អន្តរជាតិ
ប្រធានាធិបតីតៃវ៉ាន់៖ ចិនត្រូវទទួលស្គាល់ការពិតថា តៃវ៉ាន់ខុសពីចិន
× ប្រធានាធិបតីតៃវ៉ាន់ Tsai Ing-wen នៅថ្ងៃទី១ ខែមករា បានស្នើឲ្យក្រុងប៉េកាំងទទួលយកការពិតនៃភាពខុសគ្នារវាងកោះតៃវ៉ាន់ និងចិនប្រមានិត។ លោកស្រី Tsai ដែលមាននិន្នាការទៅរកឯករាជ្យនោះ បានប្រាប់ឲ្យចិនប្រកាន់យកវិធីសាស្ត្រសន្តិភាព បើចង់ដោះស្រាយបញ្ហាដែលរួមរឹតទំនាក់ទំនងទ្វេភាគី និងត្រូវគោរពគុណតម្លៃប្រជាធិបតេយ្យរបស់តៃវ៉ាន់ផង។
កោះតៃវ៉ាន់ផ្សេង ឯចិនដីគោកផ្សេង។ នេះជាសាររបស់ប្រធានាធិបតីតៃវ៉ាន់ Tsai Ing-wen ទៅកាន់ចិននាឱកាសថ្លែងសុន្ទរកថាចូលឆ្នាំថ្មី២០១៩ ។ សាររបស់លោកស្រីប្រធានាធិបតី ចង់សំដៅថា តៃវ៉ាន់ គឺជាប្រទេសមួយ ដូចគ្នានឹងចិនដែលជាប្រទេសមួយដែរ ហើយតៃវ៉ាន់ក៏មិនមែនជាអាណាខេត្តរបស់ចិនអ្វីឡើយ។
ទំនាក់ទំនងរវាងតៃវ៉ាន់ និងចិន ល្អក់កករខ្លាំងតាំងពីលោកស្រី Tsai ក្លាយជាប្រធានាធិបតីតៃវ៉ាន់ក្នុងឆ្នាំ២០១៦ មក។ ដោយបារម្ភថា តៃវ៉ាន់នឹងផ្ដាច់ខ្លួននោះ ក្រុងប៉េកាំងដែលចាត់ទុកតៃវ៉ាន់ជាផ្នែកមួយរបស់ខ្លួននោះ បានដាក់សម្ពាធលើដែនកោះនេះយ៉ាងខ្លាំងទាំងផ្នែកការទូត និងការសម្ញែងសាច់ដុំយោធាផង។ ម្ដងជាពីរដង មេដឹកនាំចិនតែងអះអាងថា ខ្លួនមិនរអានឹងប្រើកម្លាំងយោធាដើម្បីគ្រប់គ្រងតៃវ៉ាន់ឡើយ។
តៃវ៉ាន់ឯណោះវិញ មានជំហរច្បាស់ហើយ គឺគ្មានចំណាប់អារម្មណ៍ទៅរស់នៅក្រោមការដឹកនាំបែបកុម្មុយនីស្តឡើយ។ លោកស្រី Tsai និយាយថា ភាគីទាំងពីរត្រូវតែយល់ និងទទួលស្គាល់ភាពខុសគ្នារវាងតៃវ៉ាន់ និងចិនទាំងគុណតម្លៃប្រជាធិបតេយ្យ ការរស់នៅរបស់ប្រជាជន និងប្រព័ន្ធនយោបាយផង ហើយក្រុងប៉េកាំងគោរពជីវិតមនុស្ស២៣លាននាក់ដែលរស់នៅលើកោះតៃវ៉ាន់។ នេះបើតាមការផ្សាយរបស់ទីភ្នាក់ងារព័ត៌មាន AFP ។
លើសពីនោះ មេដឹកនាំតៃវ៉ាន់ចាត់ទុកដំណោះស្រាយសន្តិភាព ជាច្រកចេញដ៏ល្អ។ ក្នុងសុន្ទករថាដដែល លោកស្រី Tsai លើកឡើងថា ចិនត្រូវតែគោរពសេរីភាព និងប្រជាធិបតេយ្យនៅតៃវ៉ាន់ ហើយត្រូវប្រើមធ្យោបាយគ្មានសង្គ្រាម និងស្មើភាពដើម្បីដោះស្រាយភាពខុសគ្នា។
សុន្ទរកថារបស់លោកស្រី Tsai ធ្វើឡើងមួយថ្ងៃមុនប្រធានាធិបតីចិន ស៊ី ជិនភីង ថ្លែងសុន្ទកថាជាសាធារណៈមួយថ្ងៃទី២ ខែមករា ស្ដីពីបញ្ហាតៃវ៉ាន់។ គេរំពឹងថា លោក ស៊ី នឹងប្រើឱកាសនេះដើម្បីផ្ញើសារទៅកាន់តៃវ៉ាន់ឲ្យងាករកកិច្ចសហប្រតិបត្តិការជាមួយប៉េកាំងវិញ និងមិនត្រូវប្រកាសផ្ដាច់ខ្លួនឡើយ។ ម្យ៉ាងទៀត ប្រមុខដឹកនាំចិនរូបនេះក៏នឹងនៅតែប្រកាសថា តៃវ៉ាន់ជាផ្នែកមួយមិនអាចផ្ដាច់ចេញបានរបស់ចិនដដែល៕
Tag:
តៃវ៉ាន់
ចិន
Tsai Ing-wen
© រក្សាសិទ្ធិដោយ thmeythmey.com