ក្រោយឆ្លើយឆ្លងរឿងសុំទិដ្ឋាការទៅអាមេរិក, លោក ព្រាប កុល និងលោក កែវ រ៉េមី សម្រុះសម្រួលគ្នាវិញ

ជាតិ

ក្រោយឆ្លើយឆ្លងរឿងសុំទិដ្ឋាការទៅអាមេរិក, លោក ព្រាប កុល និងលោក កែវ រ៉េមី សម្រុះសម្រួលគ្នាវិញ

26, Nov 2018 , 12:15 pm

រូបភាព

រូបពីហ្វេសប៊ុកលោក កែវ រ៉េមី

ដោយ: ថ្មីៗ

ភ្នំពេញ៖ បើសិនជាគេ តាមដានគណនីហ្វេសប៊ុកលោក កែវ រ៉េមី (Keo Remy) ប្រធានគណៈកម្មាធិការសិទ្ធិមនុស្សកម្ពុជា និងគណនីហ្វេសប៊ុកលោក ព្រាប កុល នាយកប្រតិបត្តិអង្គការតម្លាភាពកម្ពុជានោះ គេនឹងបានឃើញសារឌឺដងគ្នារឿងសុំទិដ្ឋាការទៅអាមេរិក។ ប៉ុន្តែបុគ្គលសាធារណៈទាំងពីរបានបញ្ចប់អរិភាពនៅលើតុអាហារពេលព្រឹកនៅថ្ងៃទី២៦វិច្ឆិកានេះ។

គម្រោងណាត់ជួបគ្នានេះ ផ្ដើមចេញពីលោក ព្រាប កុល ដែលបានឆាតតាមរយៈហ្វេសប៊ុកទៅលោក កែវ រ៉េមី ដើម្បីសុំជួបពិភាក្សាគ្នាពីការបញ្ចេញមតិខ្លួន នៅលើបណ្ដាញសង្គមមួយនេះ។ ទីតាំងដែលអ្នកទាំងពីរជួបគ្នា គឺនៅក្នុងអាហារដ្ឋានមួយ ម្ដុំផ្សារកាប់គោ ហើយគុយទាវ បបរ និងទឹកតែ ជាអាហារកំដកិច្ចសន្ទនាសម្រួលអារម្មណ៍។

លោក ព្រាប កុល នាយកប្រតិបត្តិអង្គការតម្លាភាព បានប្រាប់សារព័ត៌មានថ្មីៗក្រោយពីការជួបលោក កែវ រ៉េមីថា ការណាត់ជួបគ្នានេះ មិនមែនជាការបន្តជជែកយកចាញ់-ឈ្នះគ្នា រឿងសុំទិដ្ឋាការទៅអាមេរិកឡើយ ប៉ុន្តែវាជាឱកាសល្អសម្រាប់ការបង្កើតវប្បធម៌សន្ទនារវាងលោក និងលោក កែវ រ៉េមី ទៅវិញទេ ទោះបីជាទស្សនៈខុសគ្នាក៏ដោយ។

លោក ព្រាប កុល ដែលអះអាងថា ខ្លួនបានស្គាល់គ្នាជាមួយលោក កែវ រ៉េមី រយៈពេល១៨ឆ្នាំមកហើយនេះ បានបញ្ជាក់ដូច្នេះ៖«ក្នុងនាមយើងជាខ្មែរដូចគ្នា ខ្ញុំគ្មានហេតុផលអ្វីដែលត្រូវនិយាយប៉ះពាល់គាត់(កែវ រ៉េមី) ឬក៏មានបំណងទៅបន្ដុះបង្អាប់គាត់ នៅក្នុងន័យណាមួយទេ។ ដូច្នេះខ្ញុំជជែកគ្នាជាមួយគាត់ ញាំកាហ្វេ ញាំទឹកតែជាមួយគ្នាព្រឹកមិញហ្នឹង យើងណាត់ជួបគ្នាក្នុងនាមជាពលរដ្ឋជនរួមជាតិខ្មែរ។ ខ្ញុំស្គាល់គាត់ រាប់អានគ្នា ជជែកគ្នាត្រង់ទៅត្រង់មក ក្នុងនាមជាខ្មែរដូចគ្នា។ ហើយគាត់ក៏សប្បាយចិត្ត គាត់ក៏គ្មានប្រកាន់ស្អីខ្ញុំដែរ ព្រោះខ្ញុំបានជម្រាបប្រាប់គាត់ថា ខ្ញុំក៏គ្មានចេតនានិយាយប៉ះពាល់អ្វីដល់គាត់ដែរ»។

ក្រៅពីរៀបរាប់ពីរឿងរ៉ាវជួបគ្នានេះហើយ លោក ព្រាប កុល ក៏ស្នើឲ្យអ្នកនយោបាយ និងពលរដ្ឋខ្មែរគ្រប់រូប គប្បីចេះប្រើប្រាស់វប្បធម៌សន្ទនា និងយោគយល់គ្នាទៅវិញទៅមក បើទោះជាស្ថិតនៅក្នុងទស្សននយោបាយ ឬនិន្នាការនយោបាយខុសគ្នាក៏ដោយ។

មិនមែនតែលោក ព្រាប កុល ទេដែលបង្ហាញពីអារម្មណ៍រីករាយ ក្រោយពីជួបសន្ទនាគ្នានេះ សូម្បីតែលោក កែវ រ៉េមី ក៏មានចិត្តធូស្បើយជាងមុនដែរ។ ប្រធានគណៈកម្មាធិការសិទ្ធិមនុស្សកម្ពុជារូបនេះ បានសរសេរលើហ្វេសប៊ុក ដោយអមជាមួយរូបថតមួយសន្លឹករវាងលោក និងលោក ព្រាប កុល នៅកន្លែងទទួលទានអាហារពេលព្រឹកនេះ ហើយបានសរសេរបែបវិជ្ជមានដូច្នេះថា៖« ខ្ញុំស្គាល់ប្អូនព្រាប កុលអស់រយ:ពេល ១៨ ឆ្នាំមកហើយៗគាត់ជាមនុស្សល្អទេ គ្រាន់តែមានការយល់ច្រឡំតែប៉ុណ្ណោះ។ កុំឈ្លោះគា្នធ្វើឲ្យបរទេសសប្បាយចិត្ត»។

សារឌឺដងគ្នា រឿងការស្នើសុំទិដ្ឋាការទៅលេងអាមេរិកនេះ បានផ្ទុះឡើងក្រោយពីលោក កែវ រ៉េមី បានសរសេរបង្ហាញពីចម្ងល់ដែស្ថានទូតអាមេរិកយឺតយ៉ាវក្នុងការឆ្លើយតបអំពីការផ្តល់ ឬមិនផ្តល់ទិដ្ឋាការដល់រូបលោក។ ដំបូងឡើយលោក កែវ រ៉េមី បានសរសេរលើហ្វេសប៊ុកដូច្នេះថា៖« នឹកកូនពេករត់ទៅសុំ VISA (ទិដ្ឋាការ) អាមេរិក។ ពីមុនសុំបានៗ តែពេលនេះប្លែក គេពន្យាពេល៣សប្ដាហ៍ ថាឲ្យឬមិនឲ្យ។ ចូលជិត១០ថ្ងៃហើយមិនទាន់ទទួលបានដំណឹង។ នៅសល់តែ២ថ្ងៃទៀត ទោះជាឲ្យក៏ទៅមិនបានដែរ ពីព្រោះរវល់ខ្លាំង។ សិទ្ធិមនុស្សនៅឯណា?»។ ក្រោយមក លោក កែវ រ៉េមី បានលុបសារនេះចេញពីហ្វេសប៊ុករបស់លោក។

សំណេរលើហ្វេសប៊ុកលោក កែវ រ៉េមី បែបនេះហើយ ទើបធ្វើឲ្យសាធារណៈជនមួយចំនួន យកទៅចែករំលែកតគ្នា ដោយបន្ថែមសាររិះគន់លើសម្តីរបស់លោក កែវ រ៉េមី រហូតដល់ក្លាយទៅជាប្រធានបទក្តៅមួយ ក្នុងការជជែកពិភាក្សាគ្នា នៅលើបណ្ដាញសង្គមហ្វេសប៊ុក។ ការចែករំលែកតគ្នានេះ ក៏មានលោក ព្រាប កុល នាយកប្រតិបត្តិអង្គការតម្លាភាពកម្ពុជាដែរ ដែលចង់បង្ហាញពីសមត្ថភាពខ្លួន អាចសុំទិដ្ឋាការពីទៅអាមេរិកបានគ្រប់ពេលវេលា។

«ខ្ញុំគ្រាន់តែជាសាមញ្ញជនម្នាក់ គ្មានមុខងារជាឧត្តមមន្ត្រីអ្វីទេ ហើយកាន់លិខិតឆ្លងដែនរាស្ត្រ ដែលរលប់អក្សរនៅក្របខាងលើទៀត។ ប៉ុន្តែពេលខ្ញុំសុំទិដ្ឋាការ (VISA) ទៅអាមេរិកចំនួនត្រឹមតែ៣ថ្ងៃ អាមេរិកយល់ព្រមឲ្យទិដ្ឋាការខ្ញុំ រហូតដល់ទៅ៣ឆ្នាំ។ ពេលខ្ញុំសុំទិដ្ឋាការទៅអឺរ៉ុប ត្រឹមតែ២សប្ដាហ៍ អឺរ៉ុបឲ្យទិដ្ឋាការខ្ញុំរហូតដល់ទៅ២ឆ្នាំ។ ហេតុអ្វីអាមេរិក ធ្វើបែបហ្នឹងដាក់ឧត្តមមន្ត្រីខ្មែរ ដែលកាន់ប៉ាស្ព័រកាទូតអ៊ីចឹង? ម៉េចក៏អ៊ីចឹង អស់លោកអាគាំង (អាមេរិក)»។ នេះជាសំណេររបស់លោក ព្រាប កុល ដែលធ្វើឲ្យលោក កែវ រ៉េមី បន្តឆ្លើយឆ្លងលើករណីនេះជាបន្តបន្ទាប់មក៕