អង់គ្លេសត្រៀមលុយនិងកងទ័ព ក្នុងករណីចាកចេញពីអឺរ៉ុបដោយគ្មានកិច្ចព្រមព្រៀង

អន្តរជាតិ

អង់គ្លេសត្រៀមលុយនិងកងទ័ព ក្នុងករណីចាកចេញពីអឺរ៉ុបដោយគ្មានកិច្ចព្រមព្រៀង

19, Dec 2018 , 2:14 pm

រូបភាព

ដោយ: តន ចាន់រិទ្ធារ៉ា

រដ្ឋាភិបាលអង់គ្លេស នៅថ្ងៃទី១៨ ខែធ្នូ បានសម្រេចចិត្តបង្កើតផែនការមួយដើម្បីត្រៀមដោះស្រាយបញ្ហា ក្នុងករណីកិច្ចព្រមព្រៀងចាកចេញជាមួយសហភាពអឺរ៉ុបឆ្លងមិនផុតសភា។ កិច្ចព្រមព្រៀងរវាងរដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ ជាមួយសហភាពអឺរ៉ុប កំពុងស្ថិតក្នុងភាពមិនច្បាស់លាស់ ដ្បិតសមាជិកសភាជាច្រើនមិនពេញចិត្តនឹងលក្ខខណ្ឌចែងក្នុងកិច្ចព្រមព្រៀងនេះ។ លោកស្រី ម៉េយ៍ ក៏ធ្លាប់រត់រកអឺរ៉ុបឲ្យជួយដែរ ប៉ុន្តែគ្មានលទ្ធផលឡើយ។

គណៈរដ្ឋមន្ត្រីអង់គ្លេស បានត្រៀមលុយចំនួន២ពាន់លានផោនសម្រាប់ក្រសួងនានា និងកងទ័ពចំនួន៣៥០០នាក់ដើម្បីទប់ទល់ស្ថានការណ៍ នៅពេលដែលអង់គ្លេសចាកចេញពីសហភាពអឺរ៉ុបទាំងគ្មានកិច្ចព្រមព្រៀងណាមួយនោះ។ តាមគម្រោង អង់គ្លេសនឹងចាកចេញនៅថ្ងៃទី២៩ ខែមីនា ឆ្នាំ២០១៩ ប៉ុន្តែមកទល់ពេលនេះ រដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ មិនទាន់ទទួលបានការយល់ព្រមពីសភាលើកិច្ចព្រមព្រៀងចាកចេញឡើយ។

នៅសល់តែមួយរយថ្ងៃទៀតប៉ុណ្ណោះ អង់គ្លេសនឹងត្រូវចាកចេញ ប៉ុន្តែសមាជិកអង់គ្លេសនៅតែជម្នះមិនទទួលយកកិច្ចព្រមព្រៀងរបស់លោកស្រី ម៉េយ៍ ដដែលរហូតដល់លោកស្រីសម្រេចចិត្តពន្យារពេលបោះឆ្នោតលើកិច្ចព្រមព្រៀងនេះដល់ពាក់កណ្ដាលខែមករា ឆ្នាំ២០១៩ ។ ប្រឈមមុខការជំទាស់ដាច់ណាត់នេះ លោកស្រីនាយករដ្ឋមន្ត្រីរូបនេះក៏ងាកទៅរកមេដឹកនាំអឺរ៉ុបឲ្យជួយដែរ ប៉ុន្តែអឺរ៉ុបគ្មានបំណងចរចាម្ដងទៀតឡើយ។

បើតាមសារព័ត៌មានអង់គ្លេស BBC ក្រោយកិច្ចប្រជុំថ្ងៃទី១៨ ខែធ្នូ រដ្ឋាភិបាលអង់គ្លេសបានផ្ទេរប្រាក់ចំនួន៤៨០លានផោនទៅក្រសួងមហាផ្ទៃដើម្បីពង្រឹងសន្តិសុខជាតិ និងបង្កើនចំនួនកម្លាំងការពារព្រំដែន។ ក្រសួងបរិស្ថាន ចំណីអាហារ និងកិច្ចការជនបទ នឹងទទួលបាន៤១០លានផោនដើម្បីធានាថា ពេលចាកចេញពីអឺរ៉ុប ពាណិជ្ជកម្មត្រី ផលិតផលអាហារ និងគ្រឿងគីមី នៅតែបន្តដំណើរការដោយគ្មានរអាក់រអួលឡើយ។

ទឹកប្រាក់នៅសេសសល់ប៉ុន្មានទៀតក្នុងចំណោមគម្រោងចំណាយ២ពាន់លានដុល្លារនេះ នឹងត្រូវបែងចែកទៅកាន់ក្រសួង និងស្ថាប័នមួយចំនួន សំដៅធ្វើយ៉ាងណាត្រៀមទុកមុនក្នុងករណីបញ្ហាផ្ទុះឡើង បើសភានៅតែមិនព្រមលើកិច្ចព្រមព្រៀងនេះ។ ដោយឡែក រដ្ឋមន្ត្រីការពារជាតិអង់គ្លេស Gavin Williamson និយាយថា ទាហាន៣៥០០នាក់ នឹងមានសមាសភាពជាវិស្វករ មន្ត្រីភស្តុភារ និងទាហានបម្រុងផងដែរ ហើយដែលបានត្រៀមខ្លួនស្រេចអស់ហើយ។

ផែនការរបស់លោកស្រី ម៉េយ៍ ខាងលើ ត្រូវបានបក្សប្រជាធិបតេយ្យសេរីចាត់ទុកជាសង្គ្រាមចិត្តសាស្ត្រ ដែលចង់បំភ័យសមាជិកសភា ពាណិជ្ជករ និងសាធារណជន។ ដោយប្រកាសផែនការត្រៀមក្នុងករណីចាកចេញពីសហភាពអឺរ៉ុបដោយគ្មានកិច្ចព្រមព្រៀង បក្សដដែលនេះចោទរដ្ឋាភិបាលលោកស្រី ម៉េយ៍ ថា បង្ខំឲ្យពួកគេទទួលយកកិច្ចព្រមព្រៀងដែលពួកគេមិនពេញចិត្ត៕