកដំណោះស្រាយរួមគ្នាតាមការពិភាក្សា ដូចជារវាងអាស៊ាននិងប្រទេសដទៃទៀត»។
លោកបន្តថា អាស៊ានចាំបាច់ត្រូវបន្តពន្លឿនសមាហរណកម្មសេដ្ឋកិច្ច និងពង្រីកពាណិជ្ជកម្មខាងក្នុងឲ្យបានកាន់តែរហ័សដើម្បីធានានិរន្តភាពនៃសេដ្ឋកិច្ច។
លោក មហាធៀ ផ្តល់យោបល់ជុំវិញបញ្ហាគោលនយោបាយគាំពារនិយមសេដ្ឋកិច្ចនេះកើតឡើងជម្លោះពាណិជ្ជកម្មរវាងអាមេរិក និងចិនបន្តឆាបឆេះ ហើយភាគីទាំងពីរមិនទាន់រកដំណោះស្រាយដើម្បីបញ្ចប់បញ្ហានេះឃើញនៅឡើយទេ។ ក្រៅពីភាគីជម្លោះ ប្រទេសជាច្រើនលើពិភពលោកសុទ្ធតែរងផលប៉ះពាល់ពីសង្គ្រាមពន្ធនេះដូចគ្នា។
ដោយឡែក លោក មហាធៀ បានធានាចំពោះមុខអ្នកជំនួញ និងមេដឹកនាំអាស៊ានដែលមានវត្តមានក្នុងវេទិកាថា រដ្ឋាភិបាលម៉ាឡេស៊ីត្រៀមខ្លួនរួចរាល់ហើយដើម្បីបង្កើនតួនាទីជាអ្នកដឹកនាំតំបន់ក្នុងបញ្ចេញយោបល់និងក្តីបារម្ភពីភាពតានតឹងនិងគ្រោះថ្នាក់នៃការអនុវត្តគោលនយោបាយគាំពារនិយមរាល់កិច្ចប្រជុំនានារបស់អង្គការពាណិជ្ជកម្មពិភពលោក។ លោកយល់ឃើញថា ការធ្វើបែបនេះគឺចូលរួមចំណែកពញ្ញាក់ស្មារតីប្រទេសនានាឲ្យបន្តគោរពបទបញ្ញត្តិអង្គការពាណិជ្ជកម្មពិភពលោក និងបន្តបើកចំហទ្វារសម្រាប់ការធ្វើពាណិជ្ជកម្មដោយគ្មានការរើសអើង៕
Tag:
មហាធៀ មហាម៉ាត់
ម៉ាឡេស៊ី
អាស៊ាន
សិង្ហបុរី
© រក្សាសិទ្ធិដោយ thmeythmey.com