រោងចក្រផលិតក្បឿង និងទុយោដ៏ទំនើប របស់ក្រុមហ៊ុន ជីប ម៉ុង អ៊ីនដាស្ទ្រីស៍ បើកសម្ពោធជាផ្លូវការ

អត្ថបទពាណិជ្ជកម្ម

រោងចក្រផលិតក្បឿង និងទុយោដ៏ទំនើប របស់ក្រុមហ៊ុន ជីប ម៉ុង អ៊ីនដាស្ទ្រីស៍ បើកសម្ពោធជាផ្លូវការ

11, Dec 2018 , 10:35 am

រូបភាព

ដោយ: ជី ដាណា

ក្រុមហ៊ុន ជីប ម៉ុង អ៊ីនដាស្ទ្រីស៍ ដែលជាបុត្រសម្ព័ន្ធរបស់ក្រុមហ៊ុន ជីប ម៉ុង បានបើកម្ពោធជាផ្លូវការ រោងចក្រផលិតក្បឿង និងទុយោរបស់ខ្លួន កាលពីព្រឹកថ្ងៃទី៧ ខែធ្នូ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម។ រោងចក្រក្បឿង និងទុយោ ជីប ម៉ុង អ៊ីនដាស្ទ្រីស៍ ត្រូវបានសាងសង់លើផ្ទៃដីជាង១១ហិកតា ដែលមានទីតាំង ស្ថិតនៅក្នុងខណ្ឌដង្កោ រាជធានីភ្នំពេញ។ រោងចក្រនីមួយៗ ត្រូវបានបំពាក់ដោយបច្ចេកវិទ្យាចុងក្រោយ មកពីប្រទេសអ៊ីតាលី និងប្រើប្រាស់វត្ថុធាតុដើមដ៏ល្អឥតខ្ចោះ ដែលមានលទ្ធភាពផលិតក្បឿង និងទុយោដែលមានគុណភាពខ្ពស់ សម្រាប់ផ្គត់ផ្គង់ទីផ្សារសំណង់ក្នុងប្រទេសកម្ពុជា។

ថ្លែងក្នុងកម្មវិធីសម្ពោធ លោកឧកញ៉ា លាង ឃុន ប្រធានក្រុមអគ្គនាយកក្រុមហ៊ុន ជីប ម៉ុង បានរំពឹងថា ការវិនិយោគក្នុងវិស័យឧស្សាហកម្មទ្រង់ទ្រាយធំ របស់វិនិយោគិនក្នុងស្រុក ក៏ជាការចូលរួមចំណែកមួយជ្រុងតូច ក្នុងការលើកមុខមាត់ប្រទេស ក្នុងវិស័យឧស្សាហកម្ម តាមរយៈការបោះជំហានពីប្រទេសកសិកម្ម ទៅជាប្រទេសឧស្សាហកម្ម កាត់បន្ថយការនាំចូលសម្ភារសំណង់ពីបរទេស និងជួយបង្កើនសេដ្ឋកិច្ចជាតិ។

គួរបញ្ជក់ថា គ្រឿងចក្ររបស់រោងចក្រក្បឿង មានលទ្ធភាពផលិតក្បឿងបាន១៤០សន្លឹកក្នុងមួយនាទី ខណៈរោងចក្រទុយោ មានលទ្ធភាពផលិតទុយោបាន៥០០តោន ក្នុងមួយខែ។
ក្រៅពីរោងចក្រផលិតក្បឿង និងទុយោ ក្រុមហ៊ុន ជីប ម៉ុង អ៊ីនដាស្ទ្រីស៍ ក៏មានផលិតផលបេតុងលាយស្រេច ដើម្បីផ្គត់ផ្គង់តម្រូវការក្នុងវិស័យសំណង់ក្នុងប្រទេសផងដែរ៕