ជាតិ
បុណ្យអុំទូក
អុំទូក២ថ្ងៃ មានទូក៦លិច តែមិនមានគ្រោះថ្នាក់ដល់ជីវិតឡើយ
× ភ្នំពេញ៖ រយៈពេល២ថ្ងៃនៃពិធីបុណ្យអុំទូកឆ្នាំនេះ មានទូកចំនួន៦បានលិចក្នុងអំឡុងពេលប្រណាំង ប៉ុន្តែពុំបង្កឲ្យមានគ្រោះថ្នាក់ដល់ជីវិតឡើយ។ នេះបើតាមការបញ្ជាក់របស់លោក ប៊ូ ជុំសេរី ប្រធានគណៈកម្មការបច្ចេកទេសរៀបចំបុណ្យជាតិ ដែលបានប្រាប់សារព័ត៌មានថ្មីៗ។
លោក ប៊ូ ជុំសេរី ប្រាប់តាមទូរសព្ទថា មានទូក៤ បានលិចនៅថ្ងៃទី១នៃពិធីបុណ្យអុំទូក និងទូក២ទៀត បានលិចនៅថ្ងៃទី២ ចំណែកនៅថ្ងៃទី៣នេះ ពុំទាន់មានទូកណាមួយលិចនៅឡើយទេ។ លោក បន្តថា ចំពោះទូកដែលលិច ត្រូវបានក្រុមការងារជួយសង្គ្រោះទាន់ពេលវេលាហើយ។
ប្រធានគណៈកម្មការបច្ចេកទេសរៀបចំបុណ្យជាតិរូបនេះ បានបន្ថែមយ៉ាងដូច្នេះថា៖«ក្នុងឱកាសបុណ្យអុំទូកនេះ យើងបានត្រៀមកាណូតជាច្រើនគ្រឿងផងដែរ ដើម្បីជួយសង្គ្រោះ បើមានករណីលិចទូក ក្នុងអំឡុងពេលប្រណាំង»។
ក្រៅពីមានករណីលិចទូក ក៏មានករណីផ្សេងទៀតកើតឡើងផងដែរ មានដូចជា គ្រោះថ្នាក់ចរាចរណ៍ ដែលបណ្តាលឲ្យមនុស្សស្លាប់៥នាក់ របួស១៣នាក់ និងមានមនុស្សចំនួនជាង៦ពាន់នាក់ ត្រូវបានសង្គ្រោះ និងព្យាបាលជំងឺដោយក្រុមអ្នកជួយសង្គ្រោះ។ នេះបើតាមរបាយការណ៍របស់អគ្គស្នងការដ្ឋាននគរបាលជាតិ។
សូមរម្លឹកថា ក្នុងពិធីបុណ្យអុំទូក បណ្តែតប្រទីប អកអំបុក ឆ្នាំ២០១៧ កន្លងទៅ មានទូកចំនួន៣ បានលិចក្នុងពេលប្រណាំងទូក តែមិនមានគ្រោះថ្នាក់ដល់ជីវិតឡើយ។ ទូកងដែលចូលរួមប្រណាំងឆ្នាំនេះ មាន២៩៥ទូក និងមានកីឡាករចំនួន១៩០១៧នាក់ បើប្រៀបធៀបឆ្នាំ២០១៧ ដែលមានទូកចំនួន២៧០ និងមានកីឡាករ១៧៨២៦នាក់៕
© រក្សាសិទ្ធិដោយ thmeythmey.com