ជាតិ
នយោបាយជាតិ
មុនចេញពីកម្ពុជា លោក Heidt ឆ្លៀតស្នើសម្តេច ហ៊ុន សែន ឲ្យលែងលោក កឹម សុខា ជំនួបរវាងសម្តេច ហ៊ុន សែន និង លោក William Heidt នៅវិមានសន្តិភាព នៅព្រឹកថ្ងៃទី២0 ខែវិច្ឆិកា ឆ្នាំ២០១៨។ រូបពី AKP
× មុនចប់អាណត្តិជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា និងត្រូវចាកចេញពីកម្ពុជានៅមុនឆ្នាំ២០១៨នេះ លោក William Heidt បានទៅលាសម្តេចនាយករដ្ឋមន្ត្រី ហ៊ុន សែន នៅវិមានសន្តិភាព នាព្រឹកថ្ងៃទី២០ ខែវិច្ឆិកា ឆ្នាំ២០១៨។ ក្នុងជំនួបចុងក្រោយនេះ លោក Heidt បានស្នើសុំសម្តេច ហ៊ុន សែន នូវរឿងមួយចំនួន។
«លោក Heidt បានលើកទឹកចិត្តឲ្យរដ្ឋាភិបាលកម្ពុជា បន្តកែលម្អចំណងទាក់ទងទ្វេភាគី ដែលរួមមាន ការជំរុញការផ្សះផ្សារជាតិ ការដោះលែងលោក កឹម សុខា និងអ្នកទោសនយោបាយដទៃទៀត ហើយបន្ធូរបន្ថយការរឹតត្បិតលើសង្គមស៊ីវិល រួមទាំងប្រព័ន្ធផ្សព្វផ្សាយ»។ ទាំងនេះគឺជាអ្វី ដែលទូតអាមេរិកជិតចប់អាណត្តិ បានលើកឡើងនៅចំពោះមុខប្រមុខរដ្ឋាភិបាលកម្ពុជា ហើយត្រូវបានដកស្រង់យកទៅសរសេរលើទំព័រហ្វេសប៊ុករបស់ស្ថានទូតសហរដ្ឋអាមេរិកប្រចាំកម្ពុជា។
បើតាមខ្លឹមសារដែលបង្ហោះលើទំព័រហ្វេសប៊ុកនោះ លោក Heitd ក៏បានប្រាប់សម្តេច ហ៊ុន សែន ផងដែរ ថាលោក មានការលើកទឹកចិត្ត ដោយសារមានការបន្តឡើងវិញនូវកិច្ចសហប្រតិបត្តិការ ក្នុងការស្វែងរកអដ្ឋធាតុកងទ័ពអាមេរិក នៅកម្ពុជា។
លើសពីនេះ លោក Heitd ថ្លែងថា លោក ទទួលយកមតិរបស់នាយករដ្ឋមន្ត្រីកម្ពុជា ដែលបដិសេធព័ត៌មាន អំពីកងទ័ពជើងទឹករបស់ចិន មកតាំងមូលដ្ឋាននៅលើទឹកដីកម្ពុជា។ មុនជួបលោក Heitd ប្រមុខរដ្ឋាភិបាលកម្ពុជា បកស្រាយទៅអាមេរិក កាលពីថ្ងៃទី១៩ ខែវិច្ឆិកា ថា កម្ពុជា មិនអនុញ្ញាតឲ្យមានវត្តមានរបស់កងទ័ពបរទេសឡើយ។
សូមរម្លឹកថា លោក Heidt ដែលមានភរិយាជាជនជាតិខ្មែរ បានមកកាន់តំណែងជាឯកអគ្គរដ្ឋទូតអាមេរិកប្រចាំកម្ពុជា កាលពីអំឡុងខែកញ្ញា ឆ្នាំ២០១៥។ លោក Patrick Murphy ដែលជាឧបការីរងរដ្ឋមន្ត្រីការបរទេសទទួលបន្ទុកកិច្ចការងារអាស៊ីបូព៌ា និងប៉ាស៊ីហ្វិក នឹងក្លាយជាឯកអគ្គរដ្ឋទូតប្រចាំកម្ពុជា ជំនួសលោក Willl Heidt៕
Tag:
ហុន សែន
កឹម សុខា
William Heidt
© រក្សាសិទ្ធិដោយ thmeythmey.com