អន្តរជាតិ
កាណាដា រកផ្លូវឈប់លក់អាវុធឲ្យអារ៉ាប៊ីសាអូឌីតជុំវិញឃាតកម្មលោក Kashoggi
×![]()
ដោយ: តន ចាន់រិទ្ធារ៉ា
រដ្ឋាភិបាលកាណាដា កំពុងរិះរកមធ្យោបាយក្នុងការលុបចោលកិច្ចព្រមព្រៀងលក់អាវុធឲ្យអារ៉ាប៊ីសាអូឌីតជុំវិញឃាតកម្មលើអ្នកកាសែត Jamal Kashoggi ។ នាយករដ្ឋមន្ត្រីកាណាដា ចាស្ទីន ទ្រូដូ និយាយថា ករណីនេះជារឿងមិនអាចទទួលយកបានដាច់ខាត ហើយដែលកាណាដាតែងទាមទារការបកស្រាយមួយ។ យ៉ាងណាមិញ ក្រុងអូតាវ៉ាទំនងជួបបញ្ហាក្នុងការលុបចោលកិច្ចព្រមព្រៀងនេះ ដ្បិតត្រូវសងលុយជំងឺចិត្តយ៉ាងច្រើនឲ្យក្រុងរីយ៉ាដ។
សំណុំរឿងឃាតកម្មអ្នកកាសែតអារ៉ាប៊ីសាអូឌីត Jamal Kashoggi បានក្លាយជាកម្មវត្ថុថ្មីមួយទៀតសម្រាប់កាណាដាយកមកពិចារណាដើម្បីលុបចោលកិច្ចព្រមព្រៀងលក់អាវុធឲ្យអារ៉ាប៊ីសាអូឌីត ដែលត្រូវបានចុះហត្ថលេខាក្នុងឆ្នាំ២០១៤ ។ ខណៈទំនាក់ទំនងទ្វេភាគីកំពុងមិនល្អស្រាប់ផងនោះ នាយករដ្ឋមន្ត្រីកាណាដា ចាស្ទីន ទ្រូដូ លើកឡើងថា រដ្ឋាភិបាលរបស់លោកកំពុងរកច្រកដើម្បីបញ្ឈប់ការលក់អាវុធឲ្យក្រុងរីយ៉ាដ។
ក្នុងកិច្ចសម្ភាសជាមួយទូរទស្សន៍ CTV នៅថ្ងៃទី១៦ ខែធ្នូ លោក ទ្រូដូ និយាយថា ការសម្លាប់លោក Kashoggi ជារឿងមិនអាចទទួលយកបានឡើងសម្រាប់កាណាដា ដែលដូចនេះហើយ ចាប់ពីពេលដំបូងមក កាណាដាបានទាមទារចម្លើយ និងដំណោះស្រាយលើករណីនេះ។ លោកបន្តថា រដ្ឋាភិបាលរបស់លោកបានទទួលមរតកកិច្ចព្រមព្រៀងលក់អាវុធឲ្យអារ៉ាប៊ីសាអូឌីតពីរដ្ឋាភិបាលចាស់ដែលមានទំហំទឹកប្រាក់ចំនួនន១៥ពាន់លានដុល្លារកាណាដា។
លោក ទ្រូដូ រងការរិះគន់មិនតិចឡើយពីសំណាក់គូប្រជែងនយោបាយ និងក្រុមការពារសិទ្ធិមនុស្សចំពោះរឿងនេះ។ យោងតាមទីភ្នាក់ងារព័ត៌មាន AFP នាយករដ្ឋមន្ត្រីវ័យក្មេងរូបនេះធ្លាប់បានបញ្ជាក់ម្ដងហើយថា បើកាណាដាច់ងលុបកិច្ចព្រមព្រៀងលក់រថយន្តយោធាធុនស្រាលនេះ គឺត្រូវបង់សំណងជំងឺចំនួនច្រើនជាង១ពាន់ដុល្លារឲ្យអារ៉ាប៊ីសាអូឌីតឯណោះ។
ជុំវិញកិច្ចព្រមព្រៀងនេះ ពីដំបូង កាណាដាយល់ព្រមលក់រថយន្ត LAV 6 ចំនួន៩២៨គ្រឿងឲ្យអារ៉ាប៊ីសាអូឌីត ប៉ុន្តែបានបន្ថយមកត្រឹម៧៤២គ្រឿងវិញនៅដើមឆ្នាំ២០១៨ បន្ទាប់ពីមានការប្រឆាំងខ្លាំងដោយខ្លាចរថយន្តទាំងនេះត្រូវប្រើដើម្បីសម្លាប់មនុស្សក្នុងសង្គ្រាមនៅយេម៉ែន។ អារ៉ាប៊ីសាអូឌីតបានរងការរិះគន់ខ្លាំងចំពោះវិបត្តិមួយនេះ ដែលកំពុងធ្វើឲ្យប្រជាជនយេម៉ែនរស់នៅក្នុងស្ថានភាពដ៏អាក្រក់បំផុតមិនធ្លាប់មាន។
តាមពិតទៅ ចំណងការទូតកាណាដា និងអារ៉ាប៊ីសាអូឌីត ល្អក់កករច្រើនខែមកហើយ មិនមែនត្រឹមឃាតកម្មលោក Kashoggi ឡើយ។ កាលពីខែសីហា ប្រទេសទាំងពីរនេះបានប្រឈមគ្នាផ្នែកការទូត បន្ទាប់ពីកាណាដាទាមទារឲ្យអារ៉ាប៊ីសាអូឌីតដោះលែងសកម្មជនសិទ្ធមនុស្ស។ ក្រុងរីយ៉ាដមិនពេញចិត្តឡើយនឹងការទាមទារនេះ ហើយថែមទាំងបណ្ដេញអគ្គរដ្ឋទូតកាណាដាត្រឡប់ទៅស្រុកវិញ និងសកម្មភាពពាណិជ្ជកម្ម និងវិនិយោគទាំងអស់ទៀតផង៕
Tag:
កាណាដា
អារ៉ាប៊ីសាអូឌីត
Jamal Kashoggi
© រក្សាសិទ្ធិដោយ thmeythmey.com
