ជាតិ
សេដ្ឋកិច្ច
កញ្ញា ពៅ មករា រកចំណូលបានជាង១លានរៀលក្នុងមួយថ្ងៃ ពីការលក់ចាហួយដូងក្រអូប
កញ្ញា ពៅ មករា ម្ចាស់យីហោ ចាហួយដូងក្រអូប
×![]()
ភ្នំពេញ៖ កញ្ញា ពៅ មករា រកចំណូលបានពីការលក់ចាហួយក្រអូប ជាមធ្យមប្រមាណ ១លានរៀលក្នុងមួយថ្ងៃ។ ម្ចាស់យីហោ«ចាហួយដូងក្រអូប» រូបនេះ ទទួលប្រាក់ចំណូលជាប្រចាំពីមុខរបស់ខ្លួន បានជាង២ឆ្នាំមកហើយ ក្នុងរយៈពេលកំពុងសិក្សាលើជំនាញឱសថការី នៅសាកលវិទ្យាលល័យមួយកន្លែង នៅរាជធានីភ្នំពេញ។
ជានិស្សិតមួយរូប សិក្សាលើជំនាញឱសថការី ដែលមានផ្នត់គំនិតជាសហគ្រិន ក្នុងការបើកអាជីវកម្មផ្ទាល់ខ្លួន កញ្ញា មករា បានសម្រេចចិត្តដើរលើអាជីវកម្មផលិតចាហួយដូងក្រអូប ដែលកំពុងមានការប្រកួតប្រជែងខ្លាំង លើអាជីវកម្មប្រភេទនេះ។ អាជីវកម្មផលិតចាហួយដូងក្រអូប របស់កញ្ញា មករា ទទួលបានការគាំទ្រជាខ្លាំងពីសំណាក់អតិថិជនគ្រប់វ័យ។
ក្នុងបទសម្ភាសជាមួយសារព័ត៌មានថ្មីៗ កញ្ញា២២ឆ្នាំរូបនេះ បាននិយាយថា ចាហួយដូងក្រអូបនេះ ជាប្រភេទអាជីវកម្មមួយថ្មី ដែលកំពុងក្លាយជាទីពេញនិយមក្នុងការទិញពិសារបស់មនុស្សគ្រប់វ័យនៅលើទីផ្សារបច្ចុប្បន្ន ដោយមានការកែច្នៃពីដូងក្រអូបស្រស់ៗ។ ចាហួយដូងក្រអូបរបស់កញ្ញា មករា មាន២ប្រភេទ គឺចាហួយជាផ្លែដូង មានតម្លៃ៦០០០រៀលក្នុងមួយផ្លែ និងចាហួយដូងក្រអូបដាក់ចានមានតម្លៃ២៥០០រៀល ក្នុងមួយចាន។
កញ្ញា វ័យក្មេងរូបនេះ បាននិយាយយ៉ាងដូច្នេះ «បានជាខ្ញុំសម្រេចចិត្តបើកអាជីវកម្មនេះឡើង ដោយសារខ្ញុំមានបងប្រុសជាម្ចាស់ចម្ការដូងក្រអូបស្រាប់ ហើយខ្ញុំក៏ចេះធ្វើចាហួយដូងទៀត។ ម្យ៉ាងវិញទៀត ដោយគិតថាវាជាឱកាសល្អមួយ សម្រាប់ខ្ញុំក្នុងការចាប់ផ្តើមអាជីវកម្មផ្ទាល់ខ្លួនជាលើកដំបូង ដើម្បីស្វែងរកចំណុចជោគជ័យនៃអាជីវកម្មមួយប្រាកដ»។
សព្វថ្ងៃ អាជីវកម្មផលិតចាហួយដូងក្រអូបនេះ មានការគាំទ្រខ្លាំងរហូតផ្គត់ផ្គង់ស្ទើរតែមិនទាន់ ដោយត្រូវបែងចែកសម្រាប់អតិថិជនលក់បន្តជាង១០កន្លែង និងសម្រាប់អតិថិជនដែលទិញរាយយកទៅពិសា ជាច្រើនទៀតផងដែរ។ អតិថិជនទាំងនោះតែងតែសរសើរពីរសជាតិថាឆ្ងាញ់ ព្រមទាំងបានកម្ម៉ងយកទៅពិសាជាលក្ខណៈគ្រួសារ មិត្តភ័ក្កនិងនៅកន្លែងធ្វើការជាដើម។ នេះបើតាម កញ្ញា ពៅ មករា។
ពៅ មករា បានអះអាងថា «ជាមធ្យមក្នុងមួយថ្ងៃ ខ្ញុំលក់ចាហួយដូងក្រអូប ជាចាហួយផ្លែបាន១០០ផ្លែ និងចាហួយដាក់ចាន បានជាង២០០ចាន។ សរុបទៅទទួលបានប្រាក់ជាង១លានរៀលដែរ។ បើគិតទៅលើថ្លៃដើម ដកចំណាយហើយអស់ អាចនៅសល់បានជាង៥០ភាគរយនៃចំណូល។ ចំនួននេះខ្ញុំមិនរាប់បញ្ចូលជាមួយចំនួនបោះដុំទៅឲ្យអ្នកចែកចាយលក់បន្តទេ»៕
Tag:
ឱសថការី
ចាហួយដូង
ពៅ មករា
© រក្សាសិទ្ធិដោយ thmeythmey.com
