ជាតិ
វីដេអូ
សង្គមជាតិ
ក្រោយផ្ញើលិខិតទៅរដ្ឋមន្ត្រីវ័យ២៥ឆ្នាំម៉ាឡេស៊ីកញ្ញា ប្រាក់ មុន្នីរ័ត្ន ជំរុញឲ្យយុវជនខ្មែរ និងម៉ាឡេស៊ីជួបគ្នា
× ភ្នំពេញ៖ ក្រោយពីកញ្ញា ប្រាក់ មុន្នីរ័ត្ន សរសេរសំបុត្រផ្ញើទៅឲ្យលោក Syed Saddih Syed Abdul Rahman រដ្ឋមន្ត្រីក្រសួងអប់រំ យុវជន និងកីឡា ម៉ាឡេស៊ី កន្លងទៅនេះ បានធ្វើឲ្យបណ្តាប្រទេសមួយចំនួន ជាពិសេស យុវជននៃប្រទេសទាំងពីរស្គាល់កញ្ញា មុន្នីរ័ត និងលោករដ្ឋមន្ត្រីវ័យ២៥ឆ្នាំរូបនេះកាន់តែច្បាស់។ គោលបំណងនៃការសរសេរសំបុត្រផ្ញើទៅឲ្យលោករដ្ឋមន្ត្រីអប់រំម៉ាឡេស៊ី គឺកញ្ញាចង់គាំទ្រលើការដឹកនាំរបស់លោក ក្នុងនាមជាយុវជនអាស៊ានម្នាក់។ ទន្ទឹមនឹងនេះ កញ្ញា មុន្នីរ័ត ចង់ឲ្យយុវជនខ្មែរ មើលឃើញពីគំរូដឹកនាំរបស់លោករដ្ឋមន្ត្រីក្រសួងអប់រំម៉ាឡេស៊ី ហើយកញ្ញាប៉ងចង់ឲ្យយុវជនខ្មែរ និងយុវជនម៉ាឡេស៊ីជួបគ្នាផ្លាស់ប្តូរបទពិសោធន៍ក្នុងក្របខ័ណ្ឌយុវជនអាស៊ាន។
សូមអញ្ជើញទស្សនាបទសម្ភាសរវាងកញ្ញា សៅ សុខអេង នៃសារព័ត៌មានថ្មីៗ ជាមួយនឹងស្ត្រីខ្មែរដែលសរសេរសំបុត្រទៅឲ្យលោករដ្ឋមន្ត្រីក្រសួងអប់រំម៉ាឡេស៊ី កញ្ញា ប្រាក់ មុន្នីរ័ត្ន ដូចតទៅ៖
ដោយសារកញ្ញាមើលឃើញថា យុវជនកម្ពុជាវ័យក្មេង មានសមត្ថភាពគ្រប់គ្រាន់ក្នុងការដឹកនាំ ប៉ុន្តែការទទួលបានឱកាសនៅមានកម្រិតនៅឡើយ។ «ខ្ញុំគិតថាយុវជនខ្មែរមានសក្តានុពល មិនចាញ់ប្រទេសដែលជាសមាជិកអាស៊ាននោះទេ គ្រាន់តែពួកគេមិនទាន់ទទួលបានឱកាសសម្រាប់បញ្ចេញសមត្ថភាព។ ដោយឡែកយុវជនដែលទទួលបានឱកាសហើយ ប៉ុន្តែពួកគេឆាប់មានមោទកភាពពេក ទើបធ្វើឲ្យគាត់ភ្លេចពីការអភិវឌ្ឍខ្លួនតទៅថ្ងៃអនាគតទៀត»។ ទាំងនេះជាចំណុចសំខាន់ដែល កញ្ញា មុន្នីរ័ត្ន ចង់ឲ្យយុវជនកម្ពុជាពង្រឹងសមត្ថភាពបន្ថែម ដើម្បីទទួលបានឱកាសដឹកនាំដូចនឹងលោករដ្ឋមន្ត្រីក្រសួងអប់រំ ម៉ាឡេស៊ី ដែរ។
ជាអតីតអ្នកដឹកនាំយុវជននៅអង្គការសមាគមយុវជនខ្មែរ និងអង្គការយុវជនដើម្បីឯកភាព និងអភិវឌ្ឃន៍ ហើយបច្ចុប្បន្នជាបុគ្គលិកដែលបម្រើការងារនៅ ASEAN Talent Delivery កញ្ញា មុន្នីរ័ត្ន ចង់មានកិច្ចពិភាក្សាជាមួយលោករដ្ឋមន្ត្រីរូបនេះផ្ទាល់ រួមទាំងយុវជននៃប្រទេសទាំងពីរបានជួបគ្នា ដើម្បីចែករំលែកបទពិសោធន៍ពីវិធីសាស្ត្រក្នុងការដឹកនាំយុវជនឲ្យពង្រឹងសមត្ថភាព សម្រាប់ផ្លាស់ប្តូរយោបល់គ្នាទៅវិញទៅមក ដើម្បីអភិវឌ្ឍន៍សង្គមឲ្យមានប្រសិទ្ធភាព៕
Tag:
ប្រាក់ មុន្នីរ័ត្ន
យុវជន
ម៉ាឡេស៊ី
© រក្សាសិទ្ធិដោយ thmeythmey.com