អន្តរជាតិ
មហាក្សត្រថៃ មហា វជិរាលង្ករណ៍ នឹងឡើងគ្រងរាជ្យផ្លូវការក្នុងខែឧសភា
× រាជាណាចក្រថៃ នឹងរៀបចំពិធីឡើងគ្រងរាជ្យផ្លូវការរបស់មហាក្សត្រ មហា វជិរាលង្ករណ៍ (Maha Vajiralongkorn) នៅដើមខែឧសភាខាងមុខ។ ក្នុងសេចក្ដីប្រកាសរបស់រាជវាំងនៅថ្ងៃទី១ ខែមករានេះ ពិធីផ្លូវការនឹងមានរយៈពេលបីថ្ងៃ ដោយធ្វើតាមប្រពៃណីបុរាណរបស់ថៃ។ ការឡើងគ្រងរាជ្យផ្លូវការនេះ ត្រូវបានពន្យារពេលយូរគួរសម ដោយសារតែការទុកពេលកាន់ទុក្ខការសោយទិវង្គតរបស់ព្រះចៅ ភូមិបុល អាឌុលយ៉ាដេត កាលពីឆ្នាំ២០១៦ កន្លងទៅ។
ក្នុងសេចក្ដីប្រកាសតាមកញ្ចក់ទូរទស្សន៍ កម្មវិធីឡើងគ្រងរាជ្យផ្លូវការរបស់មហាក្សត្រ មហា វជិរាលង្ករណ៍ នឹងធ្វើឡើងចាប់ពីថ្ងៃទី៤ ដល់ថ្ងៃទី៦ ខែឧសភា។ នៅថ្ងៃទី៤ ក្សត្រិយ៍អង្គនេះ នឹងជួបជាមួយសមាជិករាជវង្ស សមាជិកក្រុមប្រឹក្សាមហាក្សត្រ សមាជិកគណៈរដ្ឋមន្ត្រី និងមន្ត្រីជាន់ខ្ពស់រដ្ឋាភិបាលដទៃទៀត។ ថ្ងៃបន្ទាប់ ទ្រង់នឹងទទួលបរមងារសម្រាប់រាជ្យតាមប្រពៃណី និងថ្ងៃចុងក្រោយ ផ្ដល់សុន្ទរកថាទៅកាន់ប្រជាជន និងជួបមន្ត្រីទូត។
មហាក្សត្រ មហា វជិរាលង្ករណ៍ ឡើងសោយរាជ្យក្នុងខែធ្នូ ឆ្នាំ២០១៧ បន្តពីបិតា ភូមិបុល អាឌុលយ៉ាដេត ដែលចូលទិវង្គតក្នុងខែតុលា ឆ្នាំ២០១៦ ។ ទ្រង់ជាស្ដេចរាមាទី១០ នៃរាជវង្សចក្រីរបស់ថៃផង។ ក្នុងសេចក្ដីប្រកាសថ្ងៃទី១ ខែមករា រាជវាំងថៃលើកឡើងថា កាលបរិច្ឆេទនេះ ជាពេលវេលាសមរម្យដើម្បីរៀបចំពិធីគ្រងរាជ្យតាមប្រពៃណី និងដើម្បីការអបអររបស់ប្រជាជាតិ ក៏ដូចជាក្ដីរីករាយរបស់ប្រជាជនផងដែរ។
រជ្ជកាលថ្មីរបស់ក្សត្រាអង្គនេះ គឺជាការបញ្ចប់រជ្ជកាលរបស់បិតាទ្រង់ ដែលត្រូវបានប្រជាជនថៃគោរពសឹងស្មើអាទិទេពទៅហើយក្នុងរយៈពេល៧០ឆ្នាំមកនេះ។ បន្ទាប់ពីសោយរាជ្យតាមសំណើរបស់ប្រធានសភារួចមក មហាក្សត្រព្រះជន្ម៦៦វស្សា បានពង្រឹងអំណាចរបស់ទ្រង់ក្នុងកិច្ចការរាជវាំងដូចជាការគ្រប់គ្រងដោយផ្ទាល់កងអង្គរក្ស ការគ្រប់គ្រងទ្រព្យសម្បត្តិដ៏ច្រើនមហាសាលទៅទៀត ដែលនោះជារឿងមិនធ្លាប់មានឡើយ។
មហាក្សត្រថៃ និងសមាជិករាជវង្ស ត្រូវបានការពារដោយច្បាប់ដែលដាក់ពិន័យយ៉ាងធ្ងន់ធ្ងរលើជនណាដែលបំពាន។ ទោសប្រមាថមហាក្សត្រ អាចជាប់ពន្ធនាគារដល់ទៅ១៥ឆ្នាំសម្រាប់មួយករណី។ ជនជាតិថៃច្រើនណាស់ដែរហើយ ដែលត្រូវជាប់ពន្ធនាគារដោយសារច្បាប់នេះ។
ឆ្នាំ២០១៩ គឺជាឆ្នាំដ៏សំខាន់របស់ថៃ។ នៅថ្ងៃ ២៤ ខែកុម្ភៈ ការបោះឆ្នោតទូទៅ នឹងធ្វើឡើងជាលើកដំបូងក្នុងរយៈពេលជិត៥ឆ្នាំ បន្ទាប់ក្រុមយោធាដឹកនាំដោយលោក ប្រាយុទ្ធ ចន្ទអូចា ធ្វើរដ្ឋប្រហារទម្លាក់រដ្ឋាភិបាលក្នុងខែឧសភា ឆ្នាំ២០១៤ ។ ក្រុមឧត្តមសេនីយ៍ថៃដែលមានភក្ដីភាពចំពោះមហាក្សត្រ បានពន្យារពេលបោះឆ្នោតច្រើនលើកទម្រាំកំណត់យកកាលបរិច្ឆេទក្នុងខែកុម្ភៈនេះ៕
Tag:
ថៃ
មហា វជិរាលង្ករណ៍
© រក្សាសិទ្ធិដោយ thmeythmey.com