ជាតិ
សេដ្ឋកិច្ច
×![]()
សៀមរាប៖ សមាគមសហគ្រិនភាពវ័យក្មេងកម្ពុជា បានរៀបចំសប្ដាហ៍សហគ្រិនភាពពិភពលោក-កម្ពុជា ឆ្នាំ២០១៨ ដែលប្រធានបទនៅឆ្នាំនេះ គឺ «ស្ដ្រី និងយុវជន ក្នុងសហគ្រិនភាព និងសេដ្ឋកិច្ចឌីជីថល»។ កម្មវិធីនេះ មានការចូលរួមពីវាគ្មិនដែលជាសហគ្រិនវ័យ និងមានបទពិសោធន៍ផ្នែកធុរកិច្ច ដែលនឹងចែករំលែកចំណេះដឹងទាំងនោះ ដល់យុវជនដែលមានបំណងបង្កើតអាជីវកម្មនានា។
ទិវាសប្ដាហ៍សហគ្រិនភាពពិភព តែងធ្វើជារៀងរាល់ឆ្នាំនៅក្នុងសប្ដាហ៍ទី៣ នៃខែវិច្ឆិកា ហើយមានប្រទេសជាង ១០០ផ្សេងទៀត កំពុងប្រារព្ធទិវានេះ។ ទិវានេះ ធ្វើឡើងក្នុងបំណងដើម្បីលើកទឹកចិត្ត ផ្តល់ចំណេះដឹងយុវជនជំនាន់ក្រោយដែលមានបំណងបង្កើតអាជីវកម្ម និងអ្នកដែលកំពុងធ្វើអាជីវកម្មទាំងឡាយណា ដើម្បីឱ្យពួកគេបានយល់ដឹងកាន់តែច្បាស់ ពីសហគ្រិនភាព និងមានឱកាសបានជួបជជែក និងពិភាក្សា ស្វែងយល់បន្ថែមពីសហគ្រិនជោគជ័យនានា។
ក្នុងពិធីបើកទិវាសហគ្រិនភាពពិភពលោក-កម្ពុជា ដែលធ្វើឡើងនៅព្រឹកថ្ងៃទី១៦ វិច្ឆិកា នាសណ្ឋាគារ អង្គរ អេរ៉ា លោក គួច ផេង ប្រធានថ្នាក់ជាតិសមាគមសហគ្រិនភាពវ័យក្មេងកម្ពុជា បញ្ជាក់ថា កម្ពុជាមានការកើនឡើងនូវចំនួនយុវជន និងស្ដ្រី នៅក្នុងវិស័យធុរកិច្ច ពិសេសសហគ្រាសធុនតូច និងមធ្យម ទើបសមាគមរបស់លោក លើកយកប្រធានបទទាក់ទងនឹងស្ដ្រី សម្រាប់ទិវាសហគ្រិនភាពពិភពលោកនេះ។ ប្រធានបទសម្រាប់ជជែកក្នុងទិវានេះ ដូចជាប្រព័ន្ធអេកូឡូស៊ីសម្រាប់ស្ដ្រី និងយុវជនក្នុងសហគ្រិនភាព អាជីវកម្មបែបឌីជីថល និងសេដ្ឋកិច្ចឌីជីថល។ល។
លោកស្រី ប៊ូ អមរា អ្នកវិភាគកម្មវិធីនៃកម្មវិធីអភិវឌ្ឍន៍សហប្រជាជាតិ (UNDP) បានលើកឡើងថា ទិវានេះពិតជាមានសារសំខាន់ណាស់សម្រាប់កម្ពុជា ព្រោះថាកម្ពុជាមានលក្ខខណ្ឌអំណោយមួយចំនួន។ ចំណុចទាំងនោះរួមមាន ២ភាគ៣ នៃចំនួនប្រជាជនមានអាយុតិចជាង ៣០ឆ្នាំ ហើយ៥០ភាគរយ នៃចំនួនប្រជាជន ស្ថិតក្នុង វ័យសកម្មសេដ្ឋកិច្ច គឺចន្លោះពី ១៥ទៅ ៤៩ឆ្នាំ។ ដូច្នេះចំនួនប្រជាជនចូលរួមសកម្មភាពសេដ្ឋកិច្ច និងចំនួនប្រជាជនមិនរកប្រាក់ចំណូល នេះជាឱកាសកំណើនសេដ្ឋកិច្ចដ៏ខ្ពស់បំផុតស្របតាមអាត្រាគ្មានការធ្វើមានចំនួនតិចតួចបំផុត។ អត្រាអ្នកគ្មានការងារនៅកម្ពុជា គឺមានត្រឹម ១ភាគរយ តែនៅក្នុងវិស័យមិនផ្លូវការ។ ដូច្នេះវានាំឱ្យមានកង្វះខាតការទទួលបានប្រាក់បៀវត្សរ៍សមរម្យ និងសមស្របតាមសន្ដិសុខការងារ ឱកាស និងភាពអំណោយផល ក្នុងការរីកចម្រើនអាជីពការងារ។
អ្នកវិភាគកម្មវិធី UNDP បានបន្ថែមថា ផ្នែកលើទស្សនៈនេះ វិស័យសហគ្រិនភាពនេះ អង្គការសហប្រជាជាតិដែលមានស្ថាប័នចំនួន៥ រួមមាន ILO, UNDP, UNESCO និង UNV បានសហការគ្នាក្នុងភាពជាដៃគូ រវាងរាជ រដ្ឋាភិបាលកម្ពុជា នៅក្នុងក្របខណ្ឌគម្រោងរួបរួមគ្នា ដើម្បីមុខរបរសមរម្យសម្រាប់យុវជន ដោយអនុលោមទៅលើគោលនយោបាយ យុទ្ធសាស្ដ្រ និងផែនការសកម្មភាពរបស់ជាតិ។
ថ្លែងក្នុងពិធីនេះដែរ លោក ទៀ សីហា អភិបាលរងខេត្តសៀមរាប បានប្រាប់ដល់យុវជន និងស្ដ្រីទាំងអស់ ត្រូវលើកម្ពស់សមត្ថភាពរបស់ខ្លួន ហើយទទួលយកយុទ្ធសាស្ដ្រជំនាញ និងបច្ចេកវិទ្យាថ្មីៗ ដើម្បីទាញយកផលប្រយោជន៍ឱ្យបានច្រើនបំផុតបទបង្ហាញរបស់វាគ្មិនក្នុងកម្មវិធីនេះ។ លោកបន្ថែមថា សេដ្ឋកិច្ចឌីជីថល និងពាណិជ្ជកម្មអេឡិកត្រូនិក កំពុងបើកចំហ ហើយប្រព័ន្ធអ៊ីនធឺណិត បានបង្កើតអាជីវកម្មថ្មីៗជាច្រើន។
នេះជាលើកទី៣ហើយ ដែលកម្ពុជារៀបចំទិវាសប្ដាហ៍សហគ្រិនភាពពិភពលោក-កម្ពុជាឡើង ដែលលើកនេះ ធ្វើនៅខេត្តសៀមរាប និងមានយុវជន និងសិស្សនិស្សិតប្រមាណ ៦០០នាក់ចូលរួម៕
© រក្សាសិទ្ធិដោយ thmeythmey.com
