កម្ពុជា និងថៃ សម្រេចបានទំហំពាណិជ្ជកម្ម ៧ប៊ីលានដុល្លារ នៅឆ្នាំ ២០១៨

ជាតិ

សេដ្ឋកិច្ច

កម្ពុជា និងថៃ សម្រេចបានទំហំពាណិជ្ជកម្ម ៧ប៊ីលានដុល្លារ នៅឆ្នាំ ២០១៨

02, Dec 2018 , 3:03 pm

រូបភាព

រូបភាពពីក្រសួងពាណិជ្ជកម្ម១

ដោយ:

ភ្នំពេញ៖ គិតត្រឹមខែតុលា ឆ្នាំ២០១៨ នេះ កម្ពុជា និងថៃ បានរួមគ្នាសម្រេចបានទំហំពាណិជ្ជកម្មចំនួន ៧ប៊ីលានដុល្លារ។ បើតាមលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ទឹកប្រាក់ ៧ប៊ីលានដុល្លារពីការសម្រេចបានទំហំពាណិជ្ជកម្មនេះ គឺជាសញ្ញាណវិជ្ជមានសម្រាប់កិច្ចសហការរវាងប្រទេសទាំងពីរ។

លោក ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម ជឿជាក់ថា កម្ពុជានឹងបន្តកើនឡើងនូវទំហំពាណិជ្ជកម្មរវាងប្រទេសទាំងពីរ ដើម្បីឈានទៅសម្រេចតាមផែនការដែលបានកំណត់ ទៅលើកិច្ចសហប្រតិបត្តិការល្អលើគ្រប់វិស័យ។

លោករដ្ឋមន្ត្រីរូបនេះ ក៏បានអះអាងថា៖«កម្ពុជានឹងបន្តធ្វើការយ៉ាងជិតស្និទ្ធជាមួយថៃ ជាពិសេសក្នុងពេលដែលប្រទេសនេះ ធ្វើជាប្រធានអាស៊ាន នៅក្នុងឆ្នាំ២០១៩ ខាងមុខ សំដៅធ្វើឱ្យការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្រិតតំបន់ (RCEP) អាចបញ្ចប់ដោយជោគជ័យនៅក្នុងឆ្នាំក្រោយ ដើម្បីធានាការធ្វើពិពិធកម្មវិស័យនាំចេញរបស់កម្ពុជា»។

លោក ផាន់យ៉ារ៉ាក់ ប៉ុលធូប ឯកអគ្គរាជទូតថៃប្រចាំនៅកម្ពុជា បាននិយាយថា លោកនឹង សន្យាបន្តពង្រីកការតភ្ជាប់ព្រំដែនរវាងកម្ពុជា និងថៃ ហើយពង្រឹងកិច្ចសហប្រតិបត្តិការលើវិស័យអប់រំ តាមរយៈការផ្តល់អាហារូបករណ៍ដល់និស្សិតកម្ពុជា ក៏ដូចជាការបង្កើត និងអភិវឌ្ឍន៍វិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ ដោយប្រើប្រាស់មូលនិធិរបស់ម្ចាស់ក្សត្រី មហាចក្រី ស៊ូរិនដន (Maha Chakri Sirindhorn)ផងដែរ។

កន្លងមកប្រមុខរដ្ឋាភិបាលប្រទេសទាំងពីរ បានកំណត់គម្រោងបង្កើនទំហំពាណិជ្ជកម្ម ឲ្យបានដល់ ១៥ប៊ីលានដុល្លារអាមេរិក នៅឆ្នាំ២០២០៕