អន្តរជាតិ
លោក ស៊ី ជិនភីង៖ គ្មាននរណាអាចបង្គាប់បញ្ជាចិនបានឡើយ លោក ស៊ី ជិនភីង នាពិធីរំឭកខួបទី៤០ នៃការកែទម្រង់ និងបើកចំហសេដ្ឋកិច្ច (រូបភាព AFP)
× ប្រធានាធិបតីចិន ស៊ី ជិនភីង នៅថ្ងៃទី១៨ ខែធ្នូ បានប្រកាសបន្តដើរលើផ្លូវអភិវឌ្ឍតាមបែបផែនសង្គមនិយមរបស់ចិន ដែលបានជួយឲ្យចិនមានមុខមាត់ដូចសព្វថ្ងៃ។ លោក ស៊ី ប្រកាសបែបនេះនាឱកាសខួបទី៤០ នៃការអនុវត្តនយោបាយកែទម្រង់ និងការបើកចំហ។ បើតាមលោកប្រធានាធិបតីចិន ៤០ឆ្នាំមកនេះ គោលនយោបាយ និងបញ្ញត្តិផ្សេងៗសុទ្ធតែធ្វើឡើង និងអនុវត្តតាមសង្គមនិយមចិន ហើយក៏គ្មាននរណាមកបង្គាប់បញ្ជាអ្វីឡើយ។
ថ្ងៃទី១៨ ខែធ្នូ ឆ្នាំ២០១៨ ជាខួបទី៤០ឆ្នាំនៃការបើកចំហប្រទេសចិន ដែលដាក់ចេញអតីតមេដឹកនាំ តេង ស៊ាវភីង ក្នុងឆ្នាំ១៩៧៨ ។ ៤០ឆ្នាំមកនេះ ចិនបានប្រែខ្លួនពីប្រទេសក្រីក្រទៅជាមហាអំណាចមួយរបស់ពិភពលោកទាំងសេដ្ឋកិច្ច នយោបាយ និងយោធា។ ក្នុងពិធីរំឭកខួបនេះ ប្រធានាធិបតីចិន ស៊ី ជិនភីង បានប្រកាសបន្តការបើកចំហ និងការកែទម្រង់បន្តទៀត ដោយមានបក្សកុម្មុយនីស្តចិនជាស្នូល និងដើរលើផ្លូវរបស់ចិនផ្ទាល់។
ចំពោះមុខអ្នកចូលរួមជាច្រើនក្នុងមហាសាលនៃវិមានប្រជាជន លោក ស៊ី បានរំឭកពីដំណើរការកែទម្រង់ និងលទ្ធផលក្នុងរយៈពេល៤០មកនេះ ដែលទាំងទ្រឹស្តី និងការអនុវត្តសុទ្ធតែពឹងផ្អែកលើការគោរពតាមសង្គមនិយមតាមបែបចិនទាំងអស់។ បើតាមទីភ្នាក់ងារព័ត៌មាន Xinhua មេដឹកនាំចិនរូបនេះនិយាយថា គ្មានឡើយសៀវភៅដែលអាចអនុវត្តតាមបានក្នុងការកែទម្រង់ និងការបើកចំហរបស់ចិនដែលជាប្រទេសមានអរិយធម៌៥ពាន់ឆ្នាំ និងមានប្រជាជន១.៣ពាន់លាននាក់។
«គ្មាននរណាអាចបង្គាប់បញ្ជាប្រជាជនឲ្យធ្វើអ្វី ឬមិនត្រូវធ្វើអ្វីឡើយ។» នេះជាការបញ្ជាក់របស់លោក ស៊ី ដែលជាអគ្គលេខាធិការគណៈកម្មាធិការមជ្ឈិមបក្សកុម្មុយនីស្តចិនដែរនោះ។ ដោយសំដៅដល់ទ្រឹស្តីរបស់ខ្លួន លោក ស៊ី បន្ថែមថា សង្គមនិយមតាមបែបចិន ជាផ្លូវសម្រាប់ចិនក្នុងបន្តដំណើរទៅមុខ និងការកាច់ចង្កូតការអភិវឌ្ឍ ប៉ុន្តែការកែទម្រង់អាចធ្វើឡើងទៅតាមកាលៈទេសៈ មិនមែនគ្រប់យ៉ាងសុទ្ធតែអាចផ្លាស់ប្ដូរឡើយ។
តាមសម្ដីខាងលើ មេដឹកនាំចិនជំនាន់ទី៥ រូបនេះបានសង្កត់ធ្ងន់ពីការដឹកនាំរបស់កុម្មុយនីស្តចិនលើគ្រប់វិស័យ គ្រប់និន្នាការ និងគ្រប់បរិបទទាំងអស់របស់ចិន។ សម្រាប់លោក ស៊ី នយោបាយកែទម្រង់ និងបើកចំហសេដ្ឋកិច្ច៤០ឆ្នាំមកនេះ នឹងមិនជោគជ័យឡើយ បើគ្មានការដឹកនាំរបស់បក្សដែលបានរួមចំណែកសំខាន់បំផុតក្នុងការលើកកម្ពស់សង្គមនិយមតាមបែបចិន។ ក្នុងន័យនេះ លោកអះអាងថា បក្សកុម្មុយនីស្តត្រូវតែដឹកនាំ និងសម្របសម្រួលការងារពីគ្រប់ផ្នែកទាំងអស់។
យ៉ាងណាមិញ ក្នុងសុន្ទរកថាមួយម៉ោងកន្លះនេះ លោក ស៊ី មិននិយាយអ្វីចំៗឡើយពីបញ្ហាដែលចិនកំពុងប្រឈម ឬសូម្បីតែបញ្ហាសំខាន់ៗ និងរសើបដូចជាជម្លោះពាណិជ្ជកម្មជាមួយអាមេរិកជាដើម។ លោកបានត្រឹមលើកឡើងថា គ្រប់ជំហាននៃការកែទម្រង់ និងការបើកចំហ មិនមែនជារឿងងាយស្រួលឡើយ ហើយចិននឹងជួបបញ្ហារាប់សិបជំពូកទៀតក្នុងពេលអនាគត រាប់ទាំងបញ្ហាដែលមិនអាចស្មានដល់ផងដែរ៕
© រក្សាសិទ្ធិដោយ thmeythmey.com