ជាតិ
អាជ្ញាធរជាតិដោះស្រាយទំនាស់ដីធ្លីដឹកនាំដោយលោក ជា សុផារ៉ា
× លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ត្រូវបានរាជរដ្ឋាភិបាលកម្ពុជា តែងតាំងជាប្រធានអាជ្ញាធរជាតិដោះស្រាយទំនាស់ដីធ្លី។ នេះបើយោងតាមអនុក្រឹត្យចុះថ្ងៃទី១៣ ខែធ្នូ ឆ្នាំ២០១៨ ។
តាមពិតទៅ លោក ជា សុផារ៉ា បានឡើងគ្រប់គ្រងស្ថាប័នមួយនេះ បន្តពីលោក ប៊ិន ឈិន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី ក្នុងពិធីផ្លូវការមួយតាំងពីថ្ងៃទី១២ ខែកញ្ញា មកម្ល៉េះ ប៉ុន្តែអនុក្រឹត្យថ្មីដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន មានបន្ថែមសមាសភាពមួយចំនួនផងដែរ។
ជាមួយគ្នានេះ លោក ឃុន ហាំង ទេសរដ្ឋមន្ត្រីទទួលបន្ទុកបេសកកម្មពិសេស ត្រូវបានតែងតាំងជាអនុប្រធានប្រចាំការ អមដោយសារសមាជិកជាច្រើននាក់ទៀត ក្នុងនោះរួមមាន លោក សាយ សំអាល់ រដ្ឋមន្ត្រីក្រសួងបរិស្ថាន លោក វេង សាខុន រដ្ឋមន្ត្រីក្រសួងកសិកម្ម លោក វង សូត រដ្ឋមន្ត្រីក្រសួងសង្គមកិច្ច និងលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ជាដើម។
សមាសភាពផ្សេងទៀត មានឋានៈជារដ្ឋលេខាធិការតាមក្រសួង ជា អគ្គមេបញ្ជា្កការរងនៃកងយោធពលខេមរភូមិន្ទ, អគ្គលេខធិការក្រុមប្រឹក្សាអភិវឌ្ឍន៍កម្ពុជា, មេធាវីរាជរដ្ឋាភិបាល,សមាជិកគណៈកម្មាធិការសិទ្ធិមនុស្ស រួមទាំងលោក លោកស្រីអភិបាលរាជធានី-ខេត្តទាំងអស់។
តាមអនុក្រឹត្យដដែល លោក ទេព ធន ត្រូវតែងតាំងជាអគ្គលេខាធិការនៃអគ្គលេខាធិការដ្ឋានអាជ្ញាធរជាតិដោះស្រាយទំនាស់ដីធ្លី ដោយមានអគ្គលេខាធិការរង១០នាក់ ៕
Tag:
ដីធ្លី
ជា សុផារ៉ា
ជាតិ
© រក្សាសិទ្ធិដោយ thmeythmey.com