ជាតិ
នាទីចុងក្រោយ លោក ម៉ុង ឫទ្ធី ក្លាយជាអ្នករ៉ាប់រងចំណាយនៅថ្ងៃបូជាសពលោកតា ប្រាជ្ញ ឈួន
× ពិធីបូជាសពរបស់ស្តេចចាប៉ីដងវែង ប្រាជ្ញ ឈួន បានប្រព្រឹត្តទៅកាលពីរសៀលថ្ងៃទី១៩ ខែវិច្ឆិកា ដោយមានការចូលរួមពីសំណាក់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ លោក ម៉ុង ឫទ្ធី សមាជិកព្រឹទ្ធសភា ដែលមានវត្តមានក្នុងកម្មវិធីនោះដែរ បានអះអាងថា លោកបានចូលរួមក្នុងនាមជាពលរដ្ឋម្នាក់ ប៉ុន្តែលោកសុខចិត្តរ៉ាប់រងការចំណាយជិត៣០០០ដុល្លារ នៅថ្ងៃចុងក្រោយនៃពិធីបុណ្យនេះ នៅវត្តបុទុមវតី។
លោក ម៉ុង ឫទ្ធី ដែលជាអ្នកជំនួញដ៏ធំនៅកម្ពុជា បានសរសេរនៅលើហ្វេសប៊ុកខ្លួនថា លោកបានចូលរួមជូនដំណើរចុងក្រោយ សពលោកព្រឹទ្ធាចារ្យភិរម្យប្រាជ្ញ ឈួន ក្នុងនាមជាពលរដ្ឋធម្មតា ប៉ុន្តែគេបានរៀបចំឲ្យអង្គុយកៅអីគណៈអធិបតីជាមួយលោក ខៀវ កាញារីទ្ធ។
លោកបានបន្ថែមថា៖ «ឃើញគេនាំគ្នាយកវិក្កយបត្រមកទារប្រាក់ ពីព្រះតេជគុណ ឃឹម សន។ ក្នុងនោះមានថ្លៃមេរុ៩០០ដុល្លារ ថ្លៃតុបតែងផ្កាលើមេរុ៩៥០ដុល្លារ ថ្លៃសម្ភារចម្រុះ ៥២៨ដុល្លារ ថ្លៃផ្កាកូរ៉ោន៥៥០ដុល្លារ សរុបចំនួន២៩២៨ដុល្លារ។ លោកងាកមកឲ្យឧកញ៉ាជួយចេញលុយខ្លះផង។ ជាចុងក្រោយទើបដឹងថា កម្មវិធីបុណ្យនេះ ព្រះតេជព្រះគុណ ឃឹម សន ជាអ្នកចាត់ចែងធ្វើទាំងអស់យប់មិញ។ ខ្ញុំបានចូលបុណ្យម្តងរួចហើយ សម្រាប់ពេលនេះខ្ញុំមិនអាចចេញតែចំណែកណាមួយបានទេ មានតែជួយចេញថវិកាទាំងអស់តែម្តង។ បើសង្ឃឹមទៅលើគ្រួសារសពទីទ័លក្រខ្លាំងណាស់។ បើសង្ឃឹមទៅលើព្រះសង្ ឃមិនដឹងជាត្រូវទៅសូត្រមន្ត ទេសនាប៉ុន្មានរោងទើបសងគេរួចទេ»។
លោកឧកញ៉ា ម៉ុង ឫទ្ធី បានបញ្ជាក់ថា លោក មិនមានជាប់សាច់ញាតិអ្វីជាមួយគ្រួសារសពទេ ហើយក៏ទើបតែជួបពួកគាត់លើកទីមួយដែរ។ ជាមួយនឹងការជួយចេញថ្លៃចំណាយជិត៣០០០ដុល្លារ នៅនាទីចុងក្រោយ លោក ម៉ុង ឫទ្ធី អញ្ជើញមិត្តហ្វេសប៊ុកទាំងអស់ ទទួលអនុមោទនាបុណ្យ៕
Tag:
ប្រាជ្ញ ឈួន
ចាប៉ីដងវែង
ម៉ុង ឫទ្ធី
© រក្សាសិទ្ធិដោយ thmeythmey.com